ବନ୍ତ,୮।୧୦(ଡି.ଏନ.ଏ.)-ରୁଚି ଥିବା ଖେଳକୁ ଛାଡ଼ିବା ଠିକ୍ ନୁହେଁ। ଖେଳରେ ଉତ୍ଥାନ ପତନ ଲାଗି ରହିଥାଏ। ଆତ୍ମବିଶ୍ୱାସ ରଖି ଧୈର୍ଯ୍ୟର ସହ ଆଗକୁ ଗଲେ ଭବିଷ୍ୟତରେ ଜଣେ ଭଲ କ୍ରୀଡ଼ାବିତ୍ ହୋଇପାରିବେ ବୋଲି କହନ୍ତି ଭଦ୍ରକ ଜିଲା ବନ୍ତ ବ୍ଲକ ଗଣିଜାଙ୍ଗ ଗ୍ରାମର ଯୁବ କ୍ରୀଡ଼ାବିତ୍ ବିସ୍ମିତ ରଞ୍ଜନ ନାୟକ। ବୟସ ଏବେ ତାଙ୍କୁ ୨୬। ଚଳିତବର୍ଷ ସେ ସମ୍ବଲପୁର ସ୍ଥିତ ସରକାରୀ ଶାରୀରିକ ଶିକ୍ଷା କଲେଜରୁ ୨ ବର୍ଷ ତାଲିମ ନେଇ ଫେରିଛନ୍ତି। ପିଲାଟି ବେଳୁ ଖେଳ ଉପରେ ଥିବା ରୁଚି ଆଗାମୀ ଦିନରେ ତାଙ୍କୁ କ୍ରୀଡ଼ା ଶିକ୍ଷକ ହେବାର ସୁଯୋଗ ଆଣି ଦେଇଥିବା ସେ କହିଛନ୍ତି।
ବାପା ସ୍ବର୍ଗତ ଭରତ କୁମାର ନାୟକ ଅନୁଗୁଳ ଜିଲା କଣିହଁା ସ୍ଥିତ ଏନ୍ଟିପିସିରେ ଚାକିରି କରିଥିଲେ। ୨୦୧୭ରେ ତାଙ୍କର ଦେହାନ୍ତ ହୋଇଗଲା। ମା’ ମନୋରମା ମହାନ୍ତି ବନ୍ତ ବ୍ଲକ ଟିଲୋ ଗଡ଼ଚଣ୍ଡି ମଇ ବିଦ୍ୟାଳୟର ଶିକ୍ଷୟିତ୍ରୀ ଭାବେ କାର୍ଯ୍ୟରତ। ବିସ୍ମିତ କଣିହାଁସ୍ଥିତ ଚିନ୍ମୟ ବିଦ୍ୟାଳୟରେ ହାଇସ୍କୁଲ ପର୍ଯ୍ୟନ୍ତ ପାଠ ପଢ଼ିଥିଲେ। ୨୦୦୮-୦୯ରେ ୧୪ବର୍ଷରୁ କମ୍ ବର୍ଗର ପିଲାଙ୍କ ପାଇଁ ମଧ୍ୟପ୍ରଦେଶ ରାଜ୍ୟର ସାଗରଠାରେ ଆୟୋଜିତ ସ୍କୁଲ ଗେମ୍ ଫେଡେରେଶନ ଅଫ୍ ଇଣ୍ଡିଆ ପ୍ରତିଯୋଗିତାରେ ସେ ଖୋଖୋ ଖେଳରେ ଭାଗ ନେଇଥିଲେ। ୨୦୦୯ରେ ତାମିଲନାଡୁର କୋଏମ୍ବାଟୁରଠାରେ ଅନୁଷ୍ଠିତ ଅଲ୍ ଇଣ୍ଡିଆ ଚିନ୍ମୟ ଖେଲ୍ ମେଲା ପ୍ରତିଯୋଗିତାରେ ଡିସ୍କସ୍ ଥ୍ରୋରେ ବ୍ରୋଞ୍ଜ ପଦକ ହାସଲ କରିଥିଲେ। ୨୦୦୯-୧୦ରେ ଝାରସୁଗୁଡ଼ାଠାରେ ରାଜ୍ୟ ସ୍ତରୀୟ ଫୁଟ୍ବଲ ଓ କେନ୍ଦ୍ରାପଡ଼ାର ଆଳିଠାରେ ଆଥ୍ଲେଟିକ୍ ପ୍ରତିଯୋଗିତାରେ ଭାଗ ନେଇଥିଲେ। ଅନୁଗୁଳ ସରକାରୀ ଜୁନିୟର କଲେଜରେ ଯୁକ୍ତ ୨ ପଢ଼ିବା ସମୟରେ ସେ ଆଥ୍ଲେଟିକ୍ ମିଟ୍ରେ ଭାଗ ନେଇ ଚାମ୍ପିୟନ ହୋଇଥିଲେ। ୨୦୧୭ରେ ସେ ଭଦ୍ରକ ଜିଲା ଧାମନଗର କଲେଜରୁ ଯୁକ୍ତ ୩ ବିଜ୍ଞାନ ପାସ୍ କରିଥିଲେ। ୨୦୨୦ରେ ସମ୍ବଲପୁର ବିଶ୍ୱବିଦ୍ୟାଳୟ ପକ୍ଷରୁ ୨୫ବର୍ଷରୁ କମ୍ ବର୍ଗର ପିଲାଙ୍କ ପାଇଁ ଆୟୋଜିତ ଇଷ୍ଟ ଜୋନ୍ କ୍ରିକେଟରେ ଭାଗ ନେଇଥିଲେ। ଏଥିରେ ବିଶ୍ୱବିଦ୍ୟାଳୟ ଟିମ୍ ରନର୍ସ ଅପ୍ ହୋଇଥିଲା। ଏହାବ୍ୟତୀତ ସେ ବିଭିନ୍ନ କ୍ରିକେଟ କ୍ଲବ ତରଫରୁ ଭଦ୍ରକ, ବାଲେଶ୍ୱର, ଯାଜପୁର, କେନ୍ଦୁଝର, ଅନୁଗୁଳ, ସମ୍ବଲପୁର ଆଦି ଜିଲାରେ ଅନୁଷ୍ଠିତ ରାଜ୍ୟସ୍ତରୀୟ କ୍ରିକେଟ ଟୁର୍ନାମେଣ୍ଟରେ ଭାଗ ନେଇ ପୁରସ୍କୃତ ହୋଇଛନ୍ତି। ଆଗାମୀ ଦିନରେ ସେ ପିଲାମାନଙ୍କୁ ଉପଯୁକ୍ତ ଶାରୀରିକ ଶିକ୍ଷା ପ୍ରଦାନ କରି ଭଲ କ୍ରୀଡ଼ାବିତ୍ ଗଠନ କରିବେ ବୋଲି ବିସ୍ମିତ କହିଛନ୍ତି।
