ନୟାଗଡ଼ ଅଫିସ,୩୧।୩: ଖୋର୍ଦ୍ଧା-ବଲାଙ୍ଗୀର ରେଳପଥରେ ପରୀକ୍ଷାମୂଳକ ଭାବେ ବିଦ୍ୟୁତ୍ ଟ୍ରେନ ଚଳାଚଳ କରିଛି। ମଙ୍ଗଳବାର ପୂର୍ବାହ୍ନ ୯ଟାରେ ଖୋର୍ଦ୍ଧା ରୋଡ଼(ଜଟଣୀ)ରୁ ବାହାରିଥିବା ଏହି ଟ୍ରେନ ନୟାଗଡ଼ରେ ମଧ୍ୟାହ୍ନ ୧୨ଟା ୧୫ରେ ପହଞ୍ଚିଥିଲା। ପରେ ସେହି ଟ୍ରେନ ୧୨.୪୫ଟାରେ ନୟାଗଡ଼ ଟାଉନ ଷ୍ଟେଶନ ଛାଡିଥିଲା। ଖୋର୍ଦ୍ଧା ରୋଡ଼ରୁ ନୟାଗଡ଼ ଷ୍ଟେଶନର ଦୂରତା ୬୫ କିମି। ଇତିମଧ୍ୟରେ ସେହି ରେଳପଥରେ ବିଦ୍ୟୁତ୍କରଣ କାର୍ଯ୍ୟଶେଷ ହୋଇଛି। ସୋମବାର ପରୀକ୍ଷାମୂଳକଭାବେ ରେଳଇଞ୍ଜିନ ଚାଲିଥିଲା। ବିଦ୍ୟୁତ୍କରଣ କାର୍ଯ୍ୟର ତଦାରଖ ପାଇଁ ମଙ୍ଗଳବାର ପୂର୍ବତଟ ରେଳପଥ ମୁଖ୍ୟ ନିରାପତ୍ତା କମିଶନ ଏ.ଏମ୍ ଚୌଧୁରୀଙ୍କ ନେତୃତ୍ୱରେ ଏକ ଟିମ୍ ଆସିଥିଲା। କମିଶନଙ୍କ ଚୂଡ଼ାନ୍ତ ରିପୋର୍ଟ ଆଧାରରେ ଆସନ୍ତା ୧୩ରୁ ବିଦ୍ୟୁତ୍ଚାଳିତ ଏକ ସ୍ବତନ୍ତ୍ର ଟ୍ରେନ(ସେବା ଏକ୍ସପ୍ରେସ) ଭୁବନେଶ୍ୱର-ନୟାଗଡ଼ ମଧ୍ୟରେ ଚଳାଚଳ କରିବ ବୋଲି ବିଭାଗୀୟ ଅଧିକାରୀମାନେ କହିଛନ୍ତି ା କୋଭିଡ୍ କଟକଣା ଯୋଗୁ ନୟାଗଡ଼କୁ ରେଳ ଚଳାଚଳ କରୁନାହିଁ। ଯଦି ବିଦ୍ୟୁତ୍ ଚାଳିତ ରେଳ ଚଳାଚଳରେ କିଛି ଅସୁବିଧା ହୁଏ, ୧୩ରୁ ଡିଜେଲ ଟ୍ରେନ ଚାଲିବ ବୋଲି ସୂଚନା ଦିଆଯାଇଛି।
ନୟାଗଡ଼ ରେଳ ଷ୍ଟେଶନରେ ବିଦ୍ୟୁତକରଣ କାମ ଶେଷ ହୋଇଥିବାରୁ ନୟାଗଡ଼ରୁ ଅଧିକ ସଂଖ୍ୟକ ଟ୍ରେନ ଚଳାଚଳର ଆବଶ୍ୟକତା ରହିଛି। ଏନେଇ ଭାରତ ବିକାଶ ପରିଷଦ, ନୟାଗଡ଼ ଶାଖା ପକ୍ଷରୁ ଏକ ଦାବିପତ୍ର ପୂର୍ବତଟ ରେଳପଥର ଆଞ୍ଚଳିକ ମହାପ୍ରବନ୍ଧକଙ୍କ ଉଦ୍ଦେଶ୍ୟରେ ଖୋର୍ଦ୍ଧାରୋଡ଼ ଡିଭିଜନ ମ୍ୟାନେଜର ଏସ୍.କେ. ସିଂଙ୍କୁ ପ୍ରଦାନ କରାଯାଇଛି।
