ପୁରୀ,୪ା୧୦:ମଦ ନିଶାରେ ଭୁଲିଗଲେ ପରିବାର। ସ୍ତ୍ରୀ’, ପୁଅ, ଝିଅ ବି ଦେଖାଗଲେନି। ଶେଷରେ ସମସ୍ତଙ୍କୁ ମାଡ଼ ମାରି ଘରେ ନିଆଁ ଲଗାଇଦେଲେ ସ୍ବାମୀ। ଏଭଳି ଘଟଣା ପୁରୀ ବାସେଳିସାହି ଥାନା ଅନ୍ତର୍ଗତ ଜଗନ୍ନାଥ ବସ୍ତିରେ ରବିବାର ରାତିରେ ଦେଖିବାକୁ ମିଳିଛି। ଏ ନେଇ ଝିଅ ଅଭିଯୋଗ କରିବା ପରେ ପୋଲିସ ସମ୍ପୃକ୍ତ ବାପାଙ୍କୁ ଗିରଫ କରିଛି। ସେ ହେଲେ ଜଗନ୍ନାଥ ବସ୍ତିର ଧ୍ରୁବ ଓରଫ ଦିବାକର ସ୍ବାଇଁ(୪୨)। ଏ ନେଇ ପୋଲିସ ଏକ ମାମଲା(ନଂ.୨୩୩/୨୨) ରୁଜୁ କରି ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରିଛି। ସୂଚନାଯୋଗ୍ୟ, ଧ୍ରୁବ ନିୟମିତ ମଦ୍ୟପାନ କରି ଘରେ ଆସି କଳିଝଗଡ଼ା କରେ। ରବିବାର ରାତିରେ ମଧ୍ୟ ମଦ ପିଇ ଆସି ସ୍ତ୍ରୀ ସହ ଝଗଡ଼ା ଲାଗିଥିଲେ। ଏଭଳି ନ କରିବା ପାଇଁ ସ୍ତ୍ରୀ, ଝିଅ ଓ ପୁଅ ବୁଝାଇଥିଲେ। ଏଥିରେ ଉତ୍ତ୍ୟକ୍ତ ହୋଇ ଧ୍ରୁବ ଏକ କାଠଫାଳିଆରେ ସମସ୍ତଙ୍କୁ ଆକ୍ରମଣ କରିଥିଲା। ଏପରିକି ଘରେ ନିଆଁ ଲଗାଇଦେଇ ସମସ୍ତଙ୍କୁ ମାରିବାକୁ ଉଦ୍ୟମ କରିଥିଲା। ଧ୍ରୁବର ଝିଅ କୌଶଳକ୍ରମେ ଘରୁ ବାହାରି ଆସି ପୋଲିସ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ। ଘଟଣାସ୍ଥଳେ ପୋଲିସ ଓ ଅଗ୍ନିଶମ ବାହିନୀ ପହଞ୍ଚି ସମସ୍ତଙ୍କୁ ଉଦ୍ଧାର କରିବା ସହ ନିଆଁକୁ ଆୟତ୍ତ କରିଥିଲେ। ଧ୍ରୁବଙ୍କ ନାମରେ ପୁରୀର ବିଭିନ୍ନ ଥାନାରେ ଆପରାଧିକ ମାମଲା ଥିବା ପୋଲିସ ସୂଚନା ଦେଇଛି।
