ପାରାଦୀପ,୯ା୫(ଶରତ ରାଉତ): ପାରାଦୀପ ସାମୁଦ୍ରିକ ଥାନା ପୋଲିସ ଶନିବାର ଏକ ଚୋରା ତେଲ ଡଙ୍ଗା ଜବତ କରିଛି। ଉକ୍ତ ଡଙ୍ଗାରେ ପ୍ରାୟ ୫ ହଜାରରୁ ଅଧିକ ଲିଟର ହାଇସ୍ପିଡ ଡିଜେଲ ଜବତ କରାଯାଇଛି। ଏଥିରେ ଜଡ଼ିତ ଜଣେ ଆନ୍ଧ୍ରପ୍ରଦେଶ ନାଗରିକଙ୍କୁ ଅଟକ ରଖି ତଦନ୍ତ ଆରମ୍ଭ କରିଛି। ଘଟଣା ସମ୍ପର୍କରେ ପାରାଦୀପ ଏଏସ୍ପି କହିଥିଲେ, ଉକ୍ତ ଡଙ୍ଗା ପଣ୍ୟବାହୀ ଜାହାଜରୁ ତେଲ ନେଇ ମହାନଦୀରେ ପ୍ରବେଶ କରିବା ବେଳେ ବିଶେଷ ସୂତ୍ରରୁ ସୂଚନା ପାଇ ମେରାଇନ ପୋଲିସ ପାଟ୍ରୋଲିଂ ବୋଟ୍ ଓ ପୋଲିସ ଡଙ୍ଗାକୁ ଧରିଥିଲା। ଏହି ସମୟରେ ଜଣେ ଡଙ୍ଗାରୁ ଡେଇଁ ଫେରାର ହୋଇଯାଇଥିଲେ। ଏହି ଚୋରା କାରବାର ସମ୍ପର୍କରେ ତଦନ୍ତ ଆରମ୍ଭ ହୋଇଛି। ଡଙ୍ଗାରେ ୭ ଟି ତେଲ ଖଣି(ପ୍ୟାନେଲ ଅଛି। ସେଥିରୁ ୩ଟି ପ୍ୟାନେଲରେ ତେଲ ବୋଝେଇ ଅଛି। ଯାହା ୫ ହଜାର ଲିଟରରୁ ଅଧିକ ହେବ। ଉକ୍ତ ତେଲକୁ ବାହାର କରିବା ପରେ ପ୍ରକୃତ କେତେ ଲିଟର ଜଣାପଡ଼ିବ।
ସୂଚନାଯୋଗ୍ୟ ଏବେ ଏପ୍ରିଲ ୧୪ରୁ ଜୁନ ୧୫ ପର୍ଯ୍ୟନ୍ତ ଦୁଇମାସ ମାଛଧରା ଉପରେ କଟକଣା ଜାରି କରାଯାଇଛି। ଏହି ସମୟରେ ମାଛ ଧରିବା ଭଳି ସମୁଦ୍ରରେ ଯାଇ ଜାହାଜରୁ ତେଲ ସଂଗ୍ରହ କରି ବିକିବା ପଛରେ ଆନ୍ତଃ ରାଜ୍ୟ ରାକେଟ କାମ କରୁଛି। ଏପରି କାରବାର କରୁଥିବା ମୂଳ ଲୋକ ଆନ୍ଧ୍ରପ୍ରଦେଶ ନାଗରିକ ଓ ସେ ପାରାଦୀପ ଷଣ୍ଢକୁଦରେ ରହୁଛନ୍ତି ବୋଲି ଏଏସ୍ପି କହିଥିଲେ। ପାରାଦୀପରେ ଏପରି ତେଲ କାରବାର ନିତିଦିନିଆ ଘଟଣା। ୨୦୦୯ ପରଠାରୁ ଏପର୍ଯ୍ୟନ୍ତ ୬ ଥର ଏପରି ଚୋରା ତେଲଡଙ୍ଗା ଜବତ ହୋଇଛି। ଏହି କାରବାର ପଛରେ ଶାସକ ପ୍ରଶାସକଙ୍କ ପ୍ରଚ୍ଛନ୍ନ ହାତଥିବା ଆଲୋଚନା ହେଉଛି।
