ନୂଆଦିଲ୍ଲୀ,୩୦।୧୦: ଭାରତୀୟ ଅଲରାଉଣ୍ଡର ଅକ୍ଷର ପଟେଲ ଟି-୨୦ କ୍ରିକେଟରେ ଏକ ନୂଆ ଇତିହାସ ରଚିଛନ୍ତି। ଟି-୨୦ କ୍ରିକେଟ ଫର୍ମାଟରେ ୩,୦୦୦ ରନ୍ ଏବଂ ୩୦୦ ଉଇକେଟର ‘ଡବଲ୍’ (Double) ମାଇଲଖୁଣ୍ଟ ଛୁଇଁବାରେ ସେ ପ୍ରଥମ ଭାରତୀୟ କ୍ରିକେଟର ହୋଇଛନ୍ତି। ନ୍ୟୁଜିଲ୍ୟାଣ୍ଡ ବିପକ୍ଷ ଚତୁର୍ଥ ଟି-୨୦ ଆନ୍ତର୍ଜାତୀୟ ମ୍ୟାଚ୍ ଅବସରରେ ସେ ଏହି ସଫଳତା ହାସଲ କରିଛନ୍ତି। ଅକ୍ଲ୍ୟାଣ୍ଡର ଇଡେନ୍ ପାର୍କଠାରେ ଖେଳାଯାଉଥିବା ଏହି ମ୍ୟାଚ୍ରେ କିୱି ବ୍ୟାଟର ଫିନ୍ ଆଲେନ୍ଙ୍କୁ ଆଉଟ୍ କରିବା ସହ ଅକ୍ଷର ତାଙ୍କର ୩୦୦ତମ ଟି-୨୦ ଉଇକେଟ୍ ପୂରଣ କରିଥିଲେ।
ଏହି ସଫଳତା ସହ ୩୨ ବର୍ଷୀୟ ଅକ୍ଷର ପଟେଲ ବିଶ୍ୱର ବିଶିଷ୍ଟ ଅଲରାଉଣ୍ଡର ତାଲିକାରେ ସାମିଲ ହୋଇଛନ୍ତି। ପୂର୍ବରୁ ରାଶିଦ ଖାନ୍, ସୁନିଲ ନରାଇନ୍, ଡ୍ୱେନ୍ ବ୍ରାଭୋ, ଆନ୍ଦ୍ରେ ରସେଲ, ଶାକିବ ଅଲ୍ ହସନ, ମହମ୍ମଦ ନବୀ, କାୟରନ୍ ପୋଲାର୍ଡ, ଶାଦାବ ଖାନ୍, ଜେସନ୍ ହୋଲ୍ଡର, ସାମ୍ କୁରାନ ଏବଂ ଲିଆମ୍ ଡସନ୍ଙ୍କ ଭଳି ତାରକା ଖେଳାଳି ଏହି ରେକର୍ଡ ନିଜ ନାମରେ କରିସାରିଛନ୍ତି। ଅକ୍ଷର ନିଜର ୩୪୫ଟି ଟି-୨୦ ମ୍ୟାଚ୍ରେ ୨୧.୯୪ ହାର ଏବଂ ୧୩୪.୪୩ ଷ୍ଟ୍ରାଇକ୍ ରେଟ୍ରେ ୩,୮୧୮ ରନ୍ ସଂଗ୍ରହ କରିବା ସହ ୩୦୦ଟି ୱିକେଟ୍ ଅଖତିୟାର କରିଛନ୍ତି। ତାଙ୍କ ବ୍ୟାଟ୍ରୁ ୯ଟି ଅର୍ଦ୍ଧଶତକ ମଧ୍ୟ ବାହାରିଛି।
ଏହି ଐତିହାସିକ ରେକର୍ଡ ସତ୍ତ୍ୱେ ଅକ୍ଲ୍ୟାଣ୍ଡ ମ୍ୟାଚ୍ରେ ଅକ୍ଷରଙ୍କ ବୋଲିଂ ଓ ବ୍ୟାଟିଂ ପ୍ରଦର୍ଶନ ଆଶାନୁରୂପ ନଥିଲା। ସେ ୩ ଓଭରରେ ୪୩ ରନ୍ ଦେଇ ଗୋଟିଏ ଉଇକେଟ୍ ନେଇଥିଲେ। ବ୍ୟାଟିଂରେ ମଧ୍ୟ ସେ ୯ଟି ବଲ୍ରୁ ମାତ୍ର ୭ ରନ୍ କରି ମିଚେଲ ସାଣ୍ଟନରଙ୍କ ବଲ୍ରେ ଆଉଟ୍ ହୋଇଥିଲେ।
ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ନ୍ୟୁଜିଲ୍ୟାଣ୍ଡ ୨୫୯ ରନ୍ର ବିଶାଳ ସ୍କୋର ଛିଡ଼ା କରିଥିଲା। ଦଳ ପକ୍ଷରୁ ଗ୍ଲେନ୍ ଫିଲିପ୍ସ ମାତ୍ର ୪୯ ବଲ୍ରୁ ୧୦୭ ରନ୍ର ଧୁଆଁଧାର ଶତକୀୟ ପାରି ଖେଳିଥିଲେ ଏବଂ ମାଇକେଲ ବ୍ରେସୱେଲ୍ ୨୫ ବଲ୍ରୁ ୬୫ ରନ୍ ସଂଗ୍ରହ କରିଥିଲେ।
୨୬୦ ରନ୍ର ପିଛା କରୁଥିବା ଭାରତୀୟ ଦଳର ଆରମ୍ଭ ବହୁତ ଖରାପ ରହିଥିଲା। ଜ୍ୟାକବ ଡଫି ପ୍ରଥମ ଓଭରରେ ସଞ୍ଜୁ ସାମସନ୍ ଓ ଇଶାନ୍ କିଶନଙ୍କୁ ଆଉଟ୍ କରି ଭାରତକୁ ବଡ଼ ଝଟ୍କା ଦେଇଥିଲେ। ଅଭିଷେକ ଶର୍ମା (୨୭), ନମନ ଧୀର (୨୮) ଏବଂ ତିଲକ ବର୍ମା (୩୫) ସଂଘର୍ଷ କରିଥିଲେ ହେଁ ଟିମ୍ ଇଣ୍ଡିଆ ୨୦ ଓଭରରେ ୯ ଉଇକେଟ୍ ହରାଇ ୧୭୨ ରନ୍ କରିବାକୁ ସମର୍ଥ ହୋଇଥିଲା। ଫଳରେ ଭାରତ ୮୭ ରନ୍ରେ ମ୍ୟାଚ୍ ହାରିଥିଲା। ଏହି ପରାଜୟ ଯୋଗୁଁ ଭାରତର କ୍ଲିନ୍ ସ୍ୱିପ୍ ସ୍ୱପ୍ନ ଭାଙ୍ଗିଥିଲେ ସୁଦ୍ଧା ୫ ଟିକିଆ ସିରିଜ୍ରେ ଭାରତୀୟ ଦଳ ଏବେ ବି ୩-୧ରେ ଆଗୁଆ ରହିଛି।
