ଭୁବନେଶ୍ୱର,୨।୭(ବ୍ୟୁରୋ): ହଷ୍ଟେଲରୁ ମିଳିଲା ଛାତ୍ରୀଙ୍କ ମୃତଦେହ। ବିଜେବି ମହାବିଦ୍ୟାଳୟର ଯୁକ୍ତ ୩ କଳାର ପ୍ରଥମ ବର୍ଷ ଛାତ୍ରୀ ରୁଚିକା ମହାନ୍ତିଙ୍କ ମୃତଦେହ ଶନିବାର କମିଶନରେଟ ପୋଲିସ ଜବତ କରିଛି। ସେ ଆତ୍ମହତ୍ୟା କରିଛନ୍ତି କି ନା ତାହା ଜଣାପଡ଼ି ନ ଥିବା ବେଳେ ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି।
ରୁଚିକାଙ୍କ ଘର କଟକ ଜିଲା କଖଡ଼ି ଗାଁରେ। ସେ ପ୍ରଥମ ବର୍ଷରେ ପୁଥିଲେ ମଧ୍ୟ ୟୁପିଏସ୍ସି ପାଇଁ ପଢ଼ାପଢ଼ି କରୁଥିଲେ। ସେ ଅସୁସ୍ଥ ଅନୁଭବ କରୁଥିବାରୁ ଅନେକ ସମୟରେ କ୍ଲାସ ନ ଯାଇ ହଷ୍ଟେଲ ରୁମ୍ରେ ପଢ଼ାପଢ଼ି କରୁଥିଲେ। ସେ ଶନିବାର ମଧ୍ୟ କ୍ଲାସ କରିବାକୁ ଯାଇ ନ ଥିଲେ। ସାଙ୍ଗମାନେ କ୍ଲାସ କରିବା ପାଇଁ ଗଲା ପରେ ରୁଚିକା ଏକୁଟିଆ ରୁମ୍ରେ ଥିଲେ। ପୂର୍ବାହ୍ନରେ କ୍ଲାସ ସରିବା ପରେ ଛାତ୍ରୀମାନେ ରୁମ୍କୁ ଫେରିଥିଲେ। ହେଲେ କବାଟ ଭିତର ପାର୍ଶ୍ୱରୁ ବନ୍ଦ ଥିବା ଦେଖିବାକୁ ପାଇଥିଲେ। ଯେତେ ଡାକିଲେ ବି ରୁଚିକା ଖୋଲିନଥିଲେ। ପରେ ଛାତ୍ରୀମାନେ ସନ୍ଦେହ କରି ହଷ୍ଟେଲ ସୁପରିନ୍ଟେଣ୍ଡେଣ୍ଟଙ୍କୁ ଜଣାଇଥିବା ବନ୍ଧୁମାନେ କହିଛନ୍ତି।
ଅପରପକ୍ଷେ କଲେଜ କର୍ତ୍ତୃପକ୍ଷ ଥାନାକୁ ଘଟଣା ସମ୍ପର୍କରେ ସୂଚନା ଦେଇଥିଲେ । କମିଶନରେଟ ପୋଲିସର ଉପସ୍ଥିତିରେ ଶାବଳରେ କବାଟ ଭଙ୍ଗା ଯାଇଥିଲା। ସେହି ସମୟରେ ରୁଚିକା ତା’ ବେଡ୍ର କାନ୍ଥକୁ ମୁହଁ କରି ପେଟେଇ ଶୋଇଥିବା ଦେଖିବାକୁ ମିଳିଥିଲା। ସେତେବେଳକୁ ତାଙ୍କ ମୃତ୍ୟୁ ହୋଇଥିବା ଜଣାପଡ଼ିଥିଲା। ପରେ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା।
