ଚମ୍ପୁଆ,୫ା୧୨(ଡି.ଏନ.ଏ.) – ବାତ୍ୟା ‘ଜୱାଦ’ର ମୁକାବିଲାପାଇଁ ଚମ୍ପୁଆ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିବା ଉପଜିଲାପାଳ ପ୍ରତାପ ପ୍ରିତିମୟ ସୂଚନା ଦେଇଛନ୍ତି। ଦକ୍ଷିଣ ଆଣ୍ଡାମାନ ସାଗରରେ ଲଘୁଚାପ କ୍ରମଶଃ ଘନୀଭୂତ ହୋଇ ବାତ୍ୟାର ରୂପ ନେଇଥିବା ବେଳେ ଏହାର ଦିଗ ପରିବର୍ତ୍ତନର ସମ୍ବାବନା ରହିଛି। ଏହାକୁ ଆଖି ଆଗରେ ରଖି ଏସ୍ଆରସି ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି। ବାତ୍ୟା ପାଇଁ ରବିବାର ସାପ୍ତାହିକ ଛୁଟି ବାତିଲ କରାଯାଇଛି। ବିଶେଷ ଭାବରେ ବର୍ତ୍ତମାନ କୃଷିଜିଲା ଚମ୍ପୁଆରେ ଧାନ ଅମଳ ସମୟ ହୋଇଥିବା ବେଳେ ଚମ୍ପୁଆ କୃଷି ବିଭାଗ ପକ୍ଷରୁ ପଦକ୍ଷେପ ସରୁପ ଗାଁ ଗାଁରେ ସଚେତନତା ରଥ ପରିକ୍ରମା କରି ଡାକବାଜି ଯନ୍ତ୍ର ସାହାଯ୍ୟରେ କଟାଧାନକୁ ସୁରକ୍ଷିତ ସ୍ଥାନକୁ ନେଇଯିବା ସହିତ ରବି ଫସଲର ଜଳ ନିଷ୍କାସନ ବ୍ୟବସ୍ଥାକରିବା ଏବଂ ତୁରନ୍ତ ଧାନ କାଟିନେବାକୁ ସୂଚନା ଦିଆଯାଇଛି। ଏଥି ପାଇଁ କୃଷି ବୈଷୟିକ ପରିଚାଳନା ପକ୍ଷରୁ ନିର୍ଦ୍ଦେଶ ମିଳିଥିବା ବେଳେ କୃଷିଜିଲା ଅଧିକାରୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସହକାରୀ କୃଷି ଅଧିକାରୀ ମାନେ ରାଜସ୍ବ ନିରୀକ୍ଷକ, ଭିଏଡବ୍ଲ୍ୟୁଙ୍କ ସହ ଗାଁ ଗାଁରେ ବୁଲି ଚାଷୀଙ୍କୁ ସଚେତନ କରିଛନ୍ତି। କୃଷିଜିଲା ଚମ୍ପୁଆରେ ୧୦ ରୁ ୧୨ ପ୍ରତିଶତ ଧାନ କଟାଯାଇନଥିବା ବିଭାଗ ସୂଚନା ଦେଇଥିବା ବେଳେ ଚାଷ ଯେପରି କୌଣସି କ୍ଷତି ନ ଘଟେ ସେଥିପ୍ରତି ବିଭାଗ ନଜର ରଖିଛି ବୋଲି କୃଷିଜିଲା ଅଧିକାରୀ ମନୋରଞ୍ଜନ ମଣ୍ଡଳ ସୂଚନା ଦେଇଛନ୍ତି।
