ପାଟଣା,୨୩ା୧୨(ସ୍ବ.ପ୍ର.): କେନ୍ଦୁଝର ଜିଲା ପାଟଣା ତହସିଲ ସମ୍ମୁଖରେ ଶୁକ୍ରବାର ଭାଜପାର ନଦୀ ସୁରକ୍ଷା ସମିତି ପକ୍ଷରୁ ବେଆଇନ ବାଲି ଉତ୍ତୋଳନ ଚୋରାଚାଲାଣକୁ ବିରୋଧ କରି ପ୍ରତିବାଦ ସମାବେଶ ଅନୁଷ୍ଠିତ ହୋଇଛି। ଏହି ବେଆଇନ ବାଲି ବ୍ୟବସାୟ ପଛରେ ରାଜସ୍ବ ଓ ପୋଲିସ ପ୍ରଶାସନର ସିଧାସଳଖ ସମ୍ପୃକ୍ତି ରହିଥିବା ଭାଜପା ନେତାମାନେ ଅଭିଯୋଗ କରିଥିଲେ। ଆୟୋଜିତ ପ୍ରତିବାଦ ସମାବେଶ ନଦୀ ସୁରକ୍ଷା ସମିତିର ଜିଲା ସଂଯୋଜକ ସୁବ୍ରତ ମହାନ୍ତିଙ୍କ ସଂଯୋଜନାରେ ଅନୁଷ୍ଠିତ ହୋଇଥିଲା। ରାଜ୍ୟ ନଦୀ ସୁରକ୍ଷା ସମିତିର ରାଜ୍ୟ ସଭାପତି ମହେଶ୍ୱର ସାହୁ, ରାଜ୍ୟ କୃଷକ ମୋର୍ଚ୍ଚା ଉପ ସଭାପତି ରାଧାକାନ୍ତ ମହାନ୍ତ, ବରିଷ୍ଠ ଭାଜପା ନେତା ଅଖିଳ ଚନ୍ଦ୍ର ନାଏକ, କମଳାକାନ୍ତ ଦାଶ, ଅଭୟ କୁମାର ବେହେରା, ପ୍ରହଲ୍ଲାଦ ପଳେଇ, ରାଜେଶ କୁମାର ମହାନ୍ତ ହୃଷୀକେଶ ସାହୁ ପ୍ରମୁଖ ଯୋଗ ଦେଇ ପ୍ରଶାସନର ବାଲିମାଫିଆଙ୍କ ସହ ସମ୍ପୃକ୍ତିକୁ ନେଇ କଡ଼ା ସମାଲୋଚନା କରିଥିଲେ। ପାଟଣା ତହସିଲ ଅଞ୍ଚଳରେ ଚୋରା ବାଲି ଚାଲାଣ ରୋକିବାରେ ପ୍ରଶାସନ ଅଙ୍କୁଶ ନ ଲଗାଇଲେ ଆଗାମୀ ଦିନରେ ନଦୀ ସୁରକ୍ଷା ସମିତି ପକ୍ଷରୁ ତହସିଲ ଘେରାଉ କରାଯିବା ସହ ବାଲି ଗାଡ଼ିଗୁଡ଼ିକୁ ନଦୀ ସୁରକ୍ଷା ସମିତି ପକ୍ଷରୁ ଅଟକ ରଖାଯିବ ବୋଲି ମହେଶ୍ବର ସାହୁ ଚେତାବନୀ ଦେଇଥିଲେ। ଏହା ପରେ ନଦୀ ସୁରକ୍ଷା ସମିତି ପକ୍ଷରୁ ଏକ ପ୍ରତିନିଧି ମଣ୍ଡଳୀ ବେଆଇନ ବାଲି ଚାଲାଣ ରୋକିବା ପାଇଁ ପାଟଣା ତହସିଲଦାର ତାପସ ରଞ୍ଜନ ଦେହୁରୀଙ୍କୁ ଦାବିପତ୍ର ପ୍ରଦାନ କରିଛନ୍ତି। ପାଟଣା ତହସିଲ ଅନ୍ତର୍ଗତ ବୈତରଣୀ ନଦୀର ପାଟଣା,ଡୁମୁରିଆ,ତୁରୁମୁଙ୍ଗା,ରାଜନଗର ଏବଂ ଉଦୟପୁର ବାଲିଘାଟରୁ ଦିନରାତି ବେଆଇନ ଭାବରେ ମେଶିନ ଲଗାଇ ଶହଶହ ଟ୍ରିପ୍ ବାଲି ଚୋରାଚାଲାଣ ହେଉଥିଲେ ମଧ୍ୟ ପୋଲିସ ଓ ରାଜସ୍ବ ବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ ବୋଲି ଅଭିଯୋଗ କରି ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଥିଲେ।
