ପୁରୁଣା ଭୁବନେଶ୍ୱର,୨୧।୧୦(ସୁବାସ ଚନ୍ଦ୍ର ପ୍ରଧାନ): ପାର୍ବଣ ଆରମ୍ଭରୁ କମିଶନରେଟ ପୋଲିସ ପକ୍ଷରୁ ମୂର୍ତ୍ତି ବିସର୍ଜନ ପାଇଁ ଦୟା ବ୍ରିଜ ତଳେ ଅସ୍ଥାୟୀ ପୋଖରୀ ଖନନ କରାଯାଇଛି। ଏଠାରେ ପୂଜା ମଣ୍ଡପ, ଘରୋଇ ଓ ସରକାରୀ ଅନୁଷ୍ଠାନ, ବ୍ୟକ୍ତି ବିଶେଷ ମୂର୍ତ୍ତି ବିସର୍ଜନ କରିବାକୁ ଗାଇଡ୍ଲାଇନ ରହିଛି। ହେଲେ ସଚେତନତା ଅଭାବରୁ ଲୋକେ ବ୍ରିଜ ଉପରେ ଛିଡ଼ା ହୋଇ ମୂର୍ତ୍ତି ଓ ଆବର୍ଜନା ପାଣିକୁ ଫିଙ୍ଗି ଦେଉଛନ୍ତି। ଏହି ପ୍ରଦୂଷିତ ପାଣି ନୂଆଗଁା, ଲିଙ୍ଗିପୁର, ଇଟିପୁର, ଟିକରପଡ଼ା, ବସନ୍ତପୁର ଶାସନ, ଇଟିପୁର, ଶୁଆବରେଇ ବାସିନ୍ଦାଙ୍କ ପାଇଁ ବିପଦ ପାଲଟିଛି। ସ୍ଥାନୀୟ ବାସିନ୍ଦା ଦୈନନ୍ଦିନ କାର୍ଯ୍ୟରେ ବ୍ୟବହାର କରୁଛନ୍ତି। ଫଳରେ ଗ୍ରାମବାସୀ ବିଭିନ୍ନ ସଂକ୍ରମଣ ରୋଗରେ ପଡ଼ିବା ନଜିର ରହିଛି। ଅନ୍ୟପଟେ ଅସ୍ଥାୟୀ ପୋଖରୀରେ ଗାର୍ବେଜ ନ ଥିବାରୁ ପୋଖରୀରେ ଦୂଷିତ ପାଣି ନିର୍ଗତ ହୋଇ ନଦୀ ଜଳରେ ମିଶୁଛି। ଦୟା ବ୍ରିଜ ସନ୍ନିକଟ ଅନେକ ଘାଟ, ତୁଠରେ ତିଳତର୍ପଣ ଅନ୍ତ୍ୟେଷ୍ଟି କ୍ରିୟା କାର୍ଯ୍ୟ କରାଯାଉଛି। ଫଳରେ ସେଠାରେ ଜମା ହୋଇଥିବା ଆବର୍ଜନା ନଦୀରେ ମିଶି ପାଣିକୁ ଦୂଷିତ କରୁଛି। ସଚେତନତା ଅଭାବ, ପରିବେଶ ପରିଷ୍କାର ନ ରଖିଲେ ଆଗାମୀ ଦିନରେ ଭୟାବହ ପରିସ୍ଥିତି ସୃଷ୍ଟି ହେବ। ତୁରନ୍ତ କମିଶନରେଟ ପୋଲିସ ପକ୍ଷରୁ କାର୍ଯ୍ୟାନୁଷ୍ଠାନ ପାଇଁ ଅଞ୍ଚଳବାସୀ ଦାବି କରିଛନ୍ତି। ଖୁବ୍ଶୀଘ୍ର ଏହି ଘଟଣା ପ୍ରତି ଦୃଷ୍ଟି ଦିଆଯିବ ବୋଲି ଧଉଳି ଥାନା ଆଇଆଇସି କହିଛନ୍ତି। ସେହିପରି କଳିଙ୍ଗ ଐତିହ୍ୟ ସୁରକ୍ଷା ମଞ୍ଚ ଅଧ୍ୟକ୍ଷ ସଂଗ୍ରାମ କେଶରୀ ପାଇକରାୟ କହିଛନ୍ତି, ନଦୀରେ ଆବର୍ଜନା ନ ପକାଇବା ପାଇଁ ସଚେତନତା ବାର୍ତ୍ତା ବ୍ରିଜରେ ଲେଖାଯାଇଥିଲା। ତଟବର୍ତ୍ତି ବାସିନ୍ଦାଙ୍କୁ ସଚେତନ କରାଯିବା ସହ ପ୍ରଦୂଷଣ ବୋର୍ଡ ପକ୍ଷରୁ ଲୋକଙ୍କ ପାଇଁ କଟକଣା ବାର୍ତ୍ତା ରହିବା ଆବଶ୍ୟକ। ଆଞ୍ଚଳିକ ବିକାଶ ପରିଷଦ ସଭାପତି ବୃନ୍ଦାବନ ସାହୁ କହିଛନ୍ତି, ଅସ୍ଥାୟୀ ପୋଖରୀ ଖୋଲିଦେଇ ପୋଲିସ ନିଜ ଦାୟିତ୍ୱ ସାରିଦେଉଛି। ଲୋକଙ୍କୁ ସଚେତନ କରାଯିବା ସହ ବ୍ରିଜର ଉଭୟ ପଟେ ସୂଚନା ଏବଂ ସତର୍କତା ସମ୍ବନ୍ଧୀୟ ବୋର୍ଡ ଲଗାଯିବ ଉଚିତ।
