ନୂଆଦିଲ୍ଲୀ,୩୦।୧୦: ଦୀପାବଳି ପୂର୍ୱରୁ ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ନିଜର ଭିସା (Visa) ଏବଂ ରୁପେ (RuPay) କ୍ରେଡିଟ କାର୍ଡ଼ର ନିୟମ ଓ ଚାର୍ଜରେ ବଡ଼ ଧରଣର ପରିବର୍ତ୍ତନ କରିଛି। ନୂତନ ନିୟମ ଅନୁସାରେ କ୍ରେଡିଟ କାର୍ଡ଼ ବ୍ୟବହାର କରି ଏଟିଏମରୁ ଟଙ୍କା ଉଠାଇବା, ବିଳମ୍ୱ ଦେୟ ଶୁଳ୍କ (ଲେଟ ପେମେଣ୍ଟ ଫି’) ଏବଂ ରିୱାର୍ଡ ପଏଣ୍ଟ ରିଡିମ କରିବା ମହଙ୍ଗା ହୋଇଛି। ଏହି ପରିବର୍ତ୍ତନଗୁଡ଼ିକ ନଭେମ୍ୱର ୧ ତାରିଖରୁ ଲାଗୁ ହେବାକୁ ଯାଉଛି।
ଏଣିକି ଯଦି କୌଣସି ଗ୍ରାହକ ଗୋଟିଏ ବିଲିଂ ସାଇକେଲରେ ୫୦,୦୦୦ ଟଙ୍କାରୁ ଅଧିକ ୟୁଟିଲିଟି ବିଲ ଯେପରିକି ବିଦ୍ୟୁତ, ପାଣି, ୱାଇ-ଫାଇ ଏବଂ ଏଲ୍ପିଜି ଭଳି ଘରୋଇ ବିଲ କ୍ରେଡିଟ କାର୍ଡ଼ ମାଧ୍ୟମରେ ପୈଠ କରନ୍ତି, ତେବେ ସେଥିପାଇଁ ୧% ନୂଆ ଶୁଳ୍କ ଆଦାୟ କରାଯିବ। ଏହି ପରିବର୍ତ୍ତନ ପରେ ଗ୍ରାହକମାନଙ୍କୁ କ୍ରେଡିଟ କାର୍ଡ଼ ବ୍ୟବହାର କରିବା ପୂର୍ୱରୁ ନୂଆ ଚାର୍ଜ ତାଲିକାକୁ ଭଲ ଭାବରେ ଦେଖିନେବାକୁ ପଡ଼ିବ।
ରିୱାର୍ଡ ରିଡିମ୍ପସନ (Reward Redemption): ପୂର୍ୱରୁ ଏହା ମାଗଣା ଥିଲା, ଏବେ ପ୍ରତ୍ୟେକ ଥର ରିଡିମ କଲେ ୯୯ ଟଙ୍କା ଦେବାକୁ ପଡ଼ିବ।
ବିଲ ପେମେଣ୍ଟ (Bill Payments): ଗୋଟିଏ ବିଲିଂ ସାଇକେଲରେ ୫୦,୦୦୦ ଟଙ୍କାରୁ ଅଧିକ ବିଲ କ୍ରେଡିଟ କାର୍ଡ଼ରେ ପୈଠ କଲେ ୧% ଶୁଳ୍କ ଲାଗିବ। ଗୋଟିଏ କାରବାରରେ ସର୍ୱାଧିକ ୨,୦୦୦ ଟଙ୍କା ପର୍ଯ୍ୟନ୍ତ ଶୁଳ୍କ ଲାଗିପାରିବ।
ଏଟିଏମରୁ ଟଙ୍କା ଉଠାଣ (ATM Cash Withdrawal): PNB ଏଟିଏମରେ ୨.୫% କିମ୍ୱା ୪୦୦ ଟଙ୍କା (ଯାହା ଅଧିକ ହେବ)। ସେହିପରି ଅନ୍ୟ ବ୍ୟାଙ୍କର ଏଟିଏମ ଏବଂ ବିଦେଶରେ ୨.୫% କିମ୍ୱା ୫୦୦ ଟଙ୍କା (ଯାହା ଅଧିକ ହେବ)। ପୂର୍ୱରୁ ଏହା ୨% ଏବଂ ସର୍ୱନିମ୍ନ ୧୦୦-୨୦୦ ଟଙ୍କା ଥିଲା।
ଲେଟ ପେମେଣ୍ଟ ଫି’ (Late Payment Fees): ଏବେ ବକେୟା ରାଶି ଉପରେ ସ୍ଲାବ ବୃଦ୍ଧି କରାଯାଇଛି। ୫୦୧ରୁ ୧,୦୦୦ ଟଙ୍କା ବକେୟା ଉପରେ ୫୦୦ ଟଙ୍କା, ୧,୦୦୧ରୁ ୧୦,୦୦୦ ଟଙ୍କା ପର୍ଯ୍ୟନ୍ତ ୭୫୦ ଟଙ୍କା ଏବଂ ୧୦,୦୦୧ ଟଙ୍କାରୁ ଊର୍ଦ୍ଧ୍ୱ ବକେୟା ଉପରେ ୧,୦୦୦ ଟଙ୍କା ଶୁଳ୍କ ଆଦାୟ ହେବ। ପୂର୍ୱରୁ ୧,୦୦୦ ଟଙ୍କା ପର୍ଯ୍ୟନ୍ତ କୌଣସି ଶୁଳ୍କ ଲାଗୁ ନଥିଲା (Nil)।
ସୂଚନାଯୋଗ୍ୟ ଯେ, ଏହା ବ୍ୟତୀତ ଚେକ, ଅଟୋ-ଡେବିଟ ରିଟର୍ଣ୍ଣ ଏବଂ ଡୁପ୍ଲିକେଟ ଷ୍ଟେଟମେଣ୍ଟ ଚାର୍ଜରେ ମଧ୍ୟ ପରିବର୍ତ୍ତନ ହୋଇଛି। ଏହି ସମସ୍ତ ଚାର୍ଜ ଉପରେ ଜିଏସ୍ଟି (GST) ଅଲଗା ଭାବେ ଲାଗୁ ହେବ ଏବଂ କାର୍ଡ଼ର ପ୍ରକାରଭେଦ (Variant) ଅନୁଯାୟୀ ଶୁଳ୍କ ଭିନ୍ନ ହୋଇପାରେ।
ଭିସା ଏବଂ ରୁପେ କ୍ରେଡିଟ କାର୍ଡ଼ର ବକେୟା ପରିଶୋଧ ପାଇଁ ଦିଆଯାଇଥିବା ଚେକ ଫେରିଆସିଲେ (ବାଉନ୍ସ ହେଲେ) କିମ୍ୱା ଇଲେକ୍ଟ୍ରୋନିକ କ୍ଲିୟରିଂ ସର୍ଭିସ (ECS) / ଅଟୋ-ଡେବିଟ ନିର୍ଦ୍ଦେଶ ବିଫଳ ହେଲେ, ପୈଠ ରାଶିର ୨% (ସର୍ୱନିମ୍ନ ୪୦୦ ଟଙ୍କା) ନୂଆ ଚାର୍ଜ ଲାଗୁ ହେବ।
ଫିକ୍ସଡ ଡିପୋଜିଟ (FD) ସହ ଜଡ଼ିତ କ୍ରେଡିଟ କାର୍ଡ଼ଗୁଡ଼ିକ ପାଇଁ ପ୍ରତି ଉପକରଣ (Instrument) ପିଛା ୧୦୦ ଟଙ୍କା ଚାର୍ଜ ଲାଗିବ। ଫିକ୍ସଡ ଡିପୋଜିଟ ଆଧାରରେ ଜାରି ହୋଇଥିବା ’ଲକ୍ସୁରା’ (Luxura) କ୍ରେଡିଟ କାର୍ଡ଼ରେ ଲାଗୁ ହେଉଥିବା ସମସ୍ତ ସେବା ଶୁଳ୍କ ସାଧାରଣ ଲକ୍ସୁରା କ୍ରେଡିଟ କାର୍ଡ଼ ଭଳି ସମାନ ରହିବ।
