କେନ୍ଦୁଝର, ୧୬।୫(ସ୍ବ.ପ୍ର.): ‘୫-ଟି’ ବ୍ୟବସ୍ଥାରେ ବଦଳୁଛି ବିଦ୍ୟାଳୟ। ଚିକିମିକିଆ ସ୍ମାର୍ଟ କ୍ଲାସ୍ ରୁମ୍ର ଚିନ୍ତାମୁକ୍ତ ବାତାବରଣରେ ପାଠ ପଢୁଛନ୍ତି ପିଲା। ଏହାକୁ ନେଇ ରାଜ୍ୟ ସରକାର ସାଉଁଟୁଛନ୍ତି ପ୍ରଶଂସା। ଶିକ୍ଷା ଭିତ୍ତିଭୂମିର ଏଭଳି ପରିବର୍ତ୍ତନକୁ ସ୍ବାଗତ କରୁଛନ୍ତି ବୁଦ୍ଧିଜୀବୀ। ତେବେ ଖଣି ସମୃଦ୍ଧ କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ହୁଣ୍ଡା ପଞ୍ଚାୟତ ଅନ୍ତର୍ଗତ ଉପାନ୍ତ ଖଜୁରିବାଣୀ ଆଶ୍ରମ ବିଦ୍ୟାଳୟରେ ଦେଖିବାକୁ ମିଳିଛି ଏହାର ବିପରୀତ ଚିତ୍ର। ବିଦ୍ୟାଳୟରେ ଜଳସଙ୍କଟ ଉତ୍କଟ ରୂପ ଧାରଣ କରିଥିବାବେଳେ ପିଲାମାନେ ସ୍ନାନଶୌଚାଦି କାର୍ଯ୍ୟ ପାଇଁ ବିପଦପୂର୍ଣ୍ଣ ଜଙ୍ଗଲ ପରିବେଶରେ ଥିବା ନାଳକୁ ଯାଉଛନ୍ତି। ପ୍ରଥମରୁ ଶିକ୍ଷକ ମରୁଡ଼ି ସମସ୍ୟାରେ ଶିକ୍ଷାନୁଷ୍ଠାନରେ ଶିକ୍ଷାଦାନ ବାଧାପ୍ରାପ୍ତ ହେଉଥିବା ବେଳେ ଏବେ ଜଳ ପାଇଁ ପିଲାଏ ଜଙ୍ଗଲମୁହାଁ ହେବା ଅଭିଭାବକଙ୍କୁ ଚିନ୍ତାରେ ପକାଇଦେଇଛି।
ଅନୁସୂଚିତ ଜାତି ଓ ଜନଜାତି ବିଭାଗ ପରିଚାଳନାରେ ଥିବା ଏହି ସ୍କୁଲରେ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ୩୫୦ ଆଦିବାସୀ ପିଲା ହଷ୍ଟେଲରେ ରହି ପଢୁଛନ୍ତି। ତନ୍ମଧ୍ୟରେ ୧୦୦ ଜଣ ବାଳିକା। ତେବେ ଗୋଟିଏ ପାର୍ଶ୍ୱରେ ପାଚେରି ନ ଥିବାରୁ ସ୍କୁଲ ପରିସର ଖୋଲା ରହିଛି। ଏଣୁ ବନ୍ୟଜନ୍ତୁ, ସରୀସୃପ ଭୟ ରହୁଛି। ବାଳକମାନଙ୍କ ପାଇଁ ଥିବା ଏକମାତ୍ର ନଳକୂପ ଅଚଳ ରହିଥିବାରୁ
ନାଳ ଉପରେ ପିଲାମାନେ ନିର୍ଭର କରୁଛନ୍ତି। ପିଲାମାନେ ଏକୁଟିଆ ନାଳକୁ ଯାଇ ମଇଳା ଆବର୍ଜନା ପାଣିରେ ଶୌଚ ହେଉଥିବା ଅଭିଯୋଗ ହେଉଛି। ଏଣୁ ସବୁ ସମୟରେ ବିପଦ ରହୁଥିଲେ ହେଁ ଏହାର ସମାଧାନ କରାଯାଉନାହିଁ। ସେହିପରି ସୋଲାର ପମ୍ପ ଖରାପ ହୋଇଯାଇଥିବାରୁ ପିଇବା ପାଣି ସମସ୍ୟା ଦେଖାଦେଉଛି। ୮ଟି ଶ୍ରେଣୀ ପାଇଁ ପ୍ରଧାନଶିକ୍ଷକଙ୍କୁ ମିଶାଇ ୩ଜଣ ଶିକ୍ଷକ ଓ ୨ଜଣ ଶିକ୍ଷୟିତ୍ରୀ ନିଯୁକ୍ତି ପାଇଛନ୍ତି। କିନ୍ତୁ ଅଧିକାଂଶ ଶିକ୍ଷକ ପାଳି କରି ଅନୁପସ୍ଥିତ ରହୁଥିବା ଏବଂ ଖୋଦ ପ୍ରଧାନ ଶିକ୍ଷକ ମଧ୍ୟ ଅନେକ ସମୟରେ କେନ୍ଦୁଝରରେ ଯାଇ ରହୁଥିବାରୁ ପାଠପଢା ଓ ପରିଚାଳନାରେ ସମସ୍ୟା ଦେଖାଦେଉଛି ବୋଲି ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଶିକ୍ଷକମାନଙ୍କ ପାଇଁ କ୍ୱାର୍ଟର୍ସ ନାହିଁ। ଡାଇନିଙ୍ଗ ହଲ ନାହିଁ। ସେହିପରି ଦିନ ସାରା ୪ ଥର ପିଲା ପଖାଳ ଖାଉଥିବା କହୁଥିବା ବେଳେ ଖାଦ୍ୟର ମାନ ନିୟମିତ ଯାଞ୍ଚ କରାଯାଉ ନ ଥିବା ଅଭିଯୋଗ ହେଉଛି। ସମସ୍ୟା ଦେଖିବା ଓ ସମାଧାନ ପାଇଁ ମଧ୍ୟ ବିଭାଗୀୟ ଅଧିକାରୀମାନେ ନିୟମିତ ଗସ୍ତ କରୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ପୂର୍ଣ୍ଣଚନ୍ଦ୍ର ବେହେରା ନାମକ ଜଣେ ବରିଷ୍ଠ ବ୍ୟକ୍ତି କହିଛନ୍ତି, ସ୍କୁଲରେ ବହୁ ସମସ୍ୟା ରହିଛି। ଶିକ୍ଷକ ଅଭାବ ସାଙ୍ଗକୁ ଅନୁପସ୍ଥିତି ଯୋଗୁ ପାଠପଢାରେ ସମସ୍ୟା ଉପୁଜୁଛି। ଏନେଇ ଜଣାଇଲେ ମଧ୍ୟ କେହି ଶୁଣୁନାହନ୍ତି। ଏଣୁ ଗ୍ରାମବାସୀ ଏକଜୁଟ ହୋଇ ଆନ୍ଦୋଳନ କରିବାକୁ ନିଷ୍ପତ୍ତି ନେଇଛନ୍ତି।
ଏ ସମ୍ପର୍କରେ ପ୍ରଧାନଶିକ୍ଷକ ଲକ୍ଷ୍ମୀଧର ସାହୁଙ୍କୁ ପଚାରିବାରୁ ପାଣି ସମସ୍ୟା ଯୋଗୁ ପିଲାମାନେ ବାହାରକୁ ଶୌଚ ପାଇଁ ଯାଉଛନ୍ତି। ଶିକ୍ଷକ ଅଭାବ ସହିତ ଅନ୍ୟାନ୍ୟ ସମସ୍ୟା ରହିଛି। ତୁରନ୍ତ ସମାଧାନ କରିବାକୁ ବିଭାଗକୁ ଜଣାଇ ଦିଆଯାଇଛି ବୋଲି କହିଛନ୍ତି।
