ପୁରୁଷୋତ୍ତମପୁର,୨ା୫(ସବିତା ମିଶ୍ର): ଲୋକକଳାର ବିକାଶ ଲାଗି ଆଗେଇ ଆସିଛନ୍ତି ଗଞ୍ଜାମ ଜିଲାପାଳ ଭି. କୀର୍ତ୍ତିଭାସନ। ଲୋପ ପାଇବାକୁ ବସିଥିବା ଲୋକକଳା ଓ ପଲ୍ଲୀନୃତ୍ୟକୁ କିପରି ପୁଣିଥରେ ଉଦ୍ଜୀବିତ କରାଯାଇପାରିବ ଓ ଏହା ବଜାୟ ରହିବ ସେଥିନେଇ ପ୍ରୟାସ ଆରମ୍ଭ କରିଛନ୍ତି। ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ତାରାତାରିଣୀଠାରେ ପ୍ରେମଲତା ସାମନ୍ତରାୟ ତାଙ୍କ ପରିବାର ସଦସ୍ୟଙ୍କୁ ନେଇ ଲୋକକଳା ପାଲା ନୃତ୍ୟକୁ ବଜାୟ ରଖିବା ସହ ସତ୍ୟନାରାୟଣ କଳାକୁ ବଜାୟ ରଖିବା ସହ ୭୧ ବର୍ଷର ପରିଣତି ବୟସରେ ମଧ୍ୟ ମଞ୍ଚରେ ନିଖୁଣ ଅଭିନୟ ଜାରିରଖିଥିବାରୁ ତାଙ୍କୁ ତାଙ୍କର ଜନ୍ମଦିବସରେ ସମ୍ବର୍ଦ୍ଧିତ କରାଯାଇଛି।
ତାରାତାରିଣୀ ଛକ ବଣିକ ସଂଘ ପକ୍ଷରୁ ଆୟୋଜିତ ଉତ୍ସବରେ ମୁଖ୍ୟ ଅତିଥି ଭାବେ ସମ୍ବର୍ଦ୍ଧିତ କରି କଳାକାର ବିକାଶ ଲାଗି ଜିଲା ପ୍ରଶାସନ ପକ୍ଷରୁ କଳାକାରଙ୍କୁ ସମସ୍ତ ପ୍ରକାର ସହଯୋଗ ଯୋଗାଇଦିଆଯିବ ବୋଲି କହିଛନ୍ତି। ସମ୍ମାନିତ ଅତିଥି ଭାବେ ଜିଲାପରିଷଦର ମୁଖ୍ୟ ଉନ୍ନୟନ ଅଧିକାରୀ ସମୀର କୁମାର ଜେନା, ଛତ୍ରପୁର ଉପଜିଲାପାଳ ଶୁଭାଶିଷ ବରାଳ, ପୁରୁଷୋତ୍ତମପୁର ତହସିଲଦାର ବିନୋଦ କୁମାର ବେହେରା, ଏସ୍ଡିପିଓ ସୁଜିତ ନାୟକ ଯୋଗଦେଇଥିଲେ। ଏହାକୁ ବଣିକ ସଂଘର ସଭାପତି ରବୀନ୍ଦ୍ର ନାଥ ପଣ୍ଡାଙ୍କ ସମେତ ତାରାତାରିଣୀ ବଣିକ ସଂଘର ସମସ୍ତ ସଦସ୍ୟ ପରିଚାଳନା କରିଥିବାବେଳେ ପ୍ରେମଲତାଙ୍କ ସମ୍ପୂର୍ଣ୍ଣ ପରିବାର ଉପସ୍ଥିତ ଥିଲେ।
