କେନ୍ଦୁଝର, ୯।୫ (ସ୍ବ.ପ୍ର.): କେନ୍ଦୁଝର ଜିଲାରେ ଉପଯୁକ୍ତ ତଦାରଖ ଅଭାବରୁ ବିନା ଇନସ୍ୟୁରାନ୍ସ ଓ ଫିଟ୍ନେସ୍ରେ ଯାତ୍ରୀବାହୀ ବସ୍ ଚାଲିଛି। ଜିଲା ମୁଖ୍ୟାଳୟ ଦେଇ ଏହି ସବୁ ବସ୍ ବେଧଡକ ଚଳାଚଳ କରୁଥିଲେ ହେଁ ଧରପଗଡ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। କାୈଣସି ଅଘଟଣ ବା ଦୁର୍ଘଟଣା ଘଟିଲେ ଯାତ୍ରୀ ମାନେ କିପରି କ୍ଷୟକ୍ଷତି ପାଇବେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଯେ କେନ୍ଦୁଝର ଜିଲାରେ ଓ ଜିଲା ଦେଇ ବହୁ ସଂଖ୍ୟାରେ ଘରୋଇ ବସ ଚଳାଚଳ କରୁଛି। ତେବେ କେତେକ ବସ ବିନା ଫିଟନେସ ଓ ଇନସ୍ୟୁରାନ୍ସ ପ୍ରମାଣ ପତ୍ରରେ ବସ ଚଳାଚଳ କରୁଥିବାରୁ ଯାତ୍ରୀଙ୍କ ଧନଜୀବନ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଆଗାମୀ ଦିନରେ ଦୁର୍ଘଟଣା ଘଟିଲେ ପ୍ରଶାସନ ଦାୟୀ ରହିବେ ବୋଲି ଅନେକ ମତବ୍ୟକ୍ତ କରୁଛନ୍ତି। ସୂଚନାଯୋଗ୍ୟ, ଜିଲାରେ ବିଭିନ୍ନ ସ୍ଥାନକୁ ଠିକ ଭଡା ନିର୍ଦ୍ଧାରଣ କରାଯାଇ ବିଭିନ୍ନ ବସ ଷ୍ଟାଣ୍ଡ ଓ ଷ୍ଟପ ମାନଙ୍କରେ କିଲୋମିଟର ଓ ଭଡ଼ା ମୂଲ୍ୟ ପ୍ରଦର୍ଶନ କରାଯାଉ ନ ଥିବାରୁ ଯାତ୍ରୀମାନେ ଠକେଇର ଶିକାର ହେଉଛନ୍ତି। ଏହାକୁ ନେଇ ଅନେକ ସମୟରେ ବସ କର୍ମଚାରୀ ଓ ଯାତ୍ରୀଙ୍କ ମଧ୍ୟରେ ବିବାଦ ଦେଖାଦେଇଥାଏ। ଅନେକ ସମୟରେ ମାରପିଟ ଭଳି ପରିସ୍ଥିତି ଉପୁଜିଥାଏ। ସେହିପରି ଯୋଡ଼ା/ବଡବିଲ ତଥା ଚମ୍ପୁଆ ଅଂଚଳରୁ ଆସୁଥିବା କେତେକ ବସ୍ ଗୁଡିକ ରାତିରେ କେନ୍ଦୁଝର ସହରକୁ ନ ଆସି ବାଲିଆଗୁଡାରୁ ବାଇପାସ ଦେଇ କଟକ/ଭୁବନେଶ୍ୱର ଯାଉଛନ୍ତି। ଫଳରେ କେନ୍ଦୁଝର ଯାତ୍ରୀ ମାନଙ୍କ ରାତିରେ ବାଲିଆଗୁଡା ନିକଟରେ ନିଛାଟିଆ ସ୍ଥାନରେ ଛାଡି ଚାଲିଯାଉଥିବା ଅଭିଯୋଗ ହେଉଛି। ସେହିପରି ବିନା ପରମିଟ ରେ କେତେକ ବସ ଟୋଲ ଫାଙ୍କିବା ସହ ତେଲ ବାବଦକୁ ପଇସା ବଞ୍ଚାଇବାକୁ ଘଟଗାଁ ଦେଇ ନ ଯାଇ ହରିଚନ୍ଦନପୁର ରାସ୍ତାରେ ଯିବା ଆସିବା କରୁଛନ୍ତି। ଏସମ୍ପର୍କରେ ଆଞ୍ଚଳିକ ପରିବହନ ଅଧିକାରୀ ନିର୍ମଳ ମହାନ୍ତିଙ୍କୁ ପଚାରିବାରୁ ଯାତ୍ରୀମାନଙ୍କ ସୁରକ୍ଷାକୁ ପ୍ରାଧାନ୍ୟ ଦିଆଯାଉଛି। ଏଣୁ ବିନା ପରମିଟ, ଇନସ୍ୟୁରାନ୍ସ ଓ ଫିଟନେସରେ ଗାଡି ଚଳାଚଳ କରୁଥିଲେ ଧରପଗଡ଼ କରାଯିବ ବୋଲି ସେ କହିଛନ୍ତି।
