କୋକସରା,୧୬ା୭(ଡି.ଏନ୍.ଏ.): କୋକସରା ଥାନା ମୋଟେର ଫାଣ୍ଡି ଅନ୍ତର୍ଗତ ଘୁମେରଗୁଡ଼ା ଗାଁରେ ଜଣେ ମହିଳାଙ୍କ ସନ୍ଦେହଜନକ ଅବସ୍ଥାରେ ମୃତଦେହ ଜବତ କରିଛି ପୋଲିସ। ମାସକ ତଳେ ପ୍ରେମ ବିବାହ କରି ଯୁବକଙ୍କ ଘରେ ରହୁଥିବା ବେଳେ ମହିଳାଙ୍କ ଅସ୍ବାଭାବିକ ମୃତ୍ୟୁକୁ ନେଇ ବାପଘର ଲୋକେ ଝିଅକୁ ହତ୍ୟା କରିଥିବା ନେଇ କୋକସରା ଥାନାରେ ଅଭିଯୋଗ ଆଣିଛନ୍ତି।
ସୂଚନାନୁଯାୟୀ, ଚାରବାହାଲ ପଞ୍ଚାୟତ ଘୁମେରଗୁଡ଼ା ଗ୍ରାମର ଯୁବକ ଧନଞ୍ଜୟ ଲହଜଳ (୨୮) ପୂର୍ବରୁ ଏକ ହତ୍ୟା ଘଟଣାରେ ଜେଲ୍ରୁ ପାରୋଲରେ ଆସିଥିବା ବେଳେ ଧର୍ମଗଡ଼ ବ୍ଲକ ପର୍ଲା ଗାଁର ମଛିନ୍ଦ୍ର ଗୋପାଳଙ୍କ ଝିଅ ଲତା ଗୋପାଲ ସହ ପ୍ରେମ ସମ୍ପର୍କ ଯୋଡ଼ି ହୋଇଥିଲା। ମାସେ ତଳେ ପ୍ରେମ ବିବାହ କରି ଲତାଙ୍କୁ ନିଜ ଘରକୁ ଆଣିଥିଲେ ପ୍ରେମିକ ଧନଞ୍ଜୟ। ତେବେ ଶୁକ୍ରବାର ମଧ୍ୟାହ୍ନରେ ଧନଞ୍ଜୟ ଲତାଙ୍କ ବାପଘରକୁ ଫୋନ୍ କରି ତମ ଝିଅ ଆତ୍ମହତ୍ୟା କରଛି ବୋଲି କହିଥିବା ବେଳେ ଖବର ଶୁଣି ଲତାଙ୍କ ବାପଘର ଲୋକେ ଆସି ଘଟଣା ସମ୍ପର୍କରେ ମୋଟେର ଫାଣ୍ଡିରେ ଝିଅକୁ ହତ୍ୟା କରାଯାଇଥିବା ଅଭିଯୋଗ କରିଥିଲେ। ଅଭିଯୋଗ ପରେ ପୋଲିସ ପଦକ୍ଷେପ ନେଇ ଘଟଣାସ୍ଥଳରେ ପହଞ୍ଚି ପାରିପାର୍ଶ୍ୱିକ ଅବସ୍ଥା ଅନୁଧ୍ୟାନ ସହ ଉଭୟ ପକ୍ଷଙ୍କ ବୟାନ ନେବା ପରେ ଧନଞ୍ଜୟଙ୍କୁ ପଚରାଉଚରା ପାଇଁ କୋକସରା ଥାନାରେ ଆଣି ଅଟକ ରଖିଛନ୍ତି। ଶନିବାର ସକାଳୁ ଧର୍ମଗଡ଼ ଉପଖଣ୍ଡ ପୋଲିସ ଅଧିକାରୀ ଧୀରଜ କୁମାର ଚୋପଦାରଙ୍କ ନେତୃତ୍ୱରେ ସାଇଣ୍ଟିଫିକ୍ ଟିମ୍ ସହ ଆମପାଣି ପୋଲିସ ଆଇଆଇସି ଚତୁର୍ଭୁଜ ନାଏକ, ତଦନ୍ତକାରୀ ସବ୍ ଇନ୍ସପେକ୍ଟର ଗୋପବନ୍ଧୁ ନାଏକ, ମୋଟେର ଫାଣ୍ଡି ଅଧିକାରୀ ମନୋରଞ୍ଜନ ଆଚାର୍ଯ୍ୟ ମୃତଦେହ ଜବତ କରିବା ସହ ସାଇଣ୍ଟିଫିକ୍ ଟିମ୍ର ତଦନ୍ତ ପରେ କୋକସରା ହସ୍ପିଟାଲରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ କୋକସରା ଥାନାରେ ଏକ ଅପମୃତ୍ୟୁ ମାମଲା ୧୬୪/୨୨ରେ ମାମଲା ରୁଜୁ କରି ତଦନ୍ତ ଜାରି ରଖିବା ସହ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ହତ୍ୟା ନା ଆତ୍ମହତ୍ୟା ତାହା ସ୍ପଷ୍ଟ ହେବ ବୋଲି ତଦନ୍ତକାରୀ ପୋଲିସ ଅଧିକାରୀ ସୂଚନା ଦେଇଛନ୍ତି।
