ବଣାଇ/ଟେନ୍ସା,୧୧ା୭(ଡି.ଏନ୍.ଏ.): ସୁନ୍ଦରଗଡ଼ ଜିଲା କୋଇଡ଼ା ଥାନା ଅନ୍ତର୍ଗତ ବନ୍ଦଲ ଗ୍ରାମରେ ଶନିବାର ରାତିରେ ଏକ ହତ୍ୟାକାଣ୍ଡ ଘଟିଛି। ଦୁଇ ସାନ ଭାଇ, ସାନଭାଇଙ୍କ ସ୍ତ୍ରୀ ମିଶି ବଡ଼ ଭାଇଙ୍କୁ ବାଡ଼ିରେ ପିଟି ପିଟି ନୃଶଂସ ଭାବେ ହତ୍ୟା କରିଛନ୍ତି। ଖବର ପାଇ କୋଇଡ଼ା ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତଙ୍କୁ ଗିରଫ କରି ତଦନ୍ତ ଚଳାଇଛି । ଖବର ଅନୁଯାୟୀ ବନ୍ଦଲ ଗ୍ରାମରେ ପତ୍ରାସ ମୁଣ୍ଡା ଓ ତିନି ସାନ ଭାଇର ହସଖୁସିର ସଂସାର। ସାନ ଭାଇ ସମା ମୁଣ୍ଡା କାହାକୁ କିଛି ନ କହି ଅନ୍ୟ ଏକ ଜାତିର ଝିଅଙ୍କୁ ବାହା ହୋଇ ଘରକୁ ନେଇ ଆସିଥିଲେ। ବଡ଼ ଭାଇ ଏହାକୁ ବିରୋଧ କରିବାରୁ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ରାଗି ଯାଇ ସାନ ଭାଇ ସମା ମୁଣ୍ଡା,ବିରିକାର ମୁଣ୍ଡା, ସମା ନୂଆ କରି ଆଣି ଥିବା ଝିଅ ଯାତ୍ରୀ ମୁଣ୍ଡା ତିନି ଜଣ ମିଶି ପାତ୍ରସ ମୁଣ୍ଡାଙ୍କୁ ବାଡ଼ିରେ ପିଟି ପିଟି ହତ୍ୟା କରି ଫେରାର ହୋଇଯାଇଥିଲେ। ଅନ୍ୟ ଜଣେ ସାନ ଭାଇ ରବେଟେ ମୁଣ୍ଡା ଘରକୁ ଆସି ବଡ଼ ଭାଇଙ୍କ ଏପରି ଅବସ୍ଥା ଦେଖି କୋଇଡା ପୋଲିସକୁ ଖବର ଦେଇଥିଲେ। କୋଇଡା ଆଇଆଇସି ଲୋକେଶ୍ବର ସାହୁ, ଏସ୍ଆଇ ମନୋହର ପ୍ରଧାନଙ୍କ ସମେତ ଏକ ଟିମ୍ ଘଟଣାସ୍ଥଳରେ ପହଞ୍ଚି ରକ୍ତ ଜୁଡୁ ଜୁଡୁ ଅବସ୍ଥାରେ ମୃତଦେହ ଜବତ କରିଛନ୍ତି। ଫେରାର ଥିବା ୩ ଅଭିଯୁକ୍ତଙ୍କୁ ରବିବାର ଗିରଫ କରି ଏକ ହତ୍ୟା ମାମଲା ରୁଜୁ କରି ତଦନ୍ତ ଚଳାଉ ଥିବାର ଜଣାପଡ଼ିଛି।
