କେନ୍ଦୁଝର,୩୧ା୮(ସ୍ବ.ପ୍ର.): କେନ୍ଦୁଝରର ଜୁଡ଼ିଆ ଘାଟି ନିକଟରେ ଥିବା ଓୟୁଏଟି ପରିସରରେ ଗତ ୨୫ ତାରିଖରେ ବିଦ୍ୟୁତ୍ ଆଘାତରେ ଦୁଇ ମାଈ ହାତୀଙ୍କ ମୃତ୍ୟୁ ଘଟିଥିଲା। ଏହି ଘଟଣାରେ ଟାଟା ପାଓ୍ବାର (ବିଦ୍ୟୁତ୍ ବିଭାଗ) ପକ୍ଷରୁ ରକ୍ଷଣାବେକ୍ଷଣ କରୁଥିବା ଠିକାସଂସ୍ଥା ଜି.ଭି.ଇଲେକ୍ଟ୍ରିକାଲର ସୁପରଭାଇଜରଙ୍କୁ ନିଲମ୍ବନ କରାଯାଇଛି। ଠିକ୍ ଭାବରେ ବିଦ୍ୟୁତ୍ ତାରର ନିରୀକ୍ଷଣ କରି ନ ଥିବାରୁ ଦୁଇ ହାତୀଙ୍କର ମୃତ୍ୟୁ ହୋଇଥିବା ତାଙ୍କୁ ଦାୟୀ କରି ଏଭଳି ପଦକ୍ଷେପ ନିଆଯାଇଥିବା ଜଣାପଡ଼ିଛି। ତେବେ ଓୟୁଏଟି ପରିସରରେ ଦୀର୍ଘ ବର୍ଷ ହେଲା ହାତୀମାନଙ୍କ ଚଳପ୍ରଚଳ ରହୁଥିଲେ ହେଁ ବିଦ୍ୟୁତ ତାରରେ ଲାଗିଥିବା ଗଛଲତା ସଫା କରା ନ ଯିବା, ବିଦ୍ୟୁତ ବିଚ୍ଛେଦ ହେବା ପାଇଁ ବ୍ରେକର ବ୍ୟବସ୍ଥା ଲଗା ନ ଯିବା ଆଦିର ସମୀକ୍ଷା କରିଥିଲେ ଏଭଳି ଅଘଟଣ ଘଟି ନ ଥାନ୍ତା ବୋଲି ମତ ପ୍ରକାଶ ପାଉଛି। ବିଦ୍ୟୁତ୍ ଓ ବନ ବିଭାଗ ମଧ୍ୟରେ ନିୟମିତ ସମନ୍ବୟ ବୈଠକ ବସୁଥିଲେ ହେଁ ଏହାକୁ ନେଇ ଆଲୋଚନା କାହିଁକି ହୋଇନାହିଁ ଏବଂ ସେଥିପାଇଁ କିଏ ଦାୟୀ ତାହା ତଦନ୍ତସାପେକ୍ଷ। ବନ ବିଭାଗ ହାତୀ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ କରିଥିଲେ ହେଁ ଖିଲାପୀଙ୍କ ବିରୋଧରେ ମାମଲା ରୁଜୁ କରିବାରେ ବିଳମ୍ବ କରୁଥିବାରୁ ସନ୍ଦେହ ଉପୁଜିଛି। ସେହିପରି ଘଟଣା ଦିନ ବିଦ୍ୟୁତ ବିଭାଗକୁ ନିୟମାନୁଯାୟୀ ହାତୀମାନଙ୍କ ଓୟୁଏଟି କ୍ୟାମ୍ପସମୁହାଁ ସୂଚନା ଜଣାଯାଇ ନ ଥିଲା। ଏଣୁ ତଦନ୍ତ ସଠିକ୍ ଭାବରେ ନ କରି ବରିଷ୍ଠ ଅଧିକାରୀଙ୍କୁ ଘଣ୍ଟ ଘୋଡ଼ାଇ ତଳିଆ କର୍ମଚାରୀଙ୍କୁ ନିଲମ୍ବନ କରି ଉଭୟ ବିଭାଗ ଏଭଳି ସମ୍ବେଦନଶୀଳ ଘଟଣାକୁ ଦିଗହରା କରିବାକୁ ଉଦ୍ୟମ କରୁଥିବାରୁ ଏହାର ଉଚ୍ଚସ୍ତରୀୟ ତଦନ୍ତ ଦାବି ହେଉଛି।
