ମୁମ୍ବାଇ: ଶେଷରେ ସିନେମା ହଲ୍କୁ ଆସିବାକୁ ପ୍ରସ୍ତୁତ ଅଭିନେତା-ରାଜନେତା ଥାଲାପତି ବିଜୟଙ୍କ ଚଳଚ୍ଚିତ୍ର ‘ଜନ ନାୟାଗନ’। ରାଜନୀତିକୁ ଆସିବା ପୂର୍ବରୁ ତାମିଲ ଫିଲ୍ମ ସୁପରଷ୍ଟାର ବିଜୟଙ୍କର ଏହା ଶେଷ ଅଭିନୀତ ଚଳଚ୍ଚିତ୍ର। ତେବେ ସେନ୍ସର ବୋର୍ଡ ସହିତ ଦୀର୍ଘ ବିବାଦ ପରେ ଏହି ବହୁ ପ୍ରତୀକ୍ଷିତ ଚଳଚ୍ଚିତ୍ରର ମୁକ୍ତିଲାଭ ତାରିଖ ନିଶ୍ଚିତ ହୋଇଛି। ଉକ୍ତ ରାଜନୈତିକ ଆକ୍ସନ ଡ୍ରାମା ଆସନ୍ତା ମାସ ୮ରେ ବିଶ୍ୱବ୍ୟାପୀ ବଡ଼ ପରଦାକୁ ଆସିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚିତ କରାଯାଇଛି। କେଭିଏନ୍ ପ୍ରଡକ୍ସନ୍ସ ବ୍ୟାନରରେ ନିର୍ମିତ ଜନ ନାୟାଗନ କିଛିଦିନ ପୂର୍ବରୁ ଅନ୍ଲାଇନରେ ଲିକ୍ ହୋଇଥିଲା। ଏହା ଉକ୍ତ ଚଳଚ୍ଚିତ୍ରର ବକ୍ସ ଅଫିସ କଲେକ୍ସନକୁ ପ୍ରଭାବିତ କରିପାରେ ବୋଲି କୁହାଯାଉଛି।
ବିଧାନସଭା ନିର୍ବାଚନ ଫଳାଫଳ ଘୋଷଣା ପରେ ଏହି ଚଳଚ୍ଚିତ୍ର ମୁକ୍ତିଲାଭ କରିବ। ବିଜୟ ଏବଂ ତାଙ୍କ ରାଜନୈତିକ ଦଳର ନିର୍ବାଚନ ଫଳାଫଳ ମଧ୍ୟ ଚଳଚ୍ଚିତ୍ରର ବକ୍ସ ଅଫିସ ପ୍ରଦର୍ଶନକୁ ଗୁରୁତ୍ୱପୂର୍ଣ୍ଣ ଭାବରେ ପ୍ରଭାବିତ କରିପାରେ। ଏଚ୍. ଭିନୋଥଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରରେ ବିଜୟ ଜଣେ ପୂର୍ବତନ ପୋଲିସ ଅଧିକାରୀଙ୍କ ଚରିତ୍ରରେ ଅଭିନୟ କରିଛନ୍ତି। ବବି ଦେଓଲ ପ୍ରତିପକ୍ଷ ଭୂମିକାରେ ଦେଖାଦେବେ। ପୂଜା ହେଗ୍ଡେ ମହିଳା ମୁଖ୍ୟ ଭୂମିକାରେ ଅଭିନୟ କରୁଛନ୍ତି। ମମିତା ବୈଜୁ, ଗୌତମ ବାସୁଦେବ ମେନନ, ପ୍ରକାଶ ରାଜ ଏବଂ ପ୍ରିୟାମଣିଙ୍କ ଭଳି କଳାକାର ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ। ଫିଲ୍ମଟି ବିଶ୍ୱବ୍ୟାପୀ ୧୦୦ କୋଟିରୁ ଅଧିକ ଆଗୁଆ ବୁକିଂ ହୋଇସାରିଥିବା ସୂଚନା ମିଳିଛି।
