ବଇଣ୍ଡା,୬ା୩ – କାହାର ମାଟି କାନ୍ଥ ଭାଙ୍ଗିଯାଇଛି ତ ଆଉ କାହାର ଭଗ୍ନ ଚାଳ ଛପର କେଇଖଣ୍ଡ ବାଉଁଶ ଢିରାରେ ତିଷ୍ଠି ରହିଛି। ଏପରି ବିପଦସଙ୍କୁଳ ଅବସ୍ଥାରେ ପରିବାର ଧରି ରହୁଥିବା ଅନେକ ଅସହାୟ, ଗରିବ ଲୋକ ସରକାରଙ୍କ ପକ୍କା ଘର ଯୋଜନାକୁ ବର୍ଷ ବର୍ଷ ଧରି ଚାହିଁ ରହିଛନ୍ତି। ବାରମ୍ବାର ପଲ୍ଲିସଭା, ଗ୍ରାମସଭାରେ ଆବେଦନ କରୁଛନ୍ତି। ପଞ୍ଚାୟତ ଓ ବ୍ଲକ ପ୍ରଶାସନକୁ କାକୁତିମିନତି ହେଉଛନ୍ତି। ହେଲେ ସରକାରୀ ତାଲିକାରେ ନାମ ଚଢ଼ୁନି କି ପକ୍କା ଘର ପାଇଁ ସେମାନଙ୍କ ସଂଘର୍ଷ ଶେଷ ହେଉନି। ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡରେ ସରକାରଙ୍କ ପକ୍କା ଘର ଯୋଜନାରେ ଠିକ୍ ଏପରି ଚିତ୍ର ଦେଖିବାକୁ ମିଳୁଛି।
ଆଠମଲ୍ଲିକ ବ୍ଲକର କୁରୁମଟାପ, ପେଡ଼ିପଥର, ସାନହୁଲା ଓ କିଶୋରନଗର ବ୍ଲକର ନୁନୁକାପଶି, ଗାଁବଇଣ୍ଡା, ଲୁହାମୁଣ୍ଡା, ହଣ୍ଡପା, କଣ୍ଟେଇକୁଳିଆ ପଞ୍ଚାୟତର ବହୁ ଗରିବ ଶ୍ରେଣୀର ଲୋକଙ୍କୁ ସରକାରଙ୍କ ପକ୍କାଘର ଯୋଜନାରେ ସାମିଲ କରାଯାଇ ନାହିଁ। କୁରୁମଟାପ ପଞ୍ଚାୟତ ଗୁଣ୍ଡୁରୀଖଳି ଗ୍ରାମର ପ୍ରବୀଣ କୁମାର ସାହୁ, ପ୍ରତାପ ଚନ୍ଦ୍ର ସାହୁ, ବୀରବର ନାୟକ, ଜିତେନ୍ଦ୍ର ସାହୁ, ରାଧା ବେହେରା, ପ୍ରକାଶ ପ୍ରଧାନ, ଅବଳା ପ୍ରଧାନ, କାଞ୍ଚନ ବେହେରା, ମନମୋହନ ପ୍ରଧାନ, ଅଜୟ କୁମାର ସାହୁ, ପେଡ଼ିପଥର ପଞ୍ଚାୟତ ବରହ୍ମ ଗ୍ରାମର ସୁଷମା ଭୋଇ, ସାନହୁଲା ପଞ୍ଚାୟତ ମିଣ୍ଡୋଳ ଗ୍ରାମର ଶମ୍ଭୁ ନାୟକ, କେତେକୀ ନାୟକ ଦୀର୍ଘଦିନ ହେଲା ଅପେକ୍ଷା କରିଥିଲେ ମଧ୍ୟ ସେମାନଙ୍କ ନାମ ସରକାରୀ ତାଲିକାରେ ଆସୁନାହିଁ। ସେହିପରି କିଶୋରନଗର ବ୍ଲକ ନୁନୁକାପଶି ପଞ୍ଚାୟତ ମା’ ମଙ୍ଗଳା ସାହିର ଦୁର୍ଯ୍ୟୋଧନ ମୁଣ୍ଡା, ଶାଳବଣି ସାହିର ସରସ୍ବତୀ ପ୍ରଧାନ, ବୈଷ୍ଣବ ସାହିର ଧ୍ରୁବଚରଣ ପ୍ରଧାନ, ଗାଁ ବଇଣ୍ଡା ପଞ୍ଚାୟତ ବଡ଼ହୁଲା ଗ୍ରାମର ନବୀନ ନାୟକ, ବିଲେଇନାଳୀ ପଞ୍ଚାୟତ ବିଲେଇନାଳୀ ଗ୍ରାମର ଭାନୁ ଦେହୁରୀ, ଲୁହାମୁଣ୍ଡା ପଞ୍ଚାୟତ କ୍ଷେତ୍ରପାଳ ଗ୍ରାମର ଅନନ୍ତ ବେହେରା, ପ୍ରତାପ ଭୋଇ, ଜୟରାମ ନାହାକ, ବିଜୟ ନାହାକ, କାଳିଆ ବେହେରା, କଣ୍ଟେଇକୁଳିଆ ପଞ୍ଚାୟତ କଣ୍ଟେଇକୁଳିଆ ଗ୍ରାମର ସୁଦାମ ଦେହୁରୀ, ଶଙ୍କର ଗୋଚ୍ଛାୟତ, ସୁଲୋଚନା ବେହେରା, ଅଁଳାବେରେଣୀ ଗ୍ରାମର ବାବୁଲି ଦେହୁରୀ, ବିକାଶ ଦେହୁରୀ, କାଳିଆ ଷଣ୍ଢ, ଲକ୍ଷ୍ମଣ ପରିଚ୍ଛା, ଇଚ୍ଛାପୁର ଗ୍ରାମର ପୃଥିବୀ ରଞ୍ଜନ ବେହେରା, ଚିତ୍ର ଦେହୁରୀ, ଗଣେଶ୍ୱର ଦେହୁରୀ, ବାଲିଆମ୍ବର କୁଡ଼ା ଦେହୁରୀ, କୁଶ ମାହାର ସରକାରଙ୍କ ପକ୍କା ଘର ଯୋଜନାରୁ ବଞ୍ଚିତ ରହିଛନ୍ତି। ଦୀର୍ଘ ୫ ବର୍ଷ ହେବ ଏମାନେ ବାରମ୍ବାର ପଲ୍ଲିସଭା, ଗ୍ରାମସଭା, ପଞ୍ଚାୟତ ଓ ବ୍ଲକ ଅଫିସରେ ଆବେଦନ କରୁଥିଲେ ମଧ୍ୟ ବିଜୁ ପକ୍କାଘର କିମ୍ବା ପ୍ରଧାନମନ୍ତ୍ରୀ ଆବାସ ଯୋଜନାରେ ନାମ ପଞ୍ଜୀକରଣ କରାଯାଉ ନାହିଁ। ତେବେ କେତେଜଣ କୋଠାଘର ଥିବା ଲୋକ ପଛରେ ଆବେଦନ କରି ଏହି ସରକାରୀ ଯୋଜନାରେ ଉପକୃତ ହୋଇଥିବାରୁ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେବାକୁ ଦାବି ହେଉଛି।
ପ୍ରକୃତ ହିତାଧିକାରୀଙ୍କୁ ଚିହ୍ନଟ କରାଯାଉନି
ପଲ୍ଲିସଭା ଓ ଗ୍ରାମସଭା ମାଧ୍ୟମରେ ପ୍ରକୃତ ହିତାଧିକାରୀଙ୍କୁ ଚିହ୍ନଟ କରାଯାଉନି। ଫଳରେ ଭଙ୍ଗା କୁଡ଼ିଆରେ ରହୁଥିବା ବହୁ ଗରିବ ଶ୍ରେଣୀର ଲୋକେ ସରକାରୀ ଯୋଜନାରେ ସୁବିଧା ପାଇପାରୁ ନାହାନ୍ତି। ତୁରନ୍ତ ଏ ନେଇ ବ୍ୟବସ୍ଥା କରାଯିବା ଉଚିତ।
-ମନୋଜ କୁମାର ମହାପାତ୍ର, ସାମାଜିକ କର୍ମୀ, ବଣିନାଳୀ
ଚଞ୍ଚକତା କରି ଥିଲାବାଲା ହାତଉଛନ୍ତି
ବହୁ ଗରିବ ହିତାଧିକାରୀଙ୍କୁ ପକ୍କା ଘର ଖଣ୍ଡିଏ ପାଇଁ ବର୍ଷ ବର୍ଷ ଧରି ଅପେକ୍ଷା କରୁଥିବା ବେଳେ ପଛରେ ଆବେଦନ କରି ଥିଲାବାଲାମାନେ କୌଶଳକ୍ରମେ ଯୋଜନାରେ ସାମିଲ ହୋଇଯାଉଛନ୍ତି। ଏପରି ଦୁର୍ନୀତିକୁ ରୋକାଗଲେ ପ୍ରକୃତ ଲାଭ ମିଳିପାରନ୍ତା।
– ଅମାତ ସାହୁ, ପୂର୍ବତନ ସରପଞ୍ଚ, କଣ୍ଟେଇକୁଳିଆ
ପ୍ରଶାସନ ଅବହେଳା କରୁଛି
ବିଭିନ୍ନ ଗ୍ରାମରେ ବହୁ ଯୋଗ୍ୟ ଲୋକ ଅଛନ୍ତି। ସେମାନେ ଦୀର୍ଘଦିନ ତଳୁ ଆବେଦନ ମଧ୍ୟ କରିଛନ୍ତି। କିନ୍ତୁ ପ୍ରଶାସନ ସେମାନଙ୍କ ଆବେଦନକୁ ଗ୍ରହଣ କରୁନି କି ପ୍ରକୃତ ହିତାଧିକାରୀ ଭାବେ ତାଲିକାଭୁକ୍ତ କରୁନି। ଏ ଦିଗରେ ଚରମ ଅବହେଳା କରାଯାଉଛି।
-ଅରୁଣ କୁମାର ସାହୁ, ଗୁଣ୍ଡୁରୀଖଳି
ତାଲିକା ଆସିଲେ ପଦକ୍ଷେପ ନିଆଯିବ
ପଞ୍ଚାୟତରେ ଆବେଦନ କରୁଥିବା ଲୋକଙ୍କୁ ବ୍ଲକ ପ୍ରଶାସନ ନିକଟକୁ ପଠାଇ ଦିଆଯାଉଛି। ସରକାରଙ୍କ ଚିହ୍ନଟ ପ୍ରକ୍ରିୟା ଶେଷ ହୋଇ ତାଲିକା ବାହାରିଲେ ସେହି ଅନୁଯାୟୀ ହିତାଧିକାରୀଙ୍କୁ ଘର ଯୋଗାଇ ଦିଆଯିବାକୁ ପଦକ୍ଷେପ ନିଆଯିବ।
– ଜଳଧର ସାହୁ, ସରପଞ୍ଚ, ନୁନୁକାପଶି
ହିତାଧିକାରୀ ଚିହ୍ନଟ ପରେ ମିଳିବ
୨୦୧୫ ମସିହାରେ ଚିହ୍ନଟ ହୋଇଥିବା ହିତାଧିକାରୀଙ୍କୁ ଘର ଯୋଗାଇ ଦିଆଯାଉଛି। ନୂଆ ତାଲିକା ପାଇଁ ହିତାଧିକାରୀ ଚିହ୍ନଟ କରାଯାଉଥିବାରୁ ତାହାକୁ ମଞ୍ଜୁରୀ ମିଳିଲେ ବଞ୍ଚିତ ଲୋକେ ଉପକୃତ ହେବେ। ବ୍ଲକ ପ୍ରଶାସନ ପକ୍ଷରୁ ଏ ନେଇ ପଦକ୍ଷେପ ନିଆଯାଉଛି।
– ସଞ୍ଜୟ ଆଚାର୍ଯ୍ୟ, ବିଡିଓ, ଆଠମଲ୍ଲିକ
