ମୁମ୍ବାଇ,୧୭।୯: ମହାରାଷ୍ଟ୍ରର ନାଶିକ ଜିଲା ନିଫାଡ଼ରେ ବୁଲା କୁକୁରଙ୍କ ସମସ୍ୟାକୁ ନେଇ ଏକ ଅଭିନବ ଢଙ୍ଗରେ ପ୍ରତିବାଦ କରାଯାଇଛି । UBT ଶିବସେନାର ଯୁବ ନେତା ବିକ୍ରମ ରନ୍ଧାୱେ ଏକ ବ୍ୟାଗରେ ବୁଲା କୁକୁରକୁ ଧରି ନିଫାଡ଼ ନଗର ପଞ୍ଚାୟତର ଚିଫ୍ ଅଫିସରଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ସେଠାରେ ବ୍ୟାଗ ଖୋଲି କୁକୁରଟିକୁ ଅଧିକାରୀଙ୍କ ଟେବୁଲ୍ ଉପରେ ଛାଡ଼ି ଦେଇଥିଲେ ।
ଘଟଣାର ଭିଡିଓ ସାମ୍ନାକୁ ଆସିବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି । ପ୍ରଦର୍ଶନକାରୀମାନେ ନଗର ପଞ୍ଚାୟତର କାର୍ଯ୍ୟଶୈଳୀକୁ ନେଇ ଅସନ୍ତୋଷ ପ୍ରକାଶ କରିବା ସହ ଚିଫ୍ ଅଫିସର ଧୀରଜ ଭାମରେଙ୍କ ଟେବୁଲ୍ ଉପରେ ନୋଟ୍ର ମାଳା ରଖି ତାଙ୍କୁ ପିନ୍ଧାଇଥିଲେ। ବିକ୍ରମ ରନ୍ଧାୱେଙ୍କ ଅଭିଯୋଗ ଅନୁସାରେ, ନିଫାଡ଼ ସହର ଓ ଏହାର ଆଖପାଖ ଅଞ୍ଚଳରେ ବୁଲା କୁକୁରଙ୍କ ସଂଖ୍ୟା ବଢ଼ିଚାଲିଛି । ଏହା ଯୋଗୁଁ ଶିଶୁ, ବୟସ୍କ ଓ ମହିଳାମାନେ ସମସ୍ୟାରେ ପଡ଼ୁଛନ୍ତି । ରାସ୍ତାରେ ଯାତାୟାତ କରୁଥିବା ଲୋକେ ମଧ୍ୟ ଭୟରେ ଯାଉଥିବା ସେ ଦାବି କରିଛନ୍ତି । ଅନେକ ଲୋକଙ୍କୁ ବୁଲା କୁକୁର କାମୁଡ଼ିଥିବା ମଧ୍ୟ ରନ୍ଧାୱେ ଦାବି କରିଛନ୍ତି।
ପ୍ରଦର୍ଶନକାରୀଙ୍କ କହିବା ଅନୁସାରେ, ଏହି ସମସ୍ୟା ନେଇ ନଗର ପଞ୍ଚାୟତକୁ ଏକାଧିକ ଥର ଅଭିଯୋଗ ଓ ଲିଖିତ ଦାବିପତ୍ର ଦିଆଯାଇଛି । କିନ୍ତୁ ବୁଲା କୁକୁରଙ୍କ ସଂଖ୍ୟା କମାଇବା ନେଇ ଠୋସ୍ ପଦକ୍ଷେପ ନିଆଯାଇନଥିବା ସେମାନେ ଅଭିଯୋଗ କରିଛନ୍ତି । କୁକୁରକୁ ଅଫିସରଙ୍କ ଟେବୁଲ୍ ଉପରେ ଛାଡ଼ିବା ପରେ ପ୍ରଦର୍ଶନକାରୀମାନେ ନୋଟ୍ର ମାଳା ମାଧ୍ୟମରେ ମଧ୍ୟ ପ୍ରଶାସନକୁ ତାତ୍ସଲ୍ୟ କରିଥିଲେ । ଏହା ମାଧ୍ୟମରେ ନଗର ପଞ୍ଚାୟତର କାର୍ଯ୍ୟପ୍ରଣାଳୀ ଉପରେ ପ୍ରଶ୍ନ ଉଠାଯାଇଥିଲା।
ରନ୍ଧାୱେଙ୍କ ଅଭିଯୋଗ ଅନୁସାରେ, କେବଳ ଅଭିଯୋଗ ଗ୍ରହଣ କରିଦେଲେ ସମସ୍ୟାର ସମାଧାନ ହେବନାହିଁ । ବୁଲା କୁକୁରଙ୍କୁ ଧରିବା ଏବଂ ସଂଖ୍ୟା ନିୟନ୍ତ୍ରଣ ପାଇଁ ମାଟିସ୍ତରରେ ପଦକ୍ଷେପ ନେବା ଆବଶ୍ୟକ ବୋଲି ସେ କହିଛନ୍ତି । ଗଣେଶୋତ୍ସବ ସମୟରେ ମଧ୍ୟ ବୁଲା କୁକୁରଙ୍କ ଯୋଗୁଁ ଲୋକଙ୍କୁ ସମସ୍ୟା ହେଉଥିବା ରନ୍ଧାୱେ ଦାବି କରିଛନ୍ତି । ଗଣେଶ ମଣ୍ଡପକୁ ଯିବା ସମୟରେ ମଧ୍ୟ ଲୋକେ ଭୟଭୀତ ହେଉଥିବା ସେ କହିଛନ୍ତି।
ପ୍ରଦର୍ଶନକାରୀମାନେ ତୁରନ୍ତ ବୁଲା କୁକୁରଙ୍କ ନସବନ୍ଦୀ ଅଭିଯାନ ଆରମ୍ଭ କରିବା, କୁକୁରଙ୍କୁ ଧରିବା ପାଇଁ ବ୍ୟବସ୍ଥା କରିବା ଏବଂ ସମସ୍ୟା ନିୟନ୍ତ୍ରଣ ପାଇଁ ପଦକ୍ଷେପ ନେବାକୁ ନଗର ପଞ୍ଚାୟତକୁ ଦାବି କରିଛନ୍ତି । ରନ୍ଧାୱେ ଅଭିଯୋଗ କରିଛନ୍ତି ଯେ ଦୀର୍ଘଦିନ ଧରି ଏହି ପ୍ରସଙ୍ଗ ଉଠାଯାଉଥିଲେ ମଧ୍ୟ ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉନାହିଁ। ଯଦି ଶୀଘ୍ର ସମାଧାନ ନହୁଏ, ତେବେ ପୁଣି ଥରେ ପ୍ରତିବାଦ କରାଯିବ ବୋଲି ସେ ଚେତାବନୀ ଦେଇଛନ୍ତି ।
