ବାରିପଦା ଅଫିସ,୧୦ା୧୨: ମୟୂରଭଞ୍ଜ ଜିଲାକୁ ସ୍ବତନ୍ତ୍ର ରାଜ୍ୟ ପାହ୍ୟା ପ୍ରଦାନ ଦାବିରେ ଅଣରାଜନୈତିକ ସଂଗଠନ ଭଞ୍ଜସେନା ପକ୍ଷରୁ ଶୁକ୍ରବାର ୪ଦଫା ସମ୍ବଳିତ ଦାବିପତ୍ର ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଛି। ସେନାର ଜିଲା ସଭାପତି ପିଣ୍ଟୁ ମାଇତିଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଜିଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ଅକ୍ଷୟ ସୁନୀଲ ଅଗ୍ରୱାଲଙ୍କୁ ଭେଟି ଏହି ଦାବିପତ୍ର ପ୍ରଦାନ କରିଛନ୍ତି। ଏହା ସହିତ ପ୍ରଧାନମନ୍ତ୍ରୀ, ରାଜ୍ୟପାଳ ଓ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ମଧ୍ୟ ଦାବିପତ୍ର ଦେଇଛନ୍ତି।
ଅଭିଯୋଗ ଅନୁଯାୟୀ, ମୟୂରଭଞ୍ଜ ଗଡ଼ଜାତ ରାଜ୍ୟ ମିଶ୍ରଣକୁ ୭୩ବର୍ଷ ପୂରି ଥିଲେ ମଧ୍ୟ ଜିଲାରେ ବିକାଶ ଅପହଞ୍ଚ ପାଲଟିଛି। ମିଶ୍ରଣ ପୂର୍ବରୁ ଏକ ସମୃଦ୍ଧ ସ୍ବାଧୀନ ରାଜ୍ୟ ଥିବା ମୟୂରଭଞ୍ଜ ବର୍ତ୍ତମାନ ଏକ ଅନୁନ୍ନତ ଜିଲା ଭାବେ ପରିଗଣିତ ହେଉଛି। ଶିକ୍ଷା, ସ୍ବାସ୍ଥ୍ୟ, କୃଷି, ଶିଳ୍ପ, ପର୍ଯ୍ୟଟନସ୍ଥଳୀ, ଗମନାଗମନ, ଜଳସେଚନ, ବାଣିଜ୍ୟ ବ୍ୟବସାୟ ଆଦି ସବୁ କ୍ଷେତ୍ରରେ ଜିଲାବାସୀ ଅବହେଳିତ। ଦାଦନ ଶ୍ରମିକଠାରୁ ଆରମ୍ଭ କରି ବେକାରୀ ସମସ୍ୟା ଦ୍ରୁତ ଗତିରେ ବୃଦ୍ଧି ପାଉଛି ା ଜିଲା ସୀମାନ୍ତରେ ଝାଡ଼ଖଣ୍ଡ ଓ ପଶ୍ଚିମବଙ୍ଗ ରାଜ୍ୟ ରହିଥିବା ବେଳେ ବାଂଲାଦେଶୀ ଅନୁପ୍ରବେଶକାରୀଙ୍କୁ ରୋକିବାରେ ପ୍ରଶାସନ ବିଫଳ ହୋଇଛି। ଜିଲାରେ ପ୍ରାକୃତିକ ଭିତ୍ତିଭୂମିର ଅଭାବ ନ ଥିବା ବେଳେ ପର୍ଯ୍ୟଟନ ଶିଳ୍ପ ପ୍ରତି ଆଦୌ ଗୁରୁତ୍ୱ ଦିଆଯାଉ ନାହିଁ। ୧୯୪୯ ଜାନୁୟାରୀ ୧ତାରିଖରେ ଭାରତ ସରକାର ଓଡ଼ିଶା ରାଜ୍ୟକୁ ମୟୂରଭଞ୍ଜର ଶାସନ ଭାର ହସ୍ତାନ୍ତର କରିବା ପରେ ଜିଲାରେ ଯେପରି ବିକାଶ ହେବା କଥା ତାହା ସମ୍ପୂର୍ଣ୍ଣ ବାଟବଣା ହୋଇଯାଇଛି। ଏହାକୁ ଦୃଷ୍ଟିରେ ରଖି ଭଞ୍ଜସେନା ପୂର୍ବ ରାଜ୍ୟ ଫେରାଇ ଦେବାକୁ ସ୍ବର ଉତ୍ତୋଳନ କରିଛି। ମୟୂରଭଞ୍ଜର ତକତ୍ାଳୀନ ମହାରାଜା ପ୍ରତାପଚନ୍ଦ୍ର ଭଞ୍ଜଦେଓ ଏବଂ ଭାରତ ସରକାରଙ୍କ ରାଜ୍ୟ ସମୂହ ମନ୍ତ୍ରାଳୟ ଶାସନ ସଚିବ ଏମ୍କେ ଭେଲୋଡିଙ୍କ ଦସ୍ତଖତରେ ଯେଉଁ ଚୁକ୍ତିନାମା ସ୍ବାକ୍ଷର ହୋଇଥିଲା ତାହା ସାର୍ବଜନୀନ କରିବା, ମିଶ୍ରଣ ଚୁକ୍ତିକୁ କାର୍ଯ୍ୟକାରୀ କରିବା, ମୟୂରଭଞ୍ଜ ମଧ୍ୟରେ ଥିବା ୪ ଉପଖଣ୍ଡକୁ ଜିଲାର ମାନ୍ୟତା ପ୍ରଦାନ କରିବା, ଉଦଳା ଓ କରଞ୍ଜିଆ ଏନ୍ଏସିକୁ ମ୍ୟୁନସିପାଲିଟି ମାନ୍ୟତା ପ୍ରଦାନ କରିବା, ନୂତନ ଭାବେ ବେତନଟୀ ଓ ଯଶିପୁରକୁ ଏନ୍ଏସି ମାନ୍ୟତା ପ୍ରଦାନ କରିବାକୁ ଦାବିପତ୍ରରେ ଉଲ୍ଲେଖ ରହିଛି। ଅନ୍ୟମାନଙ୍କ ମଧ୍ୟରେ ଶୁଭେନ୍ଦୁ ମହାନ୍ତି, ସତ୍ୟସ୍ବରୁପ ଦାସ, ଉପାଧ୍ୟକ୍ଷ ନିମାଇଁ ତ୍ରିପାଠୀ, ଜିତେନ୍ଦ୍ର ହେମ୍ବ୍ରମ, ମହମ୍ମଦ ଖାନ, ବାଜୁନ ହଁାସଦା, ରାକେଶ ବେହେରା, ରମଜାନ ବେଗ, ସାମନ୍ତ ଚନ୍ଦ୍ର ଶେଖର ପାଲ, ଏସ.କେ. ରାଜାଖାନ, ମାନସ ବେହେରା, ସୌମ୍ୟ ରଞ୍ଜନ ମିଶ୍ରଙ୍କ ସମେତ କାର୍ଯ୍ୟକର୍ତ୍ତାମାନେ ଉପସ୍ଥିତ ଥିଲେ ା
