ବରଗଡ଼,୨୬ା୧୦(ପ୍ରେମାନନ୍ଦ ଖମାରୀ): ସମ୍ବଲପୁର ଜିଲା ବୁର୍ଲା ଥାନା ପୋଲିସ ହାତରେ ଧରାପଡ଼ିଥିବା ଝାଡୁଦାର ନିଯୁକ୍ତି ଠକେଇର ଚେର ବରଗଡ଼ ଜିଲାକୁ ଲମ୍ବିଛି। ଶୁକ୍ରବାର ଭଟଲି ଥାନାରେ ଏଭଳି ଠକେଇ ଅଭିଯୋଗ ନେଇ ଦୁଲଣା କୁମ୍ଭାର ସମେତ ଅନେକ ମହିଳା ଏତଲା ଦେଇଛନ୍ତି। ତାଙ୍କ ଏତଲାକୁ ଭିତ୍ତି କରି ପୋଲିସ ଏକ ମାମଲା (ନଂ- ୨୭୫/୨୫) ରୁଜୁ କରିଛି। ସେହିପରି ଠକେଇ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ଦାବିରେ ଶନିବାର ମହିଳାମାନେ ବରଗଡ଼ ଜିଲାପାଳଙ୍କୁ ଫେରାଦ ହୋଇ ଦାବିପତ୍ର ପ୍ରଦାନ କରିଛନ୍ତି।
ସୂଚନା ଅନୁଯାୟୀ, ଭଟଲି ବ୍ଲକ ଅନ୍ତର୍ଗତ ବାଞ୍ଜିପାଲି ଗ୍ରାମର ଜଣେ ମହିଳା ଝାଡୁଦାର ନିଯୁକ୍ତି ଦେବା ପ୍ରତିଶ୍ରୁତି ଦେଇ ଉକ୍ତ ବ୍ଲକର କମଗାଁ ଗ୍ରାମର ଦୁଲଣା କୁମ୍ଭାରଙ୍କ ସମେତ ଅନେକ ମହିଳାଙ୍କଠାରୁ ଜଣ ପ୍ରତି ୧୩ହଜାର ଟଙ୍କା ଲେଖାଏ ନେଇଥିଲେ। ବରଗଡ଼ -ଭଟଲି ରାସ୍ତାରେ ଝାଡୁ ମାରିବା ପାଇଁ ସ୍ଥାନ ମଧ୍ୟ ଦେଖାଇଥିଲେ। ସେହି କ୍ରମରେ ଗତ ସେପ୍ଟେମ୍ବର ୨୫ରୁ ମହିଳାମାନେ ଝାଡୁ ମାରିବା ମଧ୍ୟ ଆରମ୍ଭ କରିଥିଲେ। ମାତ୍ର ଗତ ୨୩ତାରିଖ ନିଯୁକ୍ତି ଦେଇଥିବା ସମ୍ପୃକ୍ତ ମହିଳା କାମ ବନ୍ଦ ହୋଇଗଲା ବୋଲି କହିଥିଲେ। ତେବେ କାମ ବନ୍ଦ ହୋଇଗଲେ ସମସ୍ତ ଟଙ୍କା ଫେରାଇବାକୁ ସମ୍ପୃକ୍ତ ମହିଳା କହିଥିଲେ। କିନ୍ତୁ ଏବେ ସେ ଟଙ୍କା ଫେରାଉ ନଥିବା ଅଭିଯୋଗ ହୋଇଛି। ଗତ କିଛିଦିନ ତଳେ ଭେଡେନ ଅଞ୍ଚଳର ମହିଳାମାନେ ମଧ୍ୟ ଅନୁରୂପ ଅଭିଯୋଗ କରିଥିଲେ। ତେବେ କେବଳ ଭଟଲି, ଭେଡେନ ନୁହେଁ, ବରଗଡ଼ ଜିଲାର ଅନ୍ୟ ବ୍ଲକର ମହିଳାମାନେ ମଧ୍ୟ ଏଭଳି ଠକେଇର ସମ୍ମୁଖୀନ ହୋଇଥିବା ସାଧାରଣରେ ଆଲୋଚନା ହେଉଛି।
