ପୁରୀ,୧୨ା୧୦(ଅଜିତ୍ କୁମାର ମହାନ୍ତି): ପବିତ୍ର ଶାରଦୀୟ ଦୁର୍ଗାପୂଜା ଅବସରରେ ଶୁକ୍ରବାର ମହାପ୍ରଭୁ ଶ୍ରୀଜଗନ୍ନାଥ ଏବଂ ମା’ ବିମଳାଙ୍କ ଦର୍ଶନ ପାଇଁ ଶ୍ରୀମନ୍ଦିରରେ ଭକ୍ତଙ୍କ ପ୍ରବଳ ଭିଡ଼ ହୋଇଥିଲା। ତେବେ ଶ୍ରୀମନ୍ଦିର ଦ୍ୱାରଫିଟାରେ ବିଳମ୍ବ ଯୋଗୁ ୧୦ରୁ ଊର୍ଦ୍ଧ୍ୱ ଭକ୍ତ ଅଣନିଃଶ୍ୱାସୀ ହୋଇ ଅଚେତ ହୋଇପଡ଼ିଥିଲେ। ସେମାନଙ୍କୁ ଉଦ୍ଧାର କରାଯାଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଏହି ଘଟଣା ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁଯାୟୀ, ଗୁରୁବାର ଶ୍ରୀମନ୍ଦିରରେ ମା’ ବିମଳାଙ୍କ ମହାଷ୍ଟମୀ ନୀତି ରହିଥିଲା। ତେଣୁ ମହାପ୍ରଭୁଙ୍କ ରାତ୍ର ପହୁଡ଼ ରାତି ୧୨ଟାରେ ଅନୁଷ୍ଠିତ ହୋଇଥିଲା। ପହୁଡ଼ ନୀତି ସମ୍ପନ୍ନ ହେବା ପରେ ମା’ ବିମଳାଙ୍କ ମହାଷ୍ଟମୀର ଗୁପ୍ତ ନୀତି ଆରମ୍ଭ ହୋଇଥିଲା। ରାତି ୧ଟା ୫୦ରେ ମଇଲମ ନୀତି ପରେ ଅନ୍ୟାନ୍ୟ ନୀତି ସହ ଦେବୀଙ୍କ ମାଜଣା ବେଶ କରାଯାଇଥିଲା। ଶୁକ୍ରବାର ସକାଳ ୬ଟା ୫ରେ ଶଙ୍ଖୁଡ଼ି ଭୋଗ ଏବଂ ଅନ୍ୟାନ୍ୟ ନୀତି ସରିବା ପରେ ୭ଟା ୩୦ରେ ମା’ ବିମଳାଙ୍କ ରାତ୍ର ପହୁଡ଼ ସମ୍ପନ୍ନ ହୋଇଥିଲା। ଫଳରେ ନିର୍ଦ୍ଧାରିତ ସମୟର ବହୁ ବିଳମ୍ବରେ ଅର୍ଥାତ ଶୁକ୍ରବାର ସକାଳ ୮ଟା ୫୫ରେ ଶ୍ରୀମନ୍ଦିର ଦ୍ୱାର ଫିଟିଥିଲା। ପରେ ଦାରୁଦିଅଁଙ୍କ ନୀତି ଆରମ୍ଭ ହୋଇଥିଲା। ତେବେ ଶ୍ରୀବିଗ୍ରହମାନଙ୍କ ଦର୍ଶନ ନିମନ୍ତେ ସହସ୍ରାଧିକ ଭକ୍ତ ଭୋରୁ ଧାଡ଼ିରେ ଅପେକ୍ଷା କରି ରହିଥିଲେ। ଦୀର୍ଘ ସମୟ ଧରି ଖରାରେ ଧାଡ଼ିରେ ଛିଡ଼ା ହୋଇ ରହିବାରୁ ଅନେକ ଭକ୍ତ ଭିଡ଼ ସାଙ୍ଗକୁ ଗରମ ଓ ଗୁଳୁଗୁଳିରେ ଅଣନିଃଶ୍ୱାସୀ ହୋଇ ଅଚେତ ହୋଇପଡ଼ିଥିଲେ। ଏହାକୁ ନେଇ ସେଠାରେ ଭକ୍ତଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ଅଚେତ ହୋଇପଡ଼ିଥିବା ୧୦ରୁ ଊର୍ଦ୍ଧ୍ୱ ଭକ୍ତଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ଅନ୍ୟପକ୍ଷରେ କିଛିଦିନ ହେଲା ପ୍ରବଳ ଗରମ ଓ ଗୁଳୁଗୁଳି ହେଉଥିଲେ ମଧ୍ୟ ପ୍ରଶାସନ ପକ୍ଷରୁ ଭକ୍ତଙ୍କ ସୁବିଧା ନିମନ୍ତେ ସେପରି କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ତେଣୁ ଉକ୍ତ ଘଟଣା ପାଇଁ ଭକ୍ତମାନେ ପ୍ରଶାସନର ଅବ୍ୟବସ୍ଥାକୁ ଦାୟୀ କରିଛନ୍ତି। ପ୍ରଶାସନ ପକ୍ଷରୁ ଏସି ଶେଡ୍କୁ ଭାଙ୍ଗିଦିଆଯାଇଥିଲେ ମଧ୍ୟ ବିକଳ୍ପ ବ୍ୟବସ୍ଥା ହୋଇପାରିନାହିଁ। ଶେଡ୍ ନିର୍ମାଣ ଅସମ୍ପୂର୍ଣ୍ଣ ରହିଥିବାବେଳେ ପାଣି ବ୍ୟବସ୍ଥା ନାହିଁ। ଫଳରେ ଭକ୍ତମାନେ ସମସ୍ୟା ଭୋଗୁଛନ୍ତି। ଆଗକୁ କାର୍ତ୍ତିକ ମାସ ଆସୁଛି। ପ୍ରଶାସନ ଏବେଠାରୁ ପଦକ୍ଷେପ ନ ନେଲେ ହବିଷିଆଳି ଏବଂ ଅନ୍ୟ ଭକ୍ତମାନେ ହଇରାଣ ହେବେ। ତେଣୁ ତୁରନ୍ତ ଏ ଦିଗରେ ପଦକ୍ଷେପ ନିଆଯିବାକୁ ସାଧାରଣରେ ଦାବି ହେଉଛି। ମା’ ବିମଳାଙ୍କ ଗୁପ୍ତନୀତି ଯୋଗୁ ବିଳମ୍ବରେ ଦ୍ୱାରଫିଟା ହୋଇଥିଲା ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି। ସମସ୍ତ ସେବାୟତଙ୍କ ସହାୟତାରେ ନୀତି ଶୃଙ୍ଖଳିତ କରାଯିବା ସହ ଭକ୍ତଙ୍କ ପାଇଁ ସୁବିଧା ଓ ସହଜ ଦର୍ଶନ ବ୍ୟବସ୍ଥା ଲାଗି ପଦକ୍ଷେପ ନିଆଯାଉଛି ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ କୁହାଯାଇଛି।
