ମୁମ୍ବାଇ: ଆଧ୍ୟାତ୍ମିକ ଗୁରୁ ନୀମ କରୋଲି ବାବାଙ୍କ ଜୀବନ ଏବଂ ଶିକ୍ଷା ଉପରେ ଆଧାରିତ ଫିଲ୍ମ ‘ହନୁମାନ ଅଂଶ’ ବକ୍ସ ଅଫିସରେ ୧୫୦ କୋଟିରୁ ଅଧିକ ଟଙ୍କା ଆୟ କରିଛି। ଟ୍ରେଡ୍ ଟ୍ରାକିଂ ଓ୍ବେବସାଇଟ୍ ସାକନିଲ୍କ ଅନୁଯାୟୀ, ଘରୋଇ ବକ୍ସ ଅଫିସରେ ଫିଲ୍ମଟି ୧୫୬.୬୩କୋଟି ଆୟ କରିଛି। ମାତ୍ର ୨କୋଟି ଟଙ୍କା ବଜେଟରେ ନିର୍ମିତ ଚଳଚ୍ଚିତ୍ର ‘ହନୁମାନ ଅଂଶ’ ଏହାର ୫ମ ସପ୍ତାହାନ୍ତରେ ରଣବୀର ସିଂଙ୍କ ବ୍ଲକବଷ୍ଟର ଫିଲ୍ମ ‘ଧୁରନ୍ଧର’ ଏବଂ ‘ଧୁରନ୍ଧର ୨’ କଲେକ୍ସନକୁ ପଛରେ ପକାଇ ଏକ ନୂତନ ରେକର୍ଡ ସୃଷ୍ଟି କରିଛି। ୫ମ ସପ୍ତାହର ଶୁକ୍ରବାର, ଶନିବାର ଏବଂ ରବିବାର ମଧ୍ୟରେ ‘ହନୁମାନ ଅଂଶ’ ମୋଟ ୪୯.୨୫ କୋଟି ଟଙ୍କା ନେଟ୍ କଲେକ୍ସନ କରିଛି, ଯାହାକି ‘ଧୁରନ୍ଧର ୨’ର ୧୨.୫୫ କୋଟି ଟଙ୍କାର ପ୍ରାୟ ୪ଗୁଣ। ଫିଲ୍ଟଟି ଅଗଷ୍ଟ ୭ରେ ମୁକ୍ତିଲାଭ କରିଥିଲା।
ଏହା ମୂଳ ଫିଲ୍ମ ‘ଧୁରନ୍ଧର’ର କଲେକ୍ସନ ୩୩.୨୫ କୋଟି ଟଙ୍କାର ରେକର୍ଡକୁ ମଧ୍ୟ ଅତିକ୍ରମ କରିଛି। ସବୁଠାରୁ ବଡ଼ କଥା ହେଲା, ଏହି ଛୋଟ ବଜେଟ ଫିଲ୍ମର ୫ମ ସପ୍ତାହାନ୍ତରେ ଆୟ ଉଭୟ ଧୁରନ୍ଧର ଫିଲ୍ମର ମିଳିତ କଲେକ୍ସନ ଠାରୁ ମଧ୍ୟ ଅଧିକ ରହିଛି। ରବିବାର ଏହି ଫିଲ୍ମ ୨୨.୭୫ କୋଟି ଟଙ୍କା ଆୟ କରିଛି। ବିଶାଳ ଚତୁର୍ବେଦୀ ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି। ମା’ଙ୍କ ମୃତ୍ୟୁ ପରେ ଭଗବାନଙ୍କ ସନ୍ଧାନରେ ଏକ ଆଧ୍ୟାମତ୍କ ଯାତ୍ରା ଆରମ୍ଭ କରିଥିବା ଲକ୍ଷ୍ମୀନାରାୟଣ ନାମକ ଜଣେ ଦୁଃଖୀ ଯୁବକଙ୍କ କାହାଣୀ ଉପରେ ଏହା ପର୍ଯ୍ୟବେସିତ। ଉତ୍ତର ଭାରତ ଭ୍ରମଣ ସମୟରେ ଶେଷରେ ଜଣେ ସନ୍ଥ ନୀମ କରୋଲି ବାବା ଭାବେ ପରିଣତ ହୁଅନ୍ତି। ଏଥିରେ ଶୋଭିନାଥ ସତ୍ୟ ମୁଖ୍ୟ ଭୂମିକାରେ ଅଭିନୟ କରିଥିବାବେଳେ ବିହାନ୍ ସେଜ୍, ଚନ୍ଦନ କେ ଆନନ୍ଦ, ପୂର୍ଣ୍ଣିମା ତିଓ୍ବାରୀ, ଅନିଲ ରସ୍ତୋଗୀ ପ୍ରମୁଖ ଅଭିନୟ କରିଛନ୍ତି।
