କଲମ୍ବୋ,୨୬।୧: ଶ୍ରୀଲଙ୍କାର ବରିଷ୍ଠ କ୍ରିକେଟର ଦିଲ୍ରୁୱାନ ପେରେରା ବୁଧବାର ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ଘୋଷଣା କରିଛନ୍ତି। ୩୯ ବର୍ଷିୟ ଦିଲ୍ରୁୱାନ ଶ୍ରୀଲଙ୍କା କ୍ରିକେଟ ବୋର୍ଡର ସିଇଓଙ୍କୁ ଇମେଲ ମାଧ୍ୟମରେ ତାଙ୍କ ନିଷ୍ପତ୍ତି ନେଇ ସୂଚନା ଦେଇଛନ୍ତି। ପେରେରା ଶ୍ରୀଲଙ୍କାର ଟେଷ୍ଟ ଦଳର ଜଣେ ଗୁରୁତ୍ୱପୂର୍ଣ୍ଣ ଖେଳାଳି ଥିଲେ। ତାଙ୍କର ଟେଷ୍ଟ କ୍ରିକେଟ ରେକର୍ଡ ମଧ୍ୟ ବେଶ ପ୍ରଶଂସନୀୟ। ତେବେ ଆନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ସେ ଘରୋଇ କ୍ରିକେଟ ଖେଳିବା ଜାରି ରଖିବେ ବୋଲି ଜଣାପଡ଼ିଛି।
ଦିଲ୍ରୁୱାନ ଶ୍ରୀଲଙ୍କା ପାଇଁ ଟେଷ୍ଟ କ୍ରିକେଟରେ ୫୦ ଏବଂ ୧୦୦ ଉଇକେଟ ନେବାରେ ଦ୍ରୁତତମ ବୋଲର ଅଟନ୍ତି। ସେ ନିଜ କ୍ୟାରିୟରର ୧୧ ଏବଂ ୨୫ ତମ ଟେଷ୍ଟ ମ୍ୟାଚରେ ଏହି ସଫଳତା ହାସଲ କରିଥିଲେ। ବୋଲିଂ ସହିତ ସେ ଜଣେ ଭଲ ବ୍ୟାଟ୍ସମ୍ୟାନ ମଧ୍ୟ ଥିଲେ। ସେ ଶ୍ରୀଲଙ୍କା ପାଇଁ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଛନ୍ତି। ସେ ପ୍ରଥମ ଖେଳାଳି ଭାବରେ ଶ୍ରୀଲଙ୍କା ପାଇଁ ଏକ ଟେଷ୍ଟ ମ୍ୟାଚରେ ଅର୍ଦ୍ଧଶତକ ହାସଲ କରିବା ସହିତ ୧୦ ୱିକେଟ ନେଇଥିଲେ।
ପେରେରା ୨୦୧୪ ରେ ଶାରଜାଠାରେ ପାକିସ୍ତାନ ବିପକ୍ଷରେ ଟେଷ୍ଟ ଡେବ୍ୟୁ କରିଥିଲେ। ଏହାର ସାତ ବର୍ଷ ପୂର୍ବରୁ, ୨୦୦୭ରେ ସେ କଲମ୍ବୋରେ ଇଂଲଣ୍ଡ ବିପକ୍ଷରେ କ୍ୟାରିୟରର ପ୍ରଥମ ମ୍ୟାଚ ଖେଳିଥିଲେ। ୨୦୧୧ ରେ ସେ କ୍ୟାରିୟରର ପ୍ରଥମ ଆନ୍ତର୍ଜାତୀୟ ଟି -୨୦ ମ୍ୟାଚ ଖେଳିବାର ସୁଯୋଗ ପାଇଥିଲେ। ସେ ଶେଷ ଥର ପାଇଁ ୨୦୧୮ ରେ ଦୁବାଇରେ ଶ୍ରୀଲଙ୍କା ପାଇଁ ଖେଳୁଥିବା ଦେଖିବାକୁ ମିଳିଥିଲା।
ପେରେରା ତାଙ୍କ କ୍ୟାରିୟରରେ ଶ୍ରୀଲଙ୍କା ପାଇଁ ୪୩ ଟି ଟେଷ୍ଟ, ୧୩ ଟି ଦିନିକିଆ ଏବଂ ୩ ଟି -୨୦ ମ୍ୟାଚ ଖେଳିଥିଲେ। ଏହାଛଡ଼ା ସେ ୧୩ ଦିନିକିଆରେ ୧୩ ଉଇକେଟ ଏବଂ ୨ ଟି -୨୦ ରେ ୩ ଉଇକେଟ ନେଇଛନ୍ତି।
