ପୋର୍ଟ ଅଫ୍ ସ୍ପେନ୍,୨୫।୭: ରେକର୍ଡ ୩୧୨ ରନ୍ର ଟାର୍ଗେଟକୁ ଚେଜ କରି ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଦିନିକିଆ ସହ ସିରିଜ କବଜା କରିଛି ଟିମ ଇଣ୍ଡିଆ। ବରିଷ୍ଠ ଖେଳାଳିଙ୍କ ଅନୁପସ୍ଥିତିରେ ଇଣ୍ଡିଜ ବିପକ୍ଷ ଦିନିକିଆ ସିରିଜ ଖେଳୁଥିବା ଭାରତ ଗୋଟିଏ ମ୍ୟାଚ ପୂର୍ବରୁ ହିଁ ଶୃଙ୍ଖଳା ହାତେଇ ନେଇଛି। ପ୍ରଥମ ମ୍ୟାଚ୍କୁ ୩ ରନରେ ଜିତିଥିବା ଭାରତ ଦ୍ୱିତୀୟ ଦିନିକିଆକୁ ୨ ବଲ ପୂର୍ବରୁ ୨ ଉଇକେଟରେ ଜିତି ନେଇଛି। ତେବେ ସିରିଜ୍ ବିଜୟ ପରେ ଭାରତୀୟ ଦଳକୁ ଝଟ୍କା ଲାଗିଛି। ପ୍ରଥମ ଦିନିକିଆରେ ମନ୍ଥର ଓଭର ହାର ପାଇଁ ଆଇସିସି ଭାରତୀୟ କ୍ରିକେଟ ଦଳକୁ ୨୦ ପ୍ରତିଶତ ମ୍ୟାଚ ଫି’ ଜୋରିମନା କରିଛି। ଅଧିନାୟକ ଶିଖର ଧାୱନ ଏହି ଭୁଲକୁ ଗ୍ରହଣ କରିଛନ୍ତି ଏବଂ ପ୍ରସ୍ତାବିତ ଦଣ୍ଡକୁ ମଧ୍ୟ ଗ୍ରହଣ କରିଛନ୍ତି।
ପ୍ରଥମ ଦିନିକିଆରେ ପ୍ରଥମେ ବ୍ୟାଟିଂ କରି ଶିଖର ଧାୱନଙ୍କ ନେତୃତ୍ୱରେ ଟିମ ଇଣ୍ଡିଆ ୫୦ ଓଭରରେ ୩୦୮/୭ ରନ ସଂଗ୍ରହ କରିଥିଲା। ଏହାର ଜବାବରେ ୱେଷ୍ଟଇଣ୍ଡିଜ ୫୦ ଓଭରରେ ୬ ଉଇକେଟ ହରାଇ ୩୦୫ ରନ ସଂଗ୍ରହ କରିଥିଲା। ଭ୍ରମଣକାରୀ ଦଳ ପାଇଁ ଶ୍ରେୟସ ଆୟାର ଏବଂ ଶୁବମାନ ଗିଲ ଅର୍ଦ୍ଧଶତକ ହାସଲ କରିଥିଲେ। ଏଥିସହିତ ଅଧିନାୟକ ଧାୱନ ୯୭ ରନର ଇନିଂସ ଖେଳିଥିଲେ।
