ଭଞ୍ଜନଗର,୨୯ା୧୦(ଡି.ଏନ.ଏ.): ଭଞ୍ଜନଗର ଉତ୍ତା ଓ ଦକ୍ଷିଣ ବନଖଣ୍ଡର ହାତୀ କରିଡ଼ରଗୁଡ଼ିକ ବିଭିନ୍ନ କାରଣ ଯୋଗୁ ନଷ୍ଟ ହେବାକୁ ବସିଛି। ଏହି କାରଣରୁ ହତୀପଲ ଜଙ୍ଗଲରୁ ବାହାରି ନିକଟବର୍ତ୍ତୀ ଅଞ୍ଚଳରେ ଫସଲ କ୍ଷତି କରୁଛନ୍ତି। ବିଶେଷକରି ଜମିରେ ପଶି ଧାନ ଫସଲ ନଷ୍ଟ କରିଦେଉଛନ୍ତି। ଅନ୍ୟପକ୍ଷରେ ବନ ବିଭାଗ କେତେକ ସ୍ଥାନରେ ହାତୀପଲକୁ ଜଙ୍ଗଲକୁ ଘଉଡ଼ାଇବାରେ ବିଫଳ ହେଉଛି । କିଛିଦିନ ହେବ ତାରସିଂ ରେଞ୍ଜର ତିନିଛକିଆ ନିକଟ ଜଙ୍ଗଲରେ ରହୁଥିବା ୧୮ଟି ହାତୀ ଫସଲ କ୍ଷତି କରୁଛନ୍ତି। ଶୁକ୍ରବାର ସକାଳେ ହାତୀପଲ ଗୋଟିଏ ଜଙ୍ଗଲରୁ ବାହାରି ଅନ୍ୟ ଜଙ୍ଗଲକୁ ତିନିଛକିଆଠାରେ ରାସ୍ତା ପାର ହେଉଥିଲେ। ଏଥିଲାଗି କିଛି ସମୟ ପାଇଁ ଭଞ୍ଜନଗର-ଦଶପଲ୍ଲା ମୁଖ୍ୟ ରାସ୍ତାରେ ଯାନବାହନ ଚଳାଚଳ ବ୍ୟାହତ ହୋଇଥିଲା । ଅପରପକ୍ଷେ ତାରସିଂ ରେଞ୍ଜର ଜଣେ କର୍ମଚାରୀ ବନାଞ୍ଚଳରେ କାର୍ଯ୍ୟ ଚାପ ବଢ଼ୁଥିବା ଦର୍ଶାଇ ଏଠାରୁ ଅନ୍ୟତ୍ର ବଦଳି ହୋଇ ଯିବାପାଇଁ ୨ମାସ ପୂର୍ବେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଛନ୍ତି । କିନ୍ତୁ ତାଙ୍କର ବଦଳି ହୋଇନାହିଁ । ତାରସିଂ ରେଞ୍ଜରେ ଜଙ୍ଗଲ ଓ ବନ୍ୟପ୍ରାଣୀ ସୁରକ୍ଷା କରିବାକୁ ହେଲେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟିଦେଇ ଆବଶ୍ୟକ ପଦକ୍ଷେପ ନେବାର ଆବଶ୍ୟକତା ରହିଛି । ଏ ନେଇ ରେଞ୍ଜର ତାରାକାନ୍ତଙ୍କ ସହ ଯୋଗାଯୋଗ କରିବାରୁ, ରେଞ୍ଜରେ କାର୍ଯ୍ୟ ଚାପ ବଢ଼ୁଥିବା ଘଟଣାକୁ ସେ ସ୍ବୀକାର କରିଛନ୍ତି। ତେଣୁ ୨ମାସ ପୂର୍ବେ ବ୍ରହ୍ମପୁର ଅଫିସକୁ ବଦଳି କରିଦେବା ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଅନୁରୋଧ କରିଛି। ବର୍ତ୍ତମାନ ଏଠାରେ କାର୍ଯ୍ୟରତ ଥିବା ଯୋଗୁ ଯଥାସମ୍ଭବ ଜଙ୍ଗଲ ଓ ବନ୍ୟପ୍ରାଣୀ ସୁରକ୍ଷା ପ୍ରତି ଦୃଷ୍ଟିଦେଉଛି ବୋଲି ଉଦ୍ଗାତା କହିଛନ୍ତି । ତାରସିଂ ରେଞ୍ଜ ଗରୁଡ଼ପଥରର ଚାଷୀ ଚଗଲା ଦିଗାଲ କହିଛନ୍ତି, ଦିନ ବେଳେ ପାତି ମାଙ୍ଗଡ଼ ଆତଙ୍କ, ରାତି ହେଲେ ହାତୀ, ବାରାହା ଆତଙ୍କ । ତେଣୁ ଫସଲ ସୁରକ୍ଷା ପାଇଁ ଦିନରାତି ପଡ଼ିରହୁଛୁ। ବନ ବିଭାଗ ଫସଲ ସୁରକ୍ଷା ପ୍ରତି ଯେତିକି ଦୃଷ୍ଟି ଦେବାକଥା ଦେଉନାହିଁ । ବନ୍ୟପ୍ରାଣୀ ଘଉଡ଼ାଇବା ପାଇଁ ଚାଷୀ ବାଣ ମାଗିଲେ ମିଳୁ ନ ଥିବାରୁ ଚଗଲା କ୍ଷୋଭ ପ୍ରକାଶ କରିଛନ୍ତି । ଶୁକ୍ରବାର ସୁଦ୍ଧା ଉତ୍ତର ଘୁମୁସର ବନଖଣ୍ଡର ତାରସିଂ ରେଞ୍ଜରେ ୪୩ଟି ହାତୀ ଥିବାବେଳେ ଗାଲେରି ରେଞ୍ଜରେ ୩ଟି ଏବଂ ଜଗନ୍ନାଥପ୍ରସାଦ ରେଞ୍ଜରେ ୧୩ଟି ହାତୀ ଅଛନ୍ତି।
