ସମ୍ବଲପୁର,୧୦।୧୧(ପ୍ରମୋଦ ବହିଦାର): ନୂଆପଡ଼ା ଜଙ୍ଗଲରୁ ୨୦୨୩ ନଭେମ୍ବର ୫ତାରିଖରେ ଧରା ହୋଇଥିବା ମଣିଷଖିଆ କଲରାପତରିଆ ଅଣ୍ଡିରା ବାଘ(ରାଜା)କୁ ସମ୍ବଲପୁର ପ୍ରାଣୀ ଉଦ୍ୟାନ(ଡିଅର ପାର୍କ)ରେ ଥିବା ମାଈ କଲରାପତରିଆ(ରାଣୀ) ବାଘ ସହ ଶନିବାର ଛଡ଼ାଯାଇଛି। ଏଠାରେ ସ୍ବତନ୍ତ୍ର ଭାବେ ନିର୍ମିତ ଏକ ପ୍ରଶସ୍ତ ଗ୍ଲାସ୍ ଭ୍ୟୁ ଏନ୍କ୍ଲୋଜର(କାଚ ପଞ୍ଜୁରି)ରେ ଉଭୟଙ୍କୁ ରଖାଯାଇ ସେମାନଙ୍କ ଉପରେ ସିସିଟିଭି ମାଧ୍ୟମରେ ନଜର ରଖାଯାଇଛି। ଏକାଠି ହେବା ପରେ ଉଭୟ ରାଜା ଓ ରାଣୀ ପରସ୍ପର ପ୍ରତି ଆକର୍ଷିତ ହୋଇଛନ୍ତି। ଘନିଷ୍ଠତା ପୂର୍ବକ ଉଭୟେ ପରସ୍ପରର ଶରୀର ଓ ଲାଙ୍ଗୁଡ ଘର୍ଷଣ, ଖେଳ ତଥା ପାଶ୍ଚାତ୍ଧାବନ କରୁଛନ୍ତି। ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ମଧ୍ୟ ଆରମ୍ଭ ହୋଇଥିବା ଦେଖିବାକୁ ମିଳିଛି। ଏନକ୍ଲୋଜର ମଧ୍ୟରୁ ଉଭୟ ରାଜା ଓ ରାଣୀଙ୍କ ଘନିଷ୍ଠତା ଦୃଶ୍ୟକୁ ଏଠାକୁ ଆସୁଥିବା ପର୍ଯ୍ୟଟକମାନେ ବେଶ୍ ଉପଭୋଗ କରିଛନ୍ତି।
ନୂଆପଡ଼ାରେ ମଣିଷ ମାରି ଖାଇଥିବା କଲରାପତରିଆ ବାଘ(ରାଜା)କୁ ଧରାଯାଇ ୨୦୨୩ ନଭେମ୍ବର ୯ରେ ସମ୍ବଲପୁରକୁ ଆଣି ଏହି ପ୍ରାଣୀ ଉଦ୍ୟାନସ୍ଥିତ ପ୍ରାଣୀ ଉଦ୍ଧାର କେନ୍ଦ୍ରରେ ସଙ୍ଗରୋଧରେ ରଖି ଚିକିତ୍ସା କରାଯାଉଥିଲା। ଏଠାରେ ପୂର୍ବରୁ ରାଣୀ ନାମ୍ନୀ ଏକ ମାଈ କଲରାପତରିଆ ବାଘ ଥିବାରୁ ଏଠାକୁ ଆସିଲା ପରେ ଉକ୍ତ ପୁରୁଷ ବାଘକୁ ରାଜା ନାମକରଣ କରାଯାଇଥିଲା। ଏହା ସହିତ ତାର ଆଚରଣଗତ ଅଧ୍ୟୟନ ପୂର୍ବକ ବନ ବିଭାଗ ପକ୍ଷରୁ ତା’ ଉପରେ କଡ଼ା ନଜର ରଖାଯାଇଥିତ୍ଲା। ତେବେ କ୍ରମଶଃ ରାଜାର ଆଚରଣ ପରିବର୍ତ୍ତନ ସହ ଶାନ୍ତ ହେବା ପରେ ତାକୁ ଦୀର୍ଘ ୧୧ମାସ ପରେ ଗତ ସେପ୍ଟେମ୍ବରରେ ପ୍ରଥମେ ସଙ୍ଗରୋଧରୁ ମୁକ୍ତ କରି ପ୍ରାଣୀ ଉଦ୍ୟାନର ଗ୍ଲାସ୍ ଭ୍ୟୁ ଏନ୍କ୍ଲୋଜରରେ ରଖାଯାଇଥିଲା। ଯଦ୍ଦ୍ବାରା ପର୍ଯ୍ୟଟକ ତାକୁ ଦେଖିବାର ସୁଯୋଗ ପାଇଲେ। ମାତ୍ର ତାକୁ ମାଈ ବାଘ ରାଣୀଠାରୁ ପୃଥକ ଭାବେ ରଖାଯାଇଥିଲା। ରାଜାର ଆଚରଣ ରାଣୀ ପ୍ରତି ସହନଶୀଳ ହେବାଦେଖି ୧ ମାସ ପରେ ଶନିବାର ଉଭୟ ରାଜା ଓ ରାଣୀଙ୍କୁ ଗ୍ଲାସ୍ ଭ୍ୟୁ ଏନକ୍ଲୋଜରରେ ଏକାଠି ଛଡ଼ାଯାଇ ପରସ୍ପର ବନ୍ଧୁତା ସୃଷ୍ଟି ସହ ଶାରୀରିକ ସମ୍ପର୍କ ସ୍ଥାପନ ପାଇଁ ସୁଯୋଗ ଦିଆଯାଇଛି। ପ୍ରଥମ ଦିନ ଉଭୟଙ୍କ ମଧ୍ୟରେ ଏକାଧିକ ଥର ଶାରୀରିକ ସମ୍ପର୍କ ସ୍ଥାପନ ହୋଇଛି। ଯାହା ଏହି ପ୍ରାଣୀ ଉଦ୍ୟାନ ପାଇଁ ଏକ ଶୁଭ ସୂଚନା ବୋଲି ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଅଂଶୁପ୍ରଜ୍ଞା ଦାଶ କହିଛନ୍ତି। ସେ କହିଛନ୍ତି, ବର୍ତ୍ତମାନ ପୁରୁଷ ବାଘର ବୟସ ୮ ବର୍ଷ ଓ ମାଈବାଘର ବୟସ ୭ ବର୍ଷ। ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ଦ୍ୱାରା ଏହି ପ୍ରାଣୀ ଉଦ୍ୟାନରେ ୪୨ ବର୍ଷ ପରେ କଲରାପତରିଆ ବାଘବଂଶ ବୃଦ୍ଧି ନେଇ ନୂତନ ଆଶା ସଞ୍ଚାର ହୋଇଛି। ଶେଷ ଥର ପାଇଁ ଗତ ୧୯୮୨ ମସିହାରେ ଏକ କଲରାପତରିଆ ଶାବକ ଜନ୍ମ ହୋଇଥିଲା। ସମ୍ବଲପୁର ପ୍ରାଣୀ ଉଦ୍ୟାନରେ ଉକ୍ତ ବାଘଦ୍ୱୟଙ୍କୁ ଦେଖିବାକୁ ପର୍ଯ୍ୟଟକଙ୍କ ପାଇଁ ନିର୍ମାଣ ହୋଇଥିବା ଏଭଳି ଗ୍ଲାସ୍ ଭ୍ୟୁ ଏନକ୍ଲୋଜର ଓଡ଼ିଶାରେ ପ୍ରଥମ। ଯାହା ୨ଟି ବାଘ ରହିବା ପାଇଁ ୫୫୦ବର୍ଗମିଟରର ଏକ ପ୍ରଶସ୍ଥ ଏନକ୍ଲୋଜର ବୋଲି ସେ କହିଛନ୍ତି। ପ୍ରଥମେ ଏହା ୨୦୨୩ ମସିହାରେ ତାରଜାଲିରେ ନିର୍ମାଣ ହୋଇଥିବା ବେଳେ ୨୦୨୪ ମସିହାରେ ଏହାକୁ ଗ୍ଲାସ ଏନ୍କ୍ଲୋଜରରେ ବିକଶିତ କରାଯାଇଥିଲା। ଏହାସହ ଏଠାରେ ରହୁଥିବା ବନ୍ୟପ୍ରାଣୀଙ୍କ ଆରାମ ପାଇଁ ଝୁଲା ଖଚିତ ପଞ୍ଜୁରି ମଧ୍ୟ ନିର୍ମାଣ କରାଯାଇଛି ବୋଲି ସେ କହିଛନ୍ତି।
