ପାଟଣା,୨୫ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ବଡ଼ପାଟଣା ପଞ୍ଚାୟତ ମାଧପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଶନିବାର ଉତ୍ତେଜନା ଲାଗିରହିଛି।
ସୂଚନାଯୋଗ୍ୟ, ବିଦ୍ୟାଳୟ ପରିସରରେ ଚାଲିଥିବା ୪୦ ସଂଖ୍ୟକ ବିଶିଷ୍ଟ ଛାତ୍ରୀ-ଛାତ୍ରାବାସ ଭିତରକୁ ଶୁକ୍ରବାର ରାତ୍ରିରେ ଜଣେ ବିବାହିତ ଯୁବକ ପଶି ଜଣେ ୫ମ ଶ୍ରେଣୀ ଛାତ୍ରୀଙ୍କୁ ଟଣାଓଟରା କରିବା ସହ ଅସଦାଚରଣ କରିବା ପରେ ଅଭିଭାବକ ଓ ସ୍ଥାନୀୟ ଲୋକେ ସ୍କୁଲ ଗେଟ୍ରେ ଶୁକ୍ରବାର ରାତ୍ରିରୁ ତାଲା ମାରିଥିଲେ। ଶନିବାର ସକାଳୁ ଛାତ୍ରୀ ଛାତ୍ରଙ୍କ ପରୀକ୍ଷା ଥିବାରୁ ଗେଟ୍ ଚାବି ଖୋଲିଥିଲେ ହେଁ ଶତାଧିକ ମହିଳା ପୁରୁଷ ସ୍କୁଲ ଗେଟ୍ ଓ ଭିତରେ ସମ୍ପୃକ୍ତ ଯୁବକଙ୍କ ନାଁରେ ଏତେଲା ଦେବା ସହ ରୋଷେଇ କରୁଥିବା ଯୁବକଙ୍କ ମା’ଙ୍କୁ ରୋଷେଇଆରୁ ବାହାର କରିବା ଦାବିରେ ଅଟଳ ରହିଛନ୍ତି। ଏଣେ ବିଦ୍ୟାଳୟ ହଷ୍ଟେଲରେ ଚାଲିଥିବା ଅବ୍ୟବସ୍ଥା ଯୋଗୁ କେତେକ ଛାତ୍ରୀଛାତ୍ରଙ୍କ ଅଭିଭାବକ ପିଲାଙ୍କୁ ନେଇଯିବାକୁ ବାହାରିଛନ୍ତି। ଦିନ ୧ଟା ପର୍ଯ୍ୟନ୍ତ ସ୍କୁଲ ପରିସରରେ ଉତ୍ତେଜନା ଲାଗିରହିଛି। ବଡ଼ପାଟଣା ସରପଞ୍ଚ ବନତି ବାନରା, ପୂର୍ବତନ ସରପଞ୍ଚ ସୋମବାରି ମୁଣ୍ଡା, ଚନ୍ଦ୍ରଶେଖର ନାଏକ, ଚାର୍ଜରେ ଥିବା ପ୍ରଧାନଶିକ୍ଷକ ଯଶୋବନ୍ତ ମହାନ୍ତଙ୍କ ଉପସ୍ଥିତିରେ ସମାଧାନ ସହ ସ୍କୁଲ ସ୍ବାଭାବିକ କରିବାକୁ ବୈଠକ ଚାଲିଛି। ଖବର ଲେଖାଯିବା ପର୍ଯ୍ୟନ୍ତ କୌଣସି ସମାଧାନ ହୋଇ ପାରି ନାହିଁ।
