ମୁମ୍ବାଇ,୧୨।୯: ୩୪ ବର୍ଷୀୟା ବଳାତ୍କାର ପୀଡ଼ିତା ଆଖି ବୁଝିବାର ଦିନକ ପରେ ମହାରାଷ୍ଟ୍ରର ଉଲହାସନଗରରୁ ଆସିଛି ଆଉ ଏକ ବଳାତ୍କାର ମାମଲା। ୧୫ ବର୍ଷୀୟା ନାବାଳିକାଙ୍କୁ ଉଲହାସନଗର ଥାନା ଅନ୍ତର୍ଗତ ରେଲଓ୍ବେ ପରିସରରେ ବଳାତ୍କାର କରାଯାଇଥିଲା। ବହୁ କଷ୍ଟରେ ଜୀବନ ବଞ୍ଚାଇ ଥାନାରେ ପହଞ୍ଚିଥିଲେ ପୀଡ଼ିତା। କିନ୍ତୁ ଅପରାଧ ଘଟିଥିବା ସ୍ଥାନ ଆମ ଥାନା ପରିସୀମାରେ ଆସୁନାହିଁ। ଏଭଳି କହି ବଳାତ୍କାର ପୀଡ଼ିତାଙ୍କ ଅଭିଯୋଗ ରଖିବାକୁ ଦୁଇଟି ଥାନା ମନା କରି ଦେଇଥିଲେ। ଶେଷରେ ରେଲଓ୍ବେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ଅଭିଯୁକ୍ତଙ୍କୁ ଗିରଫ କରିଛି।
ରେଲଓ୍ବେ ପୋଲିସ କମିଶନର କାଇସର ଖାଲିଦ କହିଛନ୍ତି, ପୀଡ଼ିତା ଶିରଡିରୁ ଫେରୁଥିଲେ। ଟ୍ରେନ ଯୋଗେ ପ୍ରାୟ ୯ଟା ରାତିରେ ଉଲହାସନଗର ଷ୍ଟେଶନରେ ପହଞ୍ଚିବା ପରେ ସେଠାରେ ଭେଟିଥିଲେ ଦୁଇ ସାଙ୍ଗଙ୍କୁ। ସ୍କାଇଓ୍ବାକ ଦେଇ ଷ୍ଟେଶନ ପାରି ହେଉଥିବା ବେଳେ ସେମାନଙ୍କୁ ଅଭିଯୁକ୍ତ ପିଛା କରି ଏକ ହାମରରେ ଆକ୍ରମଣ କରିଥିଲେ। ଅନ୍ୟମାନେ ଖସି ପଳାଇଥିଲେ। ହେଲେ ଫସି ଯାଇଥିଲେ ନାବାଳିକା। ତାଙ୍କୁ ଅଭିଯୁକ୍ତ ଷ୍ଟେଶନ ପରିସରରେ ଏକ ନିର୍ଜନ ସ୍ଥାନକୁ ନେଇ ରାତିସାରା ବଳାତ୍କାର କରିଥିଲେ। ସକାଳେ ସୁଯୋଗ ପାଇ ଖସି ପଳାଇବା ପରେ ସାଙ୍ଗଙ୍କୁ ଯୋଗାଯୋଗ କରିଥିଲେ। ସାଙ୍ଗର ପରାମର୍ଶରେ ପୀଡ଼ିତା ପହଞ୍ଚିଥିଲେ ଥାନାରେ। କିନ୍ତୁ ଥାନାର ପରିସୀମା ଦେଖାଇ ଦୁଇଟି ଥାନା ଏଫ୍ଆଇଆର ରଖିବାକୁ ମନା କରି ଦେଇଥିଲେ।
