ନବରଙ୍ଗପୁର, ୧୨/୧୦ (ସଦାଶିବ ପ୍ରହରାଜ): ଏକ ବଳାତ୍କାର ମାମଲାର ବିଚାର କରି ନବରଙ୍ଗପୁର ଅତିରିକ୍ତ ଜିଲ୍ଲା ଓ ଦୌରା ଜଜ୍ ବାସୁଦେବ ଆଚାର୍ଯ୍ୟ ଅଭିଯୁକ୍ତ ଡେଭିଡ୍ ଗରଡ଼ାଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ସହ ୩୦ ହଜାର ଟଙ୍କା ଜରିମାନାରେ ଦଣ୍ଡିତ କରିଛନ୍ତି। ଜରିମାନା ଅନାଦାୟ ହେଲେ ଅଭିଯୁକ୍ତଙ୍କୁ ଅତିରିକ୍ତ ଏକ ବର୍ଷ କାରାଦଣ୍ଡ ଭୋଗିବାକୁ ପଡ଼ିବ ବୋଲି କୋର୍ଟ ରାୟ ଦେଇଛନ୍ତି। ଏଥିସହ ପୀଡ଼ିତାଙ୍କୁ ୭ ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରିବାକୁ ଜିଲ୍ଲା ଆଇନ ସେବା ପ୍ରାଧିକରଣକୁ ନିର୍ଦ୍ଦେଶ ଦେଇଛନ୍ତି।
ନବରଙ୍ଗପୁର ଥାନା ଅଞ୍ଚଳର ଜଣେ ପୀଡ଼ିତା ୩୧ ଅକ୍ଟୋବର ୨୦୨୫ରେ ଥାନାରେ ଏତଲା ଦେଇଥିଲେ। ଏତଲା ଅନୁଯାୟୀ, ଅଭିଯୁକ୍ତ ଡେଭିଡ୍ ଗରଡ଼ା ଜଣେ ମନସ୍ତତ୍ତ୍ୱବିତ୍ ଭାବେ ପୀଡ଼ିତାଙ୍କୁ ମାନସିକ ଅଶାନ୍ତିରୁ ମୁକ୍ତି ପାଇବା ନେଇ ପରାମର୍ଶ ଦେଉଥିଲେ। ସେ ପୀଡ଼ିତାଙ୍କ ବାପାଙ୍କ ପାଖରେ ସାଉଣ୍ଡ ସିଷ୍ଟମ୍ ଅପରେଟର ଭାବେ କାମ କରୁଥିବାରୁ ପ୍ରାୟତଃ ତାଙ୍କ ଘରକୁ ଯିବାଆସିବା କରୁଥିଲେ। ପୀଡ଼ିତା ଛାତ ଉପରକୁ ଯିବା ସମୟରେ ଅଭିଯୁକ୍ତ ମଧ୍ୟ ସେଠାକୁ ଯାଇ ତାଙ୍କ ସହ କଥାବାର୍ତ୍ତା କରୁଥିଲେ। ଧୀରେ ଧୀରେ ଉଭୟଙ୍କ ମଧ୍ୟରେ ନିକଟତା ବଢ଼ିଥିଲା।
ଏକଦା ଅଭିଯୁକ୍ତ ପୀଡ଼ିତାଙ୍କୁ ତାଙ୍କ ଇଚ୍ଛା ବିରୋଧରେ ଆଲିଙ୍ଗନ କରିବା ସହ ଚୁମ୍ବନ ଦେଇଥିଲେ। ପରବର୍ତ୍ତୀ ସମୟରେ, ୨୦୨୪ ମାର୍ଚ୍ଚ ମାସରେ ପୀଡ଼ିତା ଘରେ ଏକୁଟିଆ ଥିବାବେଳେ ଅଭିଯୁକ୍ତ ସେଠାକୁ ଆସି ତାଙ୍କ ଇଚ୍ଛା ବିରୋଧରେ ବଳାତ୍କାର କରିଥିଲେ। ଏ ସମ୍ପର୍କରେ କାହାକୁ ଜଣାଇଲେ ଜୀବନରେ ମାରିଦେବାକୁ ଧମକ ଦେଇଥିଲେ।
ପରେ ପୀଡ଼ିତାଙ୍କ ମାସିକ ଋତୁସ୍ରାବ ବନ୍ଦ ହୋଇଯିବାରୁ ସେ ଏ ସମ୍ପର୍କରେ ଅଭିଯୁକ୍ତଙ୍କୁ ଜଣାଇଥିଲେ। ଅଭିଯୁକ୍ତ ତାଙ୍କୁ ଏକ ଗର୍ଭଧାରଣ ପରୀକ୍ଷା କିଟ୍ ଦେଇଥିଲେ। ପୀଡ଼ିତାଙ୍କୁ ନଡ଼ିଆ ପାଣି ଓ ଅମୃତଭଣ୍ଡା ଖାଇବାକୁ ଦେବା ପରେ ତାଙ୍କର ମାସିକ ଋତୁସ୍ରାବ ପୁନର୍ବାର ହୋଇଥିବା ଏତଲାରେ ଉଲ୍ଲେଖ ରହିଛି।
ଏହାପରେ ପୀଡ଼ିତା ଉଚ୍ଚଶିକ୍ଷା ପାଇଁ ଭୁବନେଶ୍ୱର ଚାଲିଯାଇଥିଲେ ମଧ୍ୟ ଅଭିଯୁକ୍ତ ତାଙ୍କୁ ଭେଟିବା ପାଇଁ ବାଧ୍ୟ କରୁଥିଲେ। ୨୦୨୫ ସେପ୍ଟେମ୍ବର ମାସରେ ବିବାହ କଲେ ସମସ୍ତ ସମସ୍ୟାର ସମାଧାନ ହୋଇଯିବ ବୋଲି କହି ଅଭିଯୁକ୍ତ ପୀଡ଼ିତାଙ୍କଠାରୁ କିଛି କାଗଜପତ୍ରରେ ଦସ୍ତଖତ ନେଇଥିଲେ।
କିଛିଦିନ ପରେ ପୀଡ଼ିତା ତାଙ୍କ ଜେଜେବାପାଙ୍କ ଘରକୁ ଯାଇଥିବାବେଳେ ଅଭିଯୁକ୍ତ ପୀଡ଼ିତାଙ୍କ ବାପାଙ୍କୁ ଧମକ ଦେଇଥିଲେ। ଯଦି ଝିଅକୁ ତାଙ୍କ ପାଖକୁ ନ ପଠାନ୍ତି, ତେବେ ତାଙ୍କର ଫଟୋ ସୋସିଆଲ୍ ମିଡିଆରେ ଭାଇରାଲ୍ କରିଦେବେ ବୋଲି କହିଥିଲେ। ପରବର୍ତ୍ତୀ ସମୟରେ ପୀଡ଼ିତାଙ୍କ ବାପାମାଆଙ୍କ କିଛି ଫଟୋ ଇନ୍ଷ୍ଟାଗ୍ରାମ୍ରେ ପୋଷ୍ଟ କରିଥିବା ଅଭିଯୋଗ ହୋଇଥିଲା।
ଏହି ଘଟଣାର ତଦନ୍ତ କରି ପୁଲିସ ଅଭିଯୁକ୍ତ ଡେଭିଡ୍ ଗରଡ଼ାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ପରେ ପୁଲିସ କୋର୍ଟରେ ଅଭିଯୋଗପତ୍ର ଦାଖଲ କରିଥିଲା। ଟିଆର୍-୦୬/୨୫ ମାମଲାରେ ୧୮ ଜଣ ସାକ୍ଷୀଙ୍କ ବୟାନ ଓ ପ୍ରମାଣକୁ ଆଧାର କରି ବିଚାରପତି ଅଭିଯୁକ୍ତଙ୍କୁ ଦଣ୍ଡାଦେଶ ଶୁଣାଇଥିଲେ।
ସରକାରଙ୍କ ପକ୍ଷରୁ ସ୍ୱତନ୍ତ୍ର ସରକାରୀ ଓକିଲ ମୃତ୍ୟୁଞ୍ଜୟ ମହାରଣା ମାମଲା ପରିଚାଳନା କରୁଥିଲେ।
