ହାଇଦ୍ରାବାଦ, ୧୨ା୫: ତେଲଙ୍ଗାନାରେ ଇଣ୍ଟରମିଡିଏଟ୍ (ଯୁକ୍ତ ଦୁଇ) ପରୀକ୍ଷା ଫଳ ଘୋଷଣା ପରେ ବୁଧବାର ୮ ଜଣ ଛାତ୍ରୀଛାତ୍ର ଆତ୍ମହତ୍ୟା କରିଛନ୍ତି। ଅନ୍ୟ ଜଣେ ଆତ୍ମହତ୍ୟା ଉଦ୍ୟମ କରିଥିଲେ। ମଙ୍ଗଳବାର ଏମ୍. ପ୍ରଜ୍ୱଳ ନାମକ ଜଣେ ଛାତ୍ର ଜୀବନ ହାରିଥିବାବେଳେ ଗତ ମାସରେ ଜି. କ୍ରିଷ୍ଣା ଆତ୍ମହତ୍ୟା କରିଥିଲେ। ଏହାକୁ ମିଶାଇ ମୋଟ ଆତ୍ମହତ୍ୟା ସଂଖ୍ୟା ୧୦ରେ ପହଞ୍ଚତ୍ଛି। କମ୍ ନମ୍ବର ଏବଂ ଶିକ୍ଷାରେ ବିଫଳତାକୁ ନେଇ ଛାତ୍ରୀଛାତ୍ରଙ୍କ ମଧ୍ୟରେ ଆତ୍ମହତ୍ୟା ପ୍ରବଣତା ବୃଦ୍ଧି ପାଉଛି। କେବଳ ହାଇଦ୍ରାବାଦରେ ୬ ଜଣ ଛାତ୍ରୀଛାତ୍ର ଆତ୍ମହତ୍ୟା କରିଥିବାବେଳେ ସାଙ୍ଗାରେଡ୍ଡୀ, ଓ୍ବାନାପାର୍ଥତ୍ ଏବଂ ଜଗତିଆଲ ଜିଲାରେ ଅନ୍ୟମାନେ ଜୀବନ ହାରିଛନ୍ତି। ହାଇଦ୍ରାବାଦର ୬ ଛାତ୍ରୀଛାତ୍ରଙ୍କ ମଧ୍ୟରୁ ୫ ଜଣ ରଶି ଲଗାଇ ଏବଂ ଜଣେ ବିଲ୍ଡିଂର ପଞ୍ଚମ ମହଲାରୁ ଡେଇଁ ଆତ୍ମହତ୍ୟା କରିଥିଲେ। ସବୁଠୁ ଦୁଃଖର କଥା ପରୀକ୍ଷାରେ ଫେଲ୍ ହେବା ଆଶଙ୍କାରେ ୧୯ ବର୍ଷୀୟା ଯୁକ୍ତ ଦୁଇ ଛାତ୍ର ଜି. କ୍ରିଷ୍ଣା ଗତ ମାସ ୧୦ ତାରିଖରେ ଆତ୍ମହତ୍ୟା କରିଥିଲେ। ପରୀକ୍ଷା ଫଳ ବାହାରିବା ପରେ ସେ ୧,୦୦୦ରୁ ୮୯୨ ନମ୍ବର ରଖିଥିବା ଜଣାପଡ଼ିଛି। ଏଭଳି ବହୁ ଘଟଣା ଛାତ୍ରୀଛାତ୍ରଙ୍କୁ ଚରମ ପଦକ୍ଷେପ ନେବାକୁ ପ୍ରେରିତ କରୁଛି। ଏଭଳି ପଦକ୍ଷେପ ନ ନେବା ଲାଗି ପୋଲିସ ଏବଂ ମନସ୍ତତ୍ତ୍ୱବିଦ୍ମାନେ ଛାତ୍ରୀଛାତ୍ରଙ୍କୁ ଅପିଲ୍ କରିଥିଲେ।
