କେନ୍ଦୁଝର,୩ା୬(ସ୍ବ.ପ୍ର.): କରମଣ୍ଡଳ ଏକ୍ସପ୍ରେସ୍ ଦୁର୍ଘଟଣାଗ୍ରସ୍ତ ହେବା ପରେ ଉକ୍ତ ରେଳପଥରେ ଟ୍ରେନ୍ ଚଳାଚଳ ବନ୍ଦ ହୋଇ ବହୁ ଦୂରଗାମୀ ଟ୍ରେନ୍ କେନ୍ଦୁଝର ଜିଲା ଦେଇ ଚଳାଚଳ କରୁଛି। ପାଖାପାଖି ୧୦ଟି ଦୂରଗାମୀ ଟ୍ରେନ୍ ଏହି ରେଳପଥ ଦେଇ ଯାତାୟାତ କରିଛି। ଉକ୍ତ ରେଳପଥ ସଜଡ଼ା ନ ଯିବା ପର୍ଯ୍ୟନ୍ତ ଏହି ରେଳପଥ ଆହୁରି ଅନେକ ଟ୍ରେନ୍ ଚଳାଚଳ କରିବ। ଏଣୁ ଭୁବନେଶ୍ୱରରୁ ହାଓ୍ବଡ଼ା ଓ ସେଠାରୁ ଟାଟା ଦେଇ ନୂଆଦିଲ୍ଲୀ ତଥା ଅନ୍ୟାନ୍ୟ ନଗରକୁ ଯାତାୟାତ ପାଇଁ ଥିବା ରେଳପଥର ବିକଳ୍ପ ଭାବରେ କେନ୍ଦୁଝର ଦେଇ ଯାଇଥିବା ରେଳପଥ ଏବେ କାମ କରୁଛି। ଏହି କାରଣରୁ ଆଜି କେନ୍ଦୁଝରଗଡ଼ ରେଳ ଷ୍ଟେଶନ ଚଳଚଞ୍ଚଳ ହୋଇଉଠିଛି। ଦୈନିକ ମାତ୍ର ଦୁଇଟି ଟ୍ରେନ୍ କେନ୍ଦୁଝର ଦେଇ ଚଳାଚଳ କରୁଛି। ଅନ୍ୟ ସମୟରେ ଷ୍ଟେଶନ ସବୁ ଖାଁ ଖାଁ ହୋଇଯାଏ। ଏହି ଷ୍ଟେଶନ ଉପରେ ନିର୍ଭର କରି ବ୍ୟବସାୟ କରିବାକୁ ଆଗ୍ରହୀ ଥିବା ଲୋକମାନେ ମଧ୍ୟ ନିରାଶ ହୋଇପଡୁଛନ୍ତି। ଏହି ବିକଳ୍ପ ରେଳପଥକୁ ସଠିକ ଭାବରେ ପ୍ରସ୍ତୁତ କରାଗଲେ ଭୁବନେଶ୍ୱରୁ ଓ ହାଓ୍ବଡ଼ା ରେଳପଥ ଉପରେ ରେଳ ଚଳାଚଳର ଚାପ କମିବ ଏବଂ କେନ୍ଦୁଝର ଦେଇ ଯାତାୟାତ କଲେ ଖର୍ଚ୍ଚ ଏବଂ ସମୟ କମ୍ ହୋଇପାରିବ ବୋଲି କେନ୍ଦୁଝର ଯୁବ ପରିଷଦର ସଦସ୍ୟ ସନ୍ତୋଷ ମହାପାତ୍ର କହିଛନ୍ତି। ଏହାଛଡ଼ା ଷ୍ଟେଶନ ସବୁବେଳେ ଲୋକାରଣ୍ୟ ହେଲେ ବହୁ ଛୋଟ ବ୍ୟବସାୟୀ କାମଧନ୍ଦା କରି ପରିବାର ପ୍ରତିପୋଷଣ କରିପାରିବେ।
କେନ୍ଦୁଝର ଜିଲା ଦେଇଯାଇଥିବା ଜଖପୁରା-ବାଂଶପାଣି ରେଳପଥରେ ନୂଆଦିଲ୍ଲୀ ଓ ଦେଶର ଅନ୍ୟାନ୍ୟ ନଗରକୁ ଯାତ୍ରୀବାହୀ ରେଳ ଚଳାଚଳ ନେଇ ଦାବି ହୋଇଆସୁଛି। କିନ୍ତୁ ବିଭିନ୍ନ କାରଣ ଦର୍ଶାଇ ରେଳ ଚଳାଚଳ କରାଯାଉନାହିଁ। ଏହି ରେଳପଥ ଦେଇ ଭୁବନେଶ୍ୱରରୁ ଟ୍ରେନ୍ ଟାଟା ନଗରକୁ ଯାଇ ପାରିବ। ଏବେ କିଭଳି ଏତେ ସଂଖ୍ୟାରେ ଟ୍ରେନ୍ ଚଳାଚଳ କରୁଛି ବୋଲି ପ୍ରଶ୍ନବାଚୀ ସୃଷ୍ଟି କରିଛି। କେନ୍ଦୁଝର ଦେଇ ଦୂରଗାମୀ ଯାତ୍ରୀବାହୀ ଟ୍ରେନ୍ ଚଳାଚଳ କଲେ କେନ୍ଦୁଝରବାସୀ ଉପକୃତ ହେବେ। ବ୍ୟବସାୟ ବାଣିଜ୍ୟ ପାଇଁ ଅଧିକ ବାଟ ଫିଟିଯିବ। ଏଣୁ ତୁରନ୍ତ ଚାଲିଥିବା ରେଳ ଦୋହରୀକରଣ କାମ ସାରି ଏହି ବାଟ ଦେଇ ଦୂରଗାମୀ ଚଳାଚଳ କରାଯାଉ ବୋଲି କହିଛନ୍ତି ସ୍ଥାନୀୟ ସାମାଜିକ କର୍ମୀ ବ୍ରଜକିଶୋର ରାୟ।
