ଆର.ଉଦୟଗିରି,୧୫।୫(ଡି.ଏନ୍.ଏ.) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗାଁରୁ ଗାଁକୁ ବିଜୁ ଗାଁ ଗାଡି ଯୋଜନା ପ୍ରଣୟନ କଲେ। ଉଦ୍ଦେଶ୍ୟ ଥିଲା ଗାଁର ଗରିବ ଆଦିବାସୀମାନେ ବିଭିନ୍ନ କାମଧନ୍ଦାରେ ବାହାରକୁ କମ୍ ଖର୍ଚ୍ଚରେ ଯିବାଆସିବା କରିପାରିବେ। କିନ୍ତୁ ଗଜପତି ଜିଲା ଆର.ଉଦୟଗିରି ବ୍ଲକରେ ଏହି ଯୋଜନାରେ ଦିଆଯାଇଥିବା ଗାଡି ଟାଣିଲେ ଆଗକୁ ଗଡୁନି ଓ ଠେଲିଲେ ଚକାଜାମ ହୋଇଯାଉଛି। କାରଣ ଆର.ଉଦୟଗିରି ବ୍ଲକ ଏକ ଆଦିବାସୀ ବହୁଳ ପାହାଡ଼ିଆ ଦୁର୍ଗମ ଅଞ୍ଚଳ। ଏହି ଅଞ୍ଚଳରେ ବାସ କରୁଥିବା ଗରିବ ଜନସାଧାରଣଙ୍କ ଯାତାୟାତ ନିମନ୍ତେ କୌଣସି ସୁବିଧା ନଥିବା ଯୋଗୁ ରାଜ୍ୟ ସରକାରଙ୍କ ଆଦିବାସୀ ମଙ୍ଗଳ ବିଭାଗ ସହାୟତାରେ ଗତ କିଛି ବର୍ଷ ପୂର୍ବେ ଗଜପତି ଜିଲାର ଆର.ଉଦୟଗିରି, ମୋହନା ଓ ନୂଆଗଡ଼ ବ୍ଲକରେ ବାସ କରୁଥିବା ଲୋକଙ୍କ ସୁବିଧା ନିମନ୍ତେ ପ୍ରତି ପଞ୍ଚାୟତରୁ ବସ ସେବା ଆରମ୍ଭ କଲେ। କିନ୍ତୁ ଏହାର ପରିଚାଳନା ଦାୟିତ୍ୱ ଦେଲେ ଆଦିବାସୀ ମହିଳା ସ୍ବୟଂ ସହାୟକ ଦଳକୁ, ଯେଉଁ ମହିଳାମାନଙ୍କୁ ଲେଖିପଢ଼ି ଜଣାନାହିଁ କି ଗାଡ଼ି ରକ୍ଷଣାବେକ୍ଷଣ ବିଷୟରେ ଜ୍ଞାନ ନାହିଁ। ପ୍ରଶାସନ ମଧ୍ୟ ଏହା କିଭଳି ରକ୍ଷଣାବେକ୍ଷଣ ହେବ ତାରି ଉପରେ ସେମାନଙ୍କୁ ତାଲିମ ଦେଲାନାହିଁ। ଫଳରେ ଏହି ଆଦିବାସୀ ମହିଳାଙ୍କ ନଁାରେ କିଛି ଦଲାଲ ଗାଡ଼ି ଭଲ ଚାଲିବା ସମୟରେ ବ୍ୟବହାର କଲେ ଓ ଯେଉଁ ସମୟରେ ଗାଡିର ରକ୍ଷଣାବେକ୍ଷଣ ଦରକାର ପଡିଲା, ସେହି ଦିନରୁ ଦଲାଲମାନେ ଗାଡି ଚଳେଇବା ବନ୍ଦ କରିଦେଲେ। ଫଳରେ ବସଗୁଡିକ ଖତ ଖାଉଥିବା ଦେଖିବାକୁ ମିଳୁଛି। ଏ ନେଇ ସ୍ଥାନୀୟ ବିଡିଓ ପ୍ରଦିପ କୁମାର ନାୟକଙ୍କ ସହ ଯୋଗାଯୋଗ କରିବାରୁ ସେ କହିଥିଲେ, ପ୍ରତି ବ୍ଲକରେ ବିଜୁ ଗାଁ ଗାଡିର ମେଣ୍ଟେନାନ୍ସ ମାଗିବା ଫଳରେ ମହିଳା ମଣ୍ଡଳ ତାହା କରିବାକୁ ଅସମର୍ଥ। ତେଣୁ ସେମାନେ ବ୍ଲକକୁ ଫେରାଇ ଦେଇଥିଲେ। ଦାୟିତ୍ୱ ନେଇଥିବା ମହିଳା ମଣ୍ଡଳ ଗାଡି ଠିକ୍ ଭାବେ ମେଣ୍ଟେନାନ୍ସ ନ କରିପାରିବାରୁ ଅଚଳ ଅବସ୍ଥାରେ ପଡିରହିଛି।
