ଚଣ୍ଡିଖୋଲ,୩ା୧୧(ଡି.ଏନ.ଏ.): ବଡ଼ଚଣା ଥାନା ଅଧୀନ ଚଣ୍ଡିଖୋଲସ୍ଥିତ ଏକ ଘରୋଇ କଲେଜ ହଷ୍ଟେଲରେ ଜଣେ ଛାତ୍ରୀ ବୁଧବାର ଆତ୍ମହତ୍ୟା କରିଛନ୍ତି। ସେ ହେଲେ ଯାଜପୁରରୋଡ ଥାନା ଅଧୀନ କରଡ଼ିଗ୍ରାମର ରବୀନ୍ଦ୍ର ଦାସଙ୍କ ବଡ଼ଝିଅ ସ୍ମୃତିଶ୍ରୀ ଦାସ(୧୮)। ସ୍ମୃତିଶ୍ରୀ ଏହି କଲେଜର ଯୁକ୍ତ ଦୁଇ ବିଜ୍ଞାନ ଦ୍ୱିତୀୟ ବର୍ଷ ଛାତ୍ରୀ ଥିଲେ। ସନ୍ଧ୍ୟାରେ ସେ ଛାତ୍ରୀ ନିବାସର ଏକ କୋଠରି ପଙ୍ଖାରେ ଓଢ଼ଣି ଲଗାଇ ଆତ୍ମହତ୍ୟା କରିଥିବା ସୂଚନା ମିଳିଛି। ତେବେ ମୃତ ଛାତ୍ରୀଙ୍କ ପରିବାର ଲୋକେ ଘଟଣା ପାଇଁ କଲେଜ କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି। କଲେଜ କର୍ତ୍ତୃପକ୍ଷ ତାଙ୍କୁ ମାରି ଟାଙ୍ଗିଦେଇ ଆତ୍ମହତ୍ୟା ରୂପ ଦେଉଥିବା ଛାତ୍ରୀଙ୍କ ପରିବାର ଅଭିଯୋଗ କରିଛନ୍ତି। ଖବର ପାଇ ବଡ଼ଚଣା ପୋଲିସ ପହଞ୍ଚତ୍ ମୃତଦେହ ଜବତ କରି ତଦନ୍ତ ଆରମ୍ଭ କରିଛି। ଏଥିସହିତ ପୋଲିସ ସେହି କୋଠରିରୁ ଛାତ୍ରୀଙ୍କ ଏକ ହାତଲେଖା ଚିଠି ଜବତ କରିଛି।
ସୂଚନା ମୁତାବକ, ସ୍ମୃତିଶ୍ରୀ ସନ୍ଧ୍ୟାରେ ନିଜ କୋଠରିରେ ରହି ଭିତରୁ କବାଟ ଦେଇ ଦେଇଥିଲେ। କେତେକ ସହପାଠୀ ତାଙ୍କୁ ଡାକିଥିଲେ ମଧ୍ୟ ଶୁଣି ନ ଥିଲେ। ପରେ କଲେଜ କର୍ମଚାରୀ କବାଟ ତାଡ଼ି ପଙ୍ଖାରୁ ଝୁଲନ୍ତା ଅବସ୍ଥାରେ ସ୍ମୃତିଶ୍ରୀଙ୍କୁ ଉଦ୍ଧାର କରିଥିଲେ। ଏନେଇ ପୋଲିସକୁ ଖବର ଦିଆଯାଇଥିଲା। ପୋଲିସ ପହଞ୍ଚି ତହସିଲଦାରଙ୍କ ଉପସ୍ଥିତିରେ ମୃତଦେହ ନିଜ ହେପାଜତକୁ ନେଇଛି। ମୃତଛାତ୍ରୀଙ୍କ ଚିଠିରେ ଲଖାଯାଇଛି, ମଣିଷ ଜନ୍ମ ବହୁତ କଷ୍ଟ। ହେ ପ୍ରଭୁ ମୋତେ ଆସନ୍ତା ଜନ୍ମକୁ ମଣିଷ ଜନ୍ମ ଦେବ ନାହିଁ। ମା’ବାପାଙ୍କୁ କ୍ଷମା ମାଗିବା ସହ ମୁଁ କିଛି ବି କରିନାହଁ, କିନ୍ତୁ, ମୋ ଉପରେ ସମସ୍ତେ ଦୋଷ ଲଦୁଥିବା ଆଦି ବିଭିନ୍ନ କଥା ଲେଖାଅଛି। ଖବର ପାଇ ଛାତ୍ରୀଙ୍କ ପରିବାର ଘଟଣାସ୍ଥଳରେ ପହଞ୍ଚିଛନ୍ତି। ଛାତ୍ରୀଙ୍କ ବାପା ରବୀନ୍ଦ୍ର ଦାସ ଓ ମା’ ମଧୁସ୍ମିତା ଦାସ କହିଛନ୍ତି, ଗତ ମାସ ୨୪ ତାରିଖରେ ଝିଅ ଘରୁ କଲେଜକୁ ଆସିଥିଲା। ସେ ସମ୍ପୂର୍ଣ୍ଣ ସ୍ବଭାବିକ ରହିଥିଲା। କଲେଜ କର୍ତ୍ତୃପକ୍ଷଙ୍କ ପାଇଁ ଝିଅର ମୃତ୍ୟୁ ଘଟିଥିବା ସେମାନେ ଗଣମାଧ୍ୟମ ସମ୍ମୁଖରେ କହିଛନ୍ତି। ଏନେଇ କଲେଜ କର୍ତ୍ତୃପକ୍ଷ ମୁହଁ ଖୋଲିନାହାନ୍ତି। ବଡ଼ଚଣା ଥାନା ଅଧିକାରୀ ପ୍ରିୟବ୍ରତ ରାଉତ କହିଛନ୍ତି, ଘଟଣାର ତଦନ୍ତ ଆରମ୍ଭ ହୋଇଛି। ଖୁବଶୀଘ୍ର କଲେଜ କର୍ତ୍ତୃପକ୍ଷ ଓ ମୃତ ଛାତ୍ରୀଙ୍କ ପରିବାରକୁ ପଚରାଉଚୁରା କରାଯିବ। ଏହାପରେ ସମ୍ପୂର୍ଣ୍ଣ ଘଟଣା ଜଣାପଡ଼ିବ।
