କୁନ୍ଦୁରା,୧୨।୧୦ ସନ୍ତୋଷ ପ୍ରହରାଜ: କୋରାପୁଟ ଜିଲାର କୁନ୍ଦୁରା ବ୍ଲକରେ ଅନୁଷ୍ଠିତ ଜିଲାପାଳଙ୍କ ମିଳିତ ଜନ ଅଭିଯୋଗ ଶୁଣାଣି ଶିବିରକୁ ନେଇ ଅସନ୍ତୋଷ ଦେଖାଦେଇଛି। ନିର୍ଦ୍ଧାରିତ ସମୟରେ ଶିବିର ଆରମ୍ଭ ନ ହେବା, ଦୀର୍ଘ ସମୟ ଧରି ଲୋକଙ୍କୁ ଅପେକ୍ଷା କରିବାକୁ ପଡ଼ିବା ଏବଂ କେତେକ ଅଭିଯୋଗର ସମାଧାନ ନେଇ ଅନିଶ୍ଚିତତାକୁ ନେଇ ସାଧାରଣ ଲୋକ ଓ ଜନପ୍ରତିନିଧିଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହା ସହିତ କୁନ୍ଦୁରା ବିଡିଓଙ୍କ ବିରୋଧରେ ସାମ୍ବାଦିକଙ୍କ ପ୍ରତି ଅସମ୍ମାନ ଓ ଦୁର୍ବ୍ୟବହାର ଅଭିଯୋଗ ଆଣିଛି ସ୍ଥାନୀୟ ସାମ୍ବାଦିକ ସଂଘ।
ସୂଚନାପତ୍ର ଅନୁଯାୟୀ, ଦିନ ୧୦ଟାରେ ଶିବିର ଆରମ୍ଭ ହେବାର ଥିଲା। ମାତ୍ର ଜିଲା ପ୍ରଶାସନର ଅଧିକାରୀମାନେ ପୂର୍ବାହ୍ନ ପ୍ରାୟ ୧୧ଟା ୩୦ ପରେ ପହଞ୍ଚିଥିବା ଅଭିଯୋଗ ହୋଇଛି। ଗାଁ ଗହଳିରୁ ଶତାଧିକ ମହିଳା ଓ ପୁରୁଷ ନିଜ ନିଜ ସମସ୍ୟା ଜଣାଇବାକୁ ଆସି ଦୀର୍ଘ ସମୟ ଧରି ଅପେକ୍ଷା କରିଥିଲେ। ଉଦୁଉଦିଆ ଖରାରେ ସକାଳ ୧୦ଟାରୁ ଅପରାହ୍ନ ୩ଟା ୩୦ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିଥିଲା। ପ୍ରଶାସନର ଏପରି ମନୋଭାବକୁ କେତେକ ସାଧାରଣ ଲୋକ ଓ ଜନପ୍ରତିନିଧି ନାପସନ୍ଦ କରିଥିଲେ।
ମସିଗାଁ, ଘୁମର ଓ ଦିଗାପୁର ପଞ୍ଚାୟତରୁ ଶତାଧିକ ବୃଦ୍ଧବୃଦ୍ଧା ଭତ୍ତା ମିଳୁନଥିବା ସମସ୍ୟା ନେଇ ଅଭିଯୋଗ କରିବାକୁ ଶିବିରରେ ପହଞ୍ଚିଥିଲେ। ଅନ୍ୟପଟେ, କେରମେଟି ପଞ୍ଚାୟତ ଅନ୍ତର୍ଗତ ତୁମ୍ବାପଦର ଗ୍ରାମର ପ୍ରାୟ ୫୦ରୁ ଅଧିକ ପରିବାର ପାନୀୟ ଜଳ ସମସ୍ୟାର ସମାଧାନ ଦାବିରେ ଗରା, ହାଣ୍ଡି ଓ ମାଠିଆ ଧରି କୁନ୍ଦୁରା ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ସକାଳ ୧୦ଟାରୁ ଧାରଣାରେ ବସିଥିବା ଗ୍ରାମବାସୀଙ୍କ ସମସ୍ୟାକୁ ଅଣଦେଖା କରାଯାଇଥିବା ଅଭିଯୋଗ ହୋଇଛି। ଜିଲାପାଳ ଫେରିଯାଉଥିବା ସମୟରେ କେତେକ ସ୍ଥାନୀୟ ଜନପ୍ରତିନିଧି ତାଙ୍କୁ ଅଟକାଇ ଗ୍ରାମବାସୀଙ୍କ ସମସ୍ୟା ସମ୍ପର୍କରେ ଅବଗତ କରାଇଥିଲେ।
ଏହି ଶିବିରରେ କୋଟପାଡ଼ ବ୍ଲକରୁ ଆସିଥିବା ଶତାଧିକ ଚାଷୀ ନାରାବାଜି କରି ବନ୍ୟା କ୍ଷତିଗ୍ରସ୍ତଙ୍କୁ ଶୀଘ୍ର ସହାୟତା ରାଶି ପ୍ରଦାନ ଦାବିରେ ଦାବିପତ୍ର ଦେଇଥିଲେ। କୋରାପୁଟ କୃଷକ କଲ୍ୟାଣ ମଞ୍ଚ ପକ୍ଷରୁ ମଧ୍ୟ ଶତାଧିକ ଚାଷୀ ବନ୍ୟାରେ ହୋଇଥିବା କ୍ଷୟକ୍ଷତିର ଆକଳନ କରି ତୁରନ୍ତ ସହାୟତା ରାଶି ଯୋଗାଇଦେବାକୁ ଦାବି କରିଥିଲେ।
ଜନଶୁଣାଣି ଚାଲିଥିବା ସମୟରେ କେତେକ ବିଭାଗୀୟ ଅଧିକାରୀ ଶିବିରରୁ ବାହାରି ଚାଲିଯାଉଥିବା ଦେଖି ଉପସ୍ଥିତ ଜନପ୍ରତିନିଧି ଓ ବୁଦ୍ଧିଜୀବୀମାନେ ଅସନ୍ତୋଷ ପ୍ରକାଶ କରିଥିଲେ। ଲୋକଙ୍କ ସମସ୍ୟାର ସମାଧାନ ପାଇଁ ଆୟୋଜିତ ଜନଶୁଣାଣି ଯଦି ଏଭଳି ଢଙ୍ଗରେ ଚାଲେ, ତେବେ ଏହା କେବଳ ଏକ ପ୍ରହସନରେ ପରିଣତ ହେବ ବୋଲି ସେମାନେ କଟାକ୍ଷ କରିଥିଲେ।
ଅନ୍ୟପକ୍ଷରେ, ଜିଲାପାଳ ଶିବିରରେ ପହଞ୍ଚିବା ପରେ କୁନ୍ଦୁରା ବ୍ଲକ ସାମ୍ବାଦିକ ସଂଘ ପକ୍ଷରୁ ବିଡିଓଙ୍କ ବିରୋଧରେ ଏକ ଅଭିଯୋଗପତ୍ର ପ୍ରଦାନ କରାଯାଇଥିଲା। ସାମ୍ବାଦିକଙ୍କ ପ୍ରତି ଅସମ୍ମାନଜନକ ବ୍ୟବହାର ଓ ଦୁର୍ବ୍ୟବହାର କରାଯାଉଥିବା ସଂଘ ଅଭିଯୋଗ କରିବା ସହ ଏହାର ସମାଧାନ ଦାବି କରିଥିଲା।
କୁନ୍ଦୁରା ବିଡିଓଙ୍କ ମନମୁଖି କାର୍ଯ୍ୟ ଓ ସାମ୍ବାଦିକଙ୍କ ପ୍ରତି ଅସମ୍ମାନଜନକ ବ୍ୟବହାର ଏବଂ ଏହି ପ୍ରସଙ୍ଗରେ ଜିଲାପାଳଙ୍କ ନିରବତାକୁ ନେଇ ସାଧାରଣ ଲୋକ ଓ ସାମ୍ବାଦିକ ସଂଘ ଅସନ୍ତୋଷ ପ୍ରକାଶ କରିଛନ୍ତି। ଏକ ସପ୍ତାହ ମଧ୍ୟରେ ବିଡିଓ ସାମ୍ବାଦିକ ସଂଘ ସହ ଆଲୋଚନା କରି ସମସ୍ୟାର ସମାଧାନ ନ କଲେ, ରାଜ୍ୟ ସଂଘର ସହଯୋଗରେ ମୁଖ୍ୟମନ୍ତ୍ରୀଙ୍କୁ ଭେଟି ଅଭିଯୋଗ ଜଣାଇବାକୁ ସଂଘ ଚେତାବନୀ ଦେଇଛି।
