କୋଲକାତା,୨।୮: ପଶ୍ଚିମବଙ୍ଗ ପୋଲିସର ସ୍ପେଶାଲ୍ ଟାସ୍କ ଫୋର୍ସ (STF) ଜୈଶ-ଏ-ମହମ୍ମଦ ସହ ଜଡ଼ିତ ଏକ ସନ୍ଦିଗ୍ଧ ମାମଲାରେ ବଡ଼ ଖୁଲାସା କରିଛି । STFର ଆଇଜି ଗୌରବ ଶର୍ମା କହିଛନ୍ତି ଯେ, ପୂର୍ବ ବର୍ଦ୍ଧମାନରୁ ଗିରଫ ହୋଇଥିବା ହମିମ ମଣ୍ଡଳ ପାକିସ୍ତାନସ୍ଥିତ ହ୍ୟାଣ୍ଡଲରଙ୍କ ସହ ନିୟମିତ ସମ୍ପର୍କରେ ଥିଲା ଏବଂ ଦିଲ୍ଲୀର ଜନ୍ତର-ମନ୍ତରରେ ପ୍ରସ୍ତାବିତ ପ୍ରଦର୍ଶନ ସମୟରେ ପୋଲିସ ବର୍ଦ୍ଦି ପିନ୍ଧି ହିଂସା ସୃଷ୍ଟି କରିବାକୁ ଷଡଯନ୍ତ୍ର କରୁଥିଲା। ଏହି ମାମଲାରେ ହମିମଙ୍କ କଥିତ ସହଯୋଗୀ ଓ ପ୍ରେମିକା ଅର୍ପିତା ସର୍କାରଙ୍କୁ ଝାଡ଼ଖଣ୍ଡର ସାହିବଗଞ୍ଜରୁ ଗିରଫ କରାଯାଇଛି। STF ତାଙ୍କୁ ପଶ୍ଚିମବଙ୍ଗକୁ ଆଣି ପଚରାଉଚରା କରୁଛି।
STF ଅନୁସାରେ, ହମିମଙ୍କ ମୋବାଇଲ୍ ଫୋନ୍ ଓ ଅନ୍ୟାନ୍ୟ ଡିଜିଟାଲ୍ ଉପକରଣରୁ ମିଳିଥିବା ତଥ୍ୟରୁ ସେ ପାକିସ୍ତାନୀ ହ୍ୟାଣ୍ଡଲରଙ୍କ ସହ ଦ୍ବାଟ୍ସଆପ,ଟେଲିଗ୍ରାମ ଓ ଅନ୍ୟାନ୍ୟ ଏନ୍କ୍ରିପ୍ଟେଡ୍ ଚାଟ୍ ମାଧ୍ୟମରେ ଯୋଗାଯୋଗରେ ଥିବା ଜଣାପଡ଼ିଛି। ଯୁବକମାନଙ୍କୁ ବ୍ରେନୱାଶ କରି ନିଜ ନେଟୱର୍କରେ ସାମିଲ କରିବା ଉଦ୍ୟମ ମଧ୍ୟ ଚାଲିଥିବା ଅଭିଯୋଗ ହୋଇଛି। ତଦନ୍ତରେ ସାମ୍ନାକୁ ଆସିଛି ଯେ, ଦିଲ୍ଲୀର ଜନ୍ତର-ମନ୍ତରରେ ପ୍ରସ୍ତାବିତ ଛାତ୍ର ଆନ୍ଦୋଳନ ସମୟରେ ପୁଲିସ ବର୍ଦ୍ଦି ପିନ୍ଧି ଭିତରକୁ ପ୍ରବେଶ କରି ଭଙ୍ଗାରୁଜା ଓ ହିଂସା କରିବାର ଯୋଜନା ଥିଲା।
ପଚରାଉଚରା ବେଳେ ହମିମ କହିଥିବା ଅନୁଯାୟୀ, ପ୍ରାୟ ୧୦ରୁ ୧୨ ଦିନ ପୂର୍ବେ ପାକିସ୍ତାନର ନାଗରିକ ହମ୍ମାଦ, ଯିଏ କଥିତ ଭାବେ ଶାହଜାଦ ଭଟ୍ଟି ଗ୍ୟାଙ୍ଗ ସହ ଜଡ଼ିତ, ସେ ତାଙ୍କୁ ପୋଲିସ ବର୍ଦ୍ଦି କିଣିବାକୁ ନିର୍ଦ୍ଦେଶ ଦେଇଥିଲା। ଏହି ବର୍ଦ୍ଦିଗୁଡ଼ିକୁ ଦିଲ୍ଲୀର ଏକ ନିର୍ଦ୍ଦିଷ୍ଟ ବସ୍ଷ୍ଟପ୍ରେ ପହଞ୍ଚାଇବାର ଯୋଜନା ଥିଲା। ତେବେ ଅର୍ଥ ପ୍ରଦାନ ସମ୍ବନ୍ଧୀୟ ସମସ୍ୟା କାରଣରୁ ଏହି ଯୋଜନା ସଫଳ ହୋଇନଥିବା ପୋଲିସ କହିଛି। STF ଆହୁରି କହିଛି ଯେ, ହମିମ ଜନ୍ତର-ମନ୍ତର ପ୍ରଦର୍ଶନ ସମୟରେ ପେଟ୍ରୋଲ ବୋମା ଫିଙ୍ଗିବା ପାଇଁ ଲୋକଙ୍କୁ ଖୋଜୁଥିଲା। ଏହି ଷଡଯନ୍ତ୍ରରେ ଆଉ କେଉଁମାନେ ସାମିଲ ଥିଲେ, ସେନେଇ ତଦନ୍ତ ଚାଲିଛି। ତଦନ୍ତରେ ଏହା ମଧ୍ୟ ସାମ୍ନାକୁ ଆସିଛି ଯେ, ସ୍ଥାନୀୟ ମନ୍ତ୍ରୀ ଉମେଶ ରାୟ ମଧ୍ୟ ଆତଙ୍କବାଦୀଙ୍କ ଟାର୍ଗେଟରେ ଥିଲେ। ଅଭିଯୋଗ ଅନୁସାରେ, ହମିମ ଓ ଅର୍ପିତା ମିଶି ମନ୍ତ୍ରୀଙ୍କ ପୁଅଙ୍କୁ ହନିଟ୍ରାପ୍ରେ ଫସାଇବାକୁ ଯୋଜନା କରିଥିଲେ। ପ୍ରାରମ୍ଭିକ ତଦନ୍ତରୁ ଆହୁରି ଜଣାପଡ଼ିଛି ଯେ, ହମିମ ସୋସିଆଲ ମିଡିଆ ମାଧ୍ୟମରେ ସୀମାପାର ନେଟୱର୍କ ସହ ଯୋଗାଯୋଗରେ ଥିଲା, ଯାହାର ସମ୍ପର୍କ ଡ୍ରଗ୍ସ ଓ ଅସ୍ତ୍ର ଚୋରାଚାଲାଣ ସହିତ ଭାରତରେ ଆତଙ୍କବାଦୀ କାର୍ଯ୍ୟକଳାପ ପାଇଁ ଅର୍ଥ ଯୋଗାଣ ସହ ଥିବା ସନ୍ଦେହ କରାଯାଉଛି।
