ପାଟଣା,୨୬।୧: ଦେଶରେ ବୁଧବାର ୭୩ତମ ସାଧାରଣତନ୍ତ୍ର ଦିବସ ପାଳନ ହେଉଥିବା ବେଳେ ବିହାରରେ ଏକ ଯାତ୍ରୀବାହି ଟ୍ରେନକୁ ଜାଳି ଦେଇଛନ୍ତି ରେଲଓ୍ବେ ଚାକିରି ପରୀକ୍ଷା ବିରୋଧରେ ବିକ୍ଷୋଭ କରୁଥିବା ଛାତ୍ରୀଛାତ୍ର। କେବଳ ଏତିକି ନୁହେଁ, ଅନ୍ୟ ଏକ ଯାତ୍ରୀବାହି ଟ୍ରେନକୁ ପଥରେ ଆକ୍ରମଣ ମଧ୍ୟ କରାଯାଇଛି। ସରକାର ପରୀକ୍ଷାକୁ ବାତିଲ କରିବା ସହ ବିକ୍ଷୋଭକାରୀ ଛାତ୍ରୀଛାତ୍ରଙ୍କ ସମସ୍ୟାର ସମାଧାନ ପାଇଁ ଏକ କମିଟି ଗଠନ କରିଛନ୍ତି।
ଘଟଣାସ୍ଥଳର ଭିଡିଓରେ ଟ୍ରେନର ବିଭିନ୍ନ ବଗି ଜଳୁଥିବା ବେଳେ ଅଗ୍ନିଶମ କର୍ମଚାରୀ ନିଆଁ ଲିଭାଇବାକୁ ପ୍ରୟାସ କରୁଛନ୍ତି। ବଡ଼ ସଂଖ୍ୟାରେ ପୋଲିସ ମୁତୟନ ହୋଇଥିଲେ ମଧ୍ୟ ବିକ୍ଷୋଭକାରୀଙ୍କୁ ନିୟନ୍ତ୍ରଣ କରିପାରି ନ ଥିଲେ। ବିକ୍ଷୋଭକାରୀମାନେ ରେଲଓ୍ବେ ସମ୍ପତ୍ତି ଭଙ୍ଗାରୁଜା କରିବା ସହ ବିଭିନ୍ନ ଟ୍ରେନକୁ ଟାର୍ଗେଟ କରିଥିଲେ। ଏଥିଯୋଗୁ ରାଜ୍ୟରେ ଟ୍ରେନ ଚଳାଚାଳ ବାଧାପ୍ରାପ୍ତ ହୋଇଛି।
ବିକ୍ଷୋଭରେ ରେଲଓ୍ବେ ରିକ୍ରୁଟମେଣ୍ଟ ବୋର୍ଡର ନନ୍-ଟେକନିକାଲ କ୍ୟାଟେଗୋରି (ଆର୍ଆର୍ବି-ଏନ୍ଟିପିସି) ପରୀକ୍ଷା ୨୦୨୧ ଦେଇଥିବା ଛାତ୍ରୀଛାତ୍ର ସାମିଲ ଅଛନ୍ତି। ରେଲଓ୍ବେର ଦୁଇଟି ପର୍ଯ୍ୟାୟରେ ପରୀକ୍ଷା ନିଷ୍ପତ୍ତିକୁ ବିରୋଧ କରୁଛନ୍ତି। ପ୍ରଥମ ପର୍ଯ୍ୟାୟରେ ଉତ୍ତୀର୍ଣ୍ଣ ହୋଇଥିବା ପରୀକ୍ଷାର୍ଥୀଙ୍କ ଲାଗି ଏହା ଅନୁଚିତ ବୋଲି ଦାବି କରାଯାଉଛି।
୨୦୧୯ରେ ପରୀକ୍ଷା ପାଇଁ ଜାରି କରାଯାଇଥିବା ନୋଟିଫିକଶେନରେ କେବଳ ଗୋଟିଏ ପରୀକ୍ଷା ସମ୍ପର୍କରେ ଉଲ୍ଲେଖ ଥିଲା ବୋଲି ପରୀକ୍ଷାର୍ଥୀ ଦାବି କରୁଛନ୍ତି। ଅନ୍ୟପକ୍ଷରେ ନୋଟିସଫିକେଶନରେ ଦ୍ୱିତୀୟ ଷ୍ଟେଜ ପରୀକ୍ଷା ପାଇଁ ଉଲ୍ଲେଖ ଥିବା ରେଲଓ୍ବେ ମନ୍ତ୍ରଣାଳୟ ସ୍ପଷ୍ଟ କରିଛି।
