ଲକ୍ଷ୍ନୌ,୨୨।୭: ଉତ୍ତରପ୍ରଦେଶର ଜହୁରାବାଦର ବିଧାୟକ ତଥା ଏସ୍ବିଏସ୍ପିର ରାଷ୍ଟ୍ରୀୟ ଅଧ୍ୟକ୍ଷ ଓମ୍ ପ୍ରକାଶ ରାଜଭରଙ୍କୁ ‘ଓ୍ବାଇ’ ବର୍ଗର ସୁରକ୍ଷା ପ୍ରଦାନ କରାଯାଇଛି। ୟୁପି ସରକାରଙ୍କ ନିର୍ଦ୍ଦେଶକ୍ରମେ ଏହି ସୁରକ୍ଷା ତାଙ୍କୁ ଦିଆଯାଇଛି। ସୂଚନାଯୋଗ୍ୟ, ଗୁରୁବାର ତଥା ରାଷ୍ଟ୍ରପତି ଫଳାଫଳ ଦିନ ହିଁ ଓପି ରାଜଭରଙ୍କୁ ‘ଓ୍ବାଇ’ ବର୍ଗ ସୁରକ୍ଷା ପ୍ରଦାନ କରାଯାଇଥିଲା। ସରକାରଙ୍କ ଏହି ନିଷ୍ପତ୍ତି ପରେ ରାଜନୈତିକ ମହଲରେ ଅନେକ କଳ୍ପନାଜଳ୍ପନା ଲାଗି ରହିଛି। ଆସନ୍ତା ଲୋକ ସଭା ନିର୍ବାଚନରେ କିଛି ନୂଆ ରାଜନୈତିକ ସମୀକରଣ ଦେଖିବାକୁ ମିଳିପାରେ ବୋଲି ଚର୍ଚ୍ଚା ହେଉଛି। ସୂଚନା ମୁତାବକ, ଗତ ବିଧାନସଭା ନିର୍ବାଚନରେ ଓପି ରାଜଭର ସମାଜବାଦୀ ପାର୍ଟି(ଏସ୍ପି) ସହ ମିଳିତ ମେଣ୍ଟରେ କେନ୍ଦ୍ର ସରକାରଙ୍କ ଉପରେ ବର୍ଷିଥିଲେ। ତେବେ କିଛି ଦିନ ହେବ ଓପି ରାଜଭରଙ୍କ ରଙ୍ଗଢ଼ଙ୍ଗ ବଦଳିଥିବା ଦେଖିବାକୁ ମିଳିଛି। ରାଷ୍ଟ୍ରପତି ନିର୍ବାଚନ ପୂର୍ବରୁ ସେ ଅମିତ ଶାହାଙ୍କୁ ଭେଟିଥିଲେ। ଏଥିସହ ରାଷ୍ଟ୍ରପତି ନିର୍ବାଚନରେ ଅଖିଳେଶ ଯାଦବଙ୍କ ବିରୋଧରେ ବିଦ୍ରୋହ କରି ରାଜଭର ଏନ୍ଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିଥିଲେ। ଏତଦ୍ବ୍ୟତୀତ ସେ ଲକ୍ଷ୍ନୌରେ ଏନ୍ଡିଏର ରାଷ୍ଟ୍ରପତି ପ୍ରାର୍ଥୀ ମୁର୍ମୁଙ୍କ ପାଇଁ ଆୟୋଜିତ ଏକ ରାତ୍ର ଭୋଜନରେ ମଧ୍ୟ ସାମିଲ ହୋଇଥିଲେ। ରାଜଭର କହିଛନ୍ତି, ବିରୋଧୀ ପ୍ରାର୍ଥୀ ଯଶବନ୍ତ ସିହ୍ନାଙ୍କ ପାଇଁ ଆୟୋଜିତ ରାତ୍ର ଭୋଜନରେ ଅଖିଳେଶ ତାଙ୍କୁ ନିମନ୍ତ୍ରଣ କରି ନ ଥିଲେ। ତେଣୁ ସେ ଏନ୍ଡିଏକୁ ସମର୍ଥନ କରିବାକୁ ନିଷ୍ପତ୍ତି ନେଇଥିଲେ ବୋଲି ରାଜଭର କହିଛନ୍ତି।
