କେନ୍ଦୁଝର, ୨୨।୭ ଉତ୍ତରାଖଣ୍ଡର ପ୍ରସିଦ୍ଧ କେଦାରନାଥର ବରଫାବୃତ୍ତ ପର୍ବତ ଉପରେ ଉଡ଼ିଛି ବିଶ୍ୱର ଦୀର୍ଘତମ ତ୍ରିରଙ୍ଗା ପତାକା। ଏଭଳି ଦୁଃସାହସିକ କାର୍ଯ୍ୟ କରି ୱାଲର୍ଡ ୱାଇଡ୍ ବୁକ୍ ଅଫ୍ ରେକଡର୍ସରେ ନିଜକୁ ସ୍ଥାନିତ କରିଛି ଉତ୍ତରପ୍ରଦେଶର ଇଣ୍ଡିଆନ ଆଡଭେଞ୍ଚର ଫାଉଣ୍ଡେଶନ। ଏହି ଅଭିଯାନରେ ସାମିଲ ହୋଇଥିବା କେନ୍ଦୁଝର ଜିଲାର ଜଗନ୍ନାଥ ମହାନ୍ତ ବିରଳ ରେକର୍ଡ କ୍ଲବରେ ନିଜକୁ ସ୍ଥାନିତ କରି ଓଡ଼ିଶା ପାଇଁ ଆଣିଛନ୍ତି ଗୌରବ।
ଇଣ୍ଡିଆନ ଆଡ୍ଭେଞ୍ଚର ଫାଉଣ୍ଡେଶନ ସଂସ୍ଥା ନିଆରା ରେକର୍ଡ ଲକ୍ଷ୍ୟ ନେଇ ଉତ୍ତରାଖଣ୍ଡ ରାଜ୍ୟର ୧୨,୫୦୦ ଫୁଟ ଉଚ୍ଚତାରେ ଥିବା କେଦାରନାଥ ପର୍ବତ ଉପରେ ବିଶ୍ୱର ଦୀର୍ଘତମ ୨୮୦ ଫୁଟ ଲମ୍ବର ପତାକା ଉତ୍ତୋଳନ କରିବାକୁ ଯୋଜନା କରିଥିଲା। ଏଥିପାଇଁ ଗତ ଏପ୍ରିଲ ୨୮ରେ ଆବେଦନ କରାଯାଇଥିଲା। ଆବଶ୍ୟକ ଅନୁମତି ମିଳିବା ପରେ ଏହି ଅଭିଯାନରେ ୩୦ ଜଣ ସାମିଲ ହୋଇଥିଲେ। ୨୦୨୧ ଡିସେମ୍ବର ୨୭ରେ ସେମାନେ ପର୍ବତ ଚଢ଼ିବା ସହ ବିଯୁକ୍ତ ୧୬ ଡିଗ୍ରୀ ତାପମାତ୍ରାରେ ଭାରତର ଦୀର୍ଘତମ ଜାତୀୟ ପତାକା ଉତ୍ତୋଳନ କରିଥିଲେ। ଗତ ବୁଧବାର ଏହି ରେକର୍ଡ ଘୋଷଣା କରାଯିବା ପରେ ଅଭିଯାତ୍ରୀ ଦଳକୁ ବିଭିନ୍ନ ମହଲରେ ଶୁଭେଚ୍ଛାର ସୁଅ ଛୁଟିଛି।
ସୂଚନାଯୋଗ୍ୟ, ୨୩ ବର୍ଷୀୟ ଜଗନ୍ନାଥଙ୍କ ଘର କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ଭଗାମୁଣ୍ଡା ପଞ୍ଚାୟତ ନୂଆଗାଁରେ। ତାଙ୍କ ବାପା ଶ୍ୟାମସୁନ୍ଦର ମହାନ୍ତ ଜଣେ ପ୍ରଧାନ ଶିକ୍ଷକ ଓ ମା’ ଶକୁନ୍ତଳା ମହାନ୍ତ ଗୃହିଣୀ। ଜଗନ୍ନାଥ ବିଜୁ ପଟ୍ଟନାୟକ ୟୁନିଭର୍ସିଟି ଆଣ୍ଡ ଟେକ୍ନୋଲୋଜିରୁ କମ୍ପ୍ୟୁଟରରେ ମାଷ୍ଟର ଡିଗ୍ରୀ ପାସ୍ କରିବା ପରେ ନଏଡାର ଘରୋଇ କମ୍ପାନୀ ଏଚ୍ସିଏଲ୍ରେ କାର୍ଯ୍ୟରତ ଅଛନ୍ତି। ଉତ୍ତରପ୍ରଦେଶରେ ଜୁଲାଇ ୨୮ରେ ହେବାକୁ ଥିବା ଏକ ସ୍ବତନ୍ତ୍ର କାର୍ଯ୍ୟକ୍ରମରେ ତାଙ୍କୁ ‘ୟୁବା ଗୌରବ’ ପୁରସ୍କାରରେ ସମ୍ମାନିତ କରାଯିବ। ଦେଶର ୧୮ଜଣ ସ୍ବେଚ୍ଛାସେବୀଙ୍କୁ ଏହି ପୁରସ୍କାର ମିଳିବ ବୋଲି ଜଗନ୍ନାଥ କହିଛନ୍ତି। ଆସନ୍ତା ସେପ୍ଟେମ୍ବରରେ ଆୟୋଜିତ ହେବାକୁ ଥିବା ୧୮ ହଜାର ଫୁଟ ଉଚ୍ଚତା ବିଶିଷ୍ଟ ଲଦାଖ ଟ୍ରିପ୍ ଓ କେଦାରନାଥରୁ ବଦ୍ରିନାଥ ପର୍ଯ୍ୟନ୍ତ ନନ୍ଷ୍ଟପ ଯାତ୍ରା କରିବା ପାଇଁ ସେ ପ୍ରସ୍ତୁତି ଚଳାଇଛନ୍ତି। ସେହିପରି ଡିସେମ୍ବରରେ ସାଉଥ୍ ଆଫ୍ରିକାର କିଲିମାଞ୍ଜାରୋ (୫,୮୯୫ ମିଟର) ପର୍ବତଶ୍ରେଣୀ ଚଢ଼ିବା ପାଇଁ ପ୍ରସ୍ତୁତି ଆରମ୍ଭ କରିଥିବା କହିଛନ୍ତି।
