ଅହମ୍ମଦାବାଦ, ୧ା୨ (ପି.ଟି.)-ବରୋଦାକୁ ୭ ଉଇକେଟରେ ପରାସ୍ତ କରି ତାମିଲନାଡୁ ସୟଦ ମୁସ୍ତାକ ଅଲୀ ଟ୍ରଫି ଟି୨୦ ଟୁର୍ନାମେଣ୍ଟ ଟାଇଟଲ ହାସଲ କରିଛି। ବରୋଦା ଦ୍ୱାରା ଧାର୍ଯ୍ୟ ୧୨୧ ରନର ବିଜୟ ଲକ୍ଷ୍ୟକୁ ତାମିଲନାଡୁ ୧୮ ଓଭରରେ ୩ ଉଇକେଟ ବିନିମୟରେ ଅତିକ୍ରମ କରିଥିଲା। ଦଳ ପକ୍ଷରୁ ହରି ନିଶାନ୍ତ ୩୫, ଏନ୍. ଜଗଦିଶନ ୧୪, ଅଧିନାୟକ ଦିନେଶ କାର୍ତ୍ତିକ ୨୨ ରନ କରିଥିବାବେଳେ ବାବା ଅପରାଜିତ ୨୯ ଓ ଶାହାରୁଖ ଖାଁ ୧୮ରନ କରି ଅପରାଜିତ ରହିଥିଲେ। ବିପକ୍ଷ ଦଳର ଅତୀତ ସେଠ, ଲୁକ୍ମାନ ମେରିଓ୍ବାଲା ଓ ବାବାଶାଫି ପଠାନ ଗୋଟିଏ ଲେଖାଏ ଉଇକେଟ ନେଇଥିଲେ।
ପୂର୍ବରୁ ବାମହାତୀ ସ୍ପିନର ଏମ୍. ସିଦ୍ଧାର୍ଥ (୪/୨୦)ଙ୍କ ଯୋଗୁ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ବରୋଦା ନିର୍ଦ୍ଧାରିତ ଓଭରରେ ୯ ଉଇକେଟ ବିନିମୟରେ ୧୨୦ରନ କରିବାରେ ସକ୍ଷମ ହୋଇପାରିଥିଲା। ଦଳ ଏକଦା ୩୬ ରନରେ ୩ ଉଇକେଟ ହରାଇ ସଙ୍କଟରେ ପଡ଼ିଥିଲା। ମାତ୍ର ୭ମ ଉଇକେଟରେ ବିଷ୍ଣୁ ସୋଲାଙ୍କି (୫୫ବଲ୍ରୁ ୪୯ରନ, ୧ ଚୌକା ଓ ୨ ଛକା) ଏବଂ ଅତୀତ ସେଠ୍ (୩୦ବଲରୁ ୨୯ରନ, ୨ ଚୌକା ଓ ୧ ଛକା)ଙ୍କ ମଧ୍ୟରେ ୫୮ରନର ଭାଗୀଦାରି ଯୋଗୁ ବରୋଦା ୩ ଅଙ୍କ ବିଶିଷ୍ଟ ସ୍କୋର କରିବାରେ ସକ୍ଷମ ହୋଇଥିଲା। ଫର୍ମରେ ଥିବା କେଦାର ଦେବଧର ମାତ୍ର ୧୬ ରନ କରିଥିଲେ। ଭାର୍ଗବ ଭଟ୍ଟ ୧୨ ରନ କରି ଅପରାଜିତ ରହିଥିବାବେଳେ ଅନ୍ୟ କୌଣସି ବ୍ୟାଟ୍ସମ୍ୟାନ ଦୁଇ ଅଙ୍କ ସ୍ପର୍ଶ କରିପାରି ନ ଥିଲେ।
ସଂକ୍ଷିପ୍ତ ସ୍କୋର
ବରୋଦା : ୨୦ ଓଭରରେ ୧୨୦/୯ (ସୋଲାଙ୍କି-୪୯, ଅତୀତ ସେଠ୍-୨୯; ସିଦ୍ଧାର୍ଥ-୪/୨୦)।
ତାମିଲନାଡୁ: ୧୮ ଓଭରରେ ୧୨୩/୩ ( ନିଶାନ୍ତ-୩୫, ବାବା ଅପରାଜିତ-୨୯*, ଦୀନେଶ କାର୍ତ୍ତିକ-୨୨, ଶାହାରୁଖ ଖାଁ-୧୮*, ଅତୀତ-୧/୨୦)।
