ଆରଡ଼ି,୧୧।୨(ଡି.ଏନ.ଏ.) ଭଦ୍ରକ ଜିଲା ଚାନ୍ଦବାଲି ନିର୍ବାଚନମଣ୍ଡଳୀ ଅଧୀନ ୧ ନଂ. ଜିଲା ପରିଷଦ ଜୋନ୍ରେ ଏଥର ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେଉଛି। ଏଥର ସାଧାରଣ ବର୍ଗର ପ୍ରାର୍ଥୀମାନେ ଏଠାରେ ନିର୍ବାଚନ ଲଢୁଛନ୍ତି। ୫ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିଲେ ବି ମୁଖ୍ୟତଃ ବିଜେଡି, ଭାଜପା ଓ କଂଗ୍ରେସ ପ୍ରାର୍ଥୀଙ୍କୁ ନେଇ ତ୍ରିମୁଖୀ ଲଢ଼େଇ ହେବା ସ୍ପଷ୍ଟ ହୋଇଛି।
୮ ପଞ୍ଚାୟତକୁ ନେଇ ଏହି ଜୋନ୍ ଗଠିତ। ଆରଡ଼ି, ନାନ୍ଦପୁର, ସୁନ୍ଦରପୁର, ଓଳଗ, ଭୂଇଁବୃତି, ମାଧପୁର, ଘଟପୁର ଓ ଖେରଙ୍ଗ ପଞ୍ଚାୟତ ଏହି ଜୋନ୍ରେ ଅନ୍ତର୍ଭୁକ୍ତ। ବିଜେଡି ରାଜ୍ୟ ଛାତ୍ର ସମ୍ପାଦକ ପ୍ରିନ୍ସ ରାକେଶ ନାୟକଙ୍କୁ ଏଠାରେ ପ୍ରାର୍ଥୀ କରିଥିବା ବେଳେ ଭାଜପା ଜିଲା ଉପସଭାପତି ସୁରେଶ ସାହୁ ଓ କଂଗ୍ରେସ ଦଳର ପୁରୁଣା ସଙ୍ଗଠକ ନିମାଇଁ ଚରଣ ଦାସଙ୍କୁ ଛିଡ଼ା କରାଇଛି। ଏହି ଜିଲା ପରିଷଦ ଜୋନ୍ ଚାନ୍ଦବାଲିର ଏକ ସମ୍ବେଦନଶୀଳ ଜୋନ୍ କହିଲେ ଚଳେ। ନଦୀ ନାଳ ଘେରା ଏହି ଜୋନ୍ରେ ବିକାଶର ଆବଶ୍ୟକତା ରହିଥିବା ବେଳେ ଏଠାରୁ ପୂର୍ବତନ ମନ୍ତ୍ରୀ ମନମୋହନ ସାମଲଙ୍କ ସମୟରେ ସୁରେଶ ସାହୁ ନିର୍ବାଚିତ ହୋଇଥିଲେ। ପୂର୍ବତନ ବିଧାୟକ ବିଜୟ ନାୟକଙ୍କ ସମୟରେ ତାଙ୍କ ସାନଭାଇ ଅଜୟ ନାୟକ ଏଠାରୁ ବିକାଶର ଦ୍ୱାହି ଦେଇ ନିର୍ବାଚନ ଜିତିଥିଲେ। ବିଜେଡି ଏଠାରୁ ୩ଥର ଲଗାତର ଜିତି ସାରିଥିବା ବେଳେ ଚତୁର୍ଥଥର ପାଇଁ ଜିତିବାକୁ ସମସ୍ତ ରଣକୌଶଳ ଆପଣାଇଛି। ବିଧାୟକ ବ୍ୟୋମକେଶ ରାୟଙ୍କ ଏକାନ୍ତ ଅନୁଗତ ଭାବେ ପରିଚିତ ପ୍ରିନ୍ସ ରାକେଶ ଜୋନ୍ ଅନ୍ତର୍ଗତ ସମସ୍ତ ପଞ୍ଚାୟତରେ ବିଜେଡି ଯୋଗୁ ବିକାଶ ସମ୍ଭବ ହୋଇଛି, ରାସ୍ତାଘାଟ ନିର୍ମାଣ ସହ ବିଜୁଳି, ପାଣି ସମସ୍ୟାର ସମାଧାନ ହୋଇଥିବା କଥା କହିବା ସହ ଆଗାମୀ ୫ ବର୍ଷରେ ଜୋନ୍ର ଦ୍ରୁତ ପ୍ରଗତି ହେବ ବୋଲି ଭୋଟରଙ୍କୁ ପ୍ରତିଶ୍ରୁତି ଦେଉଛନ୍ତି।
ଅନ୍ୟପକ୍ଷେ ଭାଜପା ପ୍ରାର୍ଥୀ ସୁରେଶ ସାଳନ୍ଦୀ ନଦୀ ଉପରେ ଧାନଖଣିଆ ଓ ତିନିତର ସେତୁ ମୁଖ୍ୟମନ୍ତ୍ରୀଙ୍କ ଶିଳାନ୍ୟାସ ସତ୍ତ୍ୱେ ହୋଇ ନ ପାରିବା ଅତ୍ୟନ୍ତ ଦୁଃଖଦାୟକ ବୋଲି କହିବା ସହ ଏହି ଜୋନ୍ରେ ସେମିତି କିଛି ଆଖିଦୃଶିଆ ପ୍ରଗତି ହୋଇ ନ ଥିବା କହୁଛନ୍ତି। ସେ ଜିତିଥିବା ସମୟରେ କଉଡ଼ିଆ ପୋଲ ଓ ବିଭିନ୍ନ ଗଁାରେ ନାଳ, ଯୋର ଉପରେ ପୋଲ କରିଥିବା କହିଛନ୍ତି। ଏପଟେ କଂଗ୍ରେସ ପ୍ରାର୍ଥୀ ନିମାଇଁ ଉଭୟ ବିଜେଡି ଓ ଭାଜପା ଉପରେ ବର୍ଷିଛନ୍ତି। ଉଭୟ ଦଳ ଦୁର୍ନୀତି ଓ ଭ୍ରଷ୍ଟାଚାରରେ ବୁଡ଼ିରହି ଲୋକଙ୍କୁ ମିଛ ବିକାଶରେ ଭୁଅଁା ବୁଲାଉଥିବା କହିଛନ୍ତି। ଚଳିତ ନିର୍ବାଚନରେ ତାଙ୍କ ଉପରେ ଲୋକେ ଆସ୍ଥା ପ୍ରକଟ କରିଥିବା ଜୋର୍ ଦେଇ କହୁଛନ୍ତି। ପ୍ରକାଶ ଥାଉକି, ୨୦୧୭ ନିର୍ବାଚନରେ ଏହି ଜୋନ୍ରୁ ବିଜେଡି ପ୍ରାର୍ଥୀ ୧୨ ହଜାର ୧୯୭ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ଭାଜପା ପ୍ରାର୍ଥୀ ୧୧,୧୮୧ ଖଣ୍ଡ ଭୋଟ ପାଇ ଦ୍ୱିତୀୟ ଓ କଂଗ୍ରେସ ପ୍ରାର୍ଥୀ ପାଖାପାଖି ୩ ହଜାର ଭୋଟ ପାଇ ତୃତୀୟ ସ୍ଥାନରେ ରହିଥିଲେ।
