କେନ୍ଦୁଝର/ବଡ଼ବିଲ,୩୧ା୧(ସ୍ବ.ପ୍ର.): କେନ୍ଦୁଝର ବନ ଡିଭିଜନ ବଡ଼ବିଲ ରେଞ୍ଜ ଅନ୍ତର୍ଗତ ବଳିତା ବିଟ୍ ଅଧିନସ୍ଥ ବିଲେଇପଦା ସେକ୍ସନରେ ଦୁଇଟି ବାରହା ଶିକାର ଅଭିଯୋଗରେ ଦୁଇ ଜଣ ଗିରଫ ହୋଇଛନ୍ତି। ଗିରଫ ଅଭିଯୁକ୍ତ ଦୟ ହେଲେ ରୁଗୁଡ଼ି ଥାନା, ରୋଇଡ଼ା କ୍ୟାମ୍ପ ହଟିଂ ଅଞ୍ଚଳର ସଲିମ ଓରାମ ଓ ଅନୀଲ ମୁଣ୍ଡା। ଉଭୟେ ପଶୁ ଶିକାର ପାଇଁ ୧୧ କେଭି ଲାଇନ୍ରୁ ଜଙ୍ଗଲରେ ତାର ଟାଣି ଥିଲେ ବୋଲି ଡିଏଫ୍ଓ ଧନରାଜ ଏଚ୍ଡି କହିଛନ୍ତି। ସେମାନଙ୍କ ଠାରୁ ତାର ଜବତ ହୋଇଛି।
ସୂଚନାଯୋଗ୍ୟ, ବିଦ୍ୟୁତ୍ ସଂଯୋଗ ଟ୍ରିପ ହେବା ନେଇ ଖବର ପହଞ୍ଚିବା ପରେ ବନ ବିଭାଗର ସନ୍ଦେହ ହୋଇଥିଲା। ତୁରନ୍ତ ବନାଞ୍ଚଳ ଅଧିକାରୀ ସଂଜୀବ ରାଉତଙ୍କ ନେତୃତ୍ୱରେ ଅନ୍ୟ ବନ କର୍ମଚାରୀ, ବଳିତା ଗ୍ରାମ ନିକଟ ଠାକୁରାଣୀ ସଂରକ୍ଷିତ ଜଙ୍ଗଲରେ ଚଢାଉ କରିଥିଲେ। ଘଟଣାସ୍ଥଳରୁ ଏକ ମୃତ ବାର୍ହାକୁ ବନ ବିଭାଗ ଉଦ୍ଧାର କରିଥିବା ବେଳେ, ଶିକାର ପାଇଁ ବ୍ୟବହୃତ ଲୁହା ତାର ଓ ଇନ୍ସୁଲେଟରକୁ ଜବତ କରିଥିବା ଜଣାପଡ଼ିଛି। ଘଟଣାସ୍ଥଳରୁ ୨ ଅଭିଯୁକ୍ତ ଶିକାରୀଙ୍କୁ ଧରିବାରେ ବନ ବିଭାଗ ସକ୍ଷମ ହୋଇଥିବା ଜଣାପଡ଼ିଛି। ତେବେ ଏହି ଘଟଣାରେ ଅନ୍ୟ ଅଭିଯୁକ୍ତ ସଂପୃକ୍ତ ଥିବା ସନ୍ଦେହ କରି ଅଧିକ ତଦନ୍ତ ଜାରି ରଖିଛି ବନ ବିଭାଗ।
