କୋଲାର,୧୭ା୪ : କର୍ନାଟକର କୋଲାରରେ କଂଗ୍ରେସ ନେତା ରାହୁଲ ଗାନ୍ଧୀ ରବିବାର ଏକ ନିର୍ବାଚନୀ ସଭାରେ ଉଦ୍ବୋଧନ ଦେବା ଅବସରରେ ଆଦାନୀ ‘ଦୁର୍ନୀତି’ ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଜୋର୍ଦାର ସମାଲୋଚନା କରିଛନ୍ତି। ସେ କେନ୍ଦ୍ରର ଭାଜପା ସରକାରଙ୍କୁ ଭୟ କରନ୍ତି ନାହିଁ ବୋଲି ଦୋହରାଇଛନ୍ତି। ୨୦୧୯ ଲୋକ ସଭା ନିର୍ବାଚନ ବେଳେ କୋଲାରରେ ମୋଦି ସାଙ୍ଗିଆ ମନ୍ତବ୍ୟ ଦେଇ ରାହୁଲ ଦୋଷୀସାବ୍ୟସ୍ତ ହେବା ପରେ ଗତ ମାସରେ ତାଙ୍କର ସଦସ୍ୟତା ରଦ୍ଦ ହୋଇଥିଲା। ମାର୍ଚ୍ଚ ୨୯ରେ କର୍ନାଟକ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପରେ ରବିବାର ରାହୁଲ ପ୍ରଥମ ଥର ପାଇଁ ଉକ୍ତ ରାଜ୍ୟକୁ ପ୍ରଚାରରେ ଆସିଛନ୍ତି। ଏହି ଅବସରରେ ସେ ପ୍ରଧାନମନ୍ତ୍ରୀଙ୍କର ବ୍ୟବସାୟୀ ଗୌତମ ଆଦାନୀଙ୍କ ସହ ସମ୍ପର୍କ ପ୍ରସଙ୍ଗ ଉଠାଇ ତାଙ୍କୁ ଟାର୍ଗେଟ କରିଥିଲେ। ତାଙ୍କ ଲୋକ ସଭା ସଦସ୍ୟତା ରଦ୍ଦ କରି କେନ୍ଦ୍ର ସରକାର ତାଙ୍କୁ ଭୟଭୀତ କରିଥିବା ଭାବୁଛନ୍ତି। ସେ ଭୟଭୀତ ହେବା ବ୍ୟକ୍ତି ନୁହନ୍ତି ବୋଲି ଜନସାଧାରଣଙ୍କୁ ରାହୁଲ କହିଥିଲେ। ପ୍ରତିରକ୍ଷା ଭିତ୍ତିଭୂମି ଚଳାଉଥିବା ଆଦାନୀ ଗ୍ରୁପ୍ ବିରୋଧରେ ତଦନ୍ତ କରାଯାଉ ନାହିଁ। ଆଦାନୀ ତାଙ୍କ ସେଲ୍ କମ୍ପାନୀରେ ଜଣେ ଚାଇନା ବ୍ୟକ୍ତିଙ୍କୁ ନିଯୁକ୍ତି ଦେଇଥିବା ରାହୁଲ ଅଭିଯୋଗ କରିଛନ୍ତି। ଦୁର୍ନୀତିର ପ୍ରତୀକ ଆଦାନୀଙ୍କ ସହ ପ୍ରଧାନମନ୍ତ୍ରୀଙ୍କର କ’ଣ ସମ୍ପର୍କ ସେ ଜାଣିବାକୁ ଚାହାନ୍ତି ବୋଲି ରାହୁଲ କହିଥିଲେ। ଆଦାନୀଙ୍କୁ ବିମାନବନ୍ଦର ଦେବା ଲାଗି ସରକାର ନିୟମ ବଦଳାଇ ଦେଉଥିବା ସେ ଅଭିଯୋଗ କରିଛନ୍ତି।
ଭାଜପା ସରକାର ଅନ୍ୟାନ୍ୟ ପଛୁଆ ବର୍ଗ (ଓବିସି)ଙ୍କୁ ଅପମାନିତ କରିଥିବା ପୂର୍ବତନ କଂଗ୍ରେସ ଅଧ୍ୟକ୍ଷ କହିଛନ୍ତି। ଉପା ସରକାର ସମୟରେ ଜାତି ଜନଗଣନା ହୋଇଥିଲା। ଭାଜପା କ୍ଷମତାକୁ ଆସିବା ପରେ ଉକ୍ତ ତଥ୍ୟକୁ ଲୁଚାଇଦେଇଛି। କେନ୍ଦ୍ରର ଭାଜପା ସରକାରରେ ଏସ୍ସି, ଏସ୍ଟି ଏବଂ ଓବିସିକୁ ମାତ୍ର ୭ ପ୍ରତିଶତ ପ୍ରତିନିଧିତ୍ୱ ମିଳିଛି। ଜାତି ଜନଗଣନା ତଥ୍ୟ ପ୍ରଘଟ ହେଲେ କିଏ ଓବିସିଙ୍କୁ ଅପମାନିତ କରୁଛି, ସ୍ପଷ୍ଟ ହୋଇଯିବ ବୋଲି ରାହୁଲ କହିଥିଲେ।
