ଭୋଗରାଇ,୨୬।୬(ପ୍ରଦୀପ ଦାସ): ଚଳିତ ମାଟ୍ରିକ ପରୀକ୍ଷାରେ ପରୀକ୍ଷାର୍ଥୀଙ୍କୁ କପି ଯୋଗାଇବା ଓ ଅସାଧୁ ଉପାୟ ଅବଲମ୍ବନ କରିଥିବା ଯୋଗୁ ଶିକ୍ଷକଙ୍କୁ ନିଲମ୍ବିତ କରାଯାଇଛି। ଏଭଳି ଘଟଣା ଘଟିଛି ବାଲେଶ୍ୱର ଜିଲା ଭୋଗରାଇ ବ୍ଲକ ହରିଦାସପୁର ନରେନ୍ଦ୍ର ନାଥ ସରକାରୀ ଉଚ୍ଚ ବିଦ୍ୟାଳୟରେ। ଏ ନେଇ ପରୀକ୍ଷା କେନ୍ଦ୍ରର ଖେଳ ଶିକ୍ଷକ ତଥା ପରୀକ୍ଷା ନିରୀକ୍ଷକ ମନୋଜ କୁମାର ସାହୁଙ୍କୁ ଜିଲା ଶିକ୍ଷାଧିକାରୀ ପ୍ରତିଭା ମଞ୍ଜରୀ ଦାସ ଓ ବୋର୍ଡ କର୍ତ୍ତୃପକ୍ଷ ନିଲମ୍ବିତ କରିଛନ୍ତି। ଏହା ସହ ଉକ୍ତ ବିଦ୍ୟାଳୟର ୨ ଜଣ ଭୋକେଶନାଲ ଶିକ୍ଷକ ଜ୍ୟୋତିରଞ୍ଜନ ମହାନ୍ତି ଓ ସତ୍ୟରଞ୍ଜନ ପ୍ରଧାନଙ୍କୁ ପରୀକ୍ଷା କେନ୍ଦ୍ରରୁ ଅବ୍ୟାହତି ଦେଇଥିବା ଭୋଗରାଇ ଗୋଷ୍ଠୀ ଶିକ୍ଷାଧିକାରୀ କମଳ ଲୋଚନ ବିଶ୍ୱାଳ ସୂଚନା ଦେଇଛନ୍ତି ।
ପରୀକ୍ଷାକେନ୍ଦ୍ର ସ୍ବଚ୍ଛ ଓ ଶୃଙ୍ଖଳିତ ରଖିବା ନିମନ୍ତେ ଏହି ପରୀକ୍ଷାକେନ୍ଦ୍ର ପରିସରରେ ଥିବା ଛାତ୍ରାବାସରେ ରହୁଥିବା ଏହି ୩ ଜଣ ଶିକ୍ଷକଙ୍କୁ ସେଠାରୁ ବାହାର କରିଦିଆଯାଇଛି।
ସୂଚନାନୁଯାୟୀ ଉକ୍ତ ପରୀକ୍ଷା କେନ୍ଦ୍ରରେ ପରୀକ୍ଷାର୍ଥୀମାନଙ୍କୁ ସ୍କୁଲ ଶିକ୍ଷକ ମାନେ କପି ଯୋଗାଇବା ଅଭିଯୋଗ ହେଉଥିଲା। ଛାତ୍ରାବାସରେ ରହୁଥିବା ଏହି ୩ ଶିକ୍ଷକ ତାଙ୍କ ପରୀକ୍ଷା କେନ୍ଦ୍ରରେ ପରୀକ୍ଷା ଦେଉଥିବା ଅନ୍ୟ ହାଇସ୍କୁଲର ଶିକ୍ଷକ ଓ ଅଭିଭାବକ ମାନଙ୍କଠାରୁ ଅର୍ଥ, ଖାଦ୍ୟ ଗ୍ରହଣ କରୁଥିବାବେଳେ ଗ୍ରାମବାସୀମାନେ ଶୁକ୍ରବାର ରାତିରୁ ପରୀକ୍ଷା କେନ୍ଦ୍ରରେ ତାଲାପକାଇ ଶନିବାର ସକାଳ ସାଢେ ୭ଟା ପର୍ଯ୍ୟନ୍ତ ଅସାଧୁ ଶିକ୍ଷକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବିକରି ନାରାବାଜି ପ୍ରଦର୍ଶନ କରିଥିଲେ। ଏହି ଘଟଣା ଗଣମାଧ୍ୟମରେ ପ୍ରଚାର ପରେ ରବିବାର ରାତିରେ ଜିଲା ବିଜ୍ଞାନ ପରିଦର୍ଶକ ଏବଂ ପରୀକ୍ଷା ଦାୟିତ୍ୟରେ ଥିବା ହରେନ୍ଦ୍ର ମହାନ୍ତ ଏବଂ ଭୋଗରାଇ ଗୋଷ୍ଠୀ ଶିକ୍ଷାଧିକାରୀ କମଳ ଲୋଚନ ବିଶ୍ୱାଳ ଘଟଣାସ୍ଥଳରେ ପହଞ୍ଚି ତଦନ୍ତ କରି ଜିଲା ଶିକ୍ଷାଧିକାରୀଙ୍କୁ ରିପୋର୍ଟ ଦେବାପରେ ବୋର୍ଡ କର୍ତ୍ତୃପକ୍ଷ ଓ ଜିଲାଶିକ୍ଷାଧିକାରୀ ୩ ଅସାଧୁ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।ଅପରପକ୍ଷରେ ବିଭିନ୍ନ ପରୀକ୍ଷା କେନ୍ଦ୍ରରେ ଏଆଇ ସର୍ଭେଲାନ୍ସ ସିସି କ୍ୟାମେରା ଲାଗି ନ ଥିବା ଏବଂ ପରୀକ୍ଷା କେନ୍ଦ୍ରରେ ପରୀକ୍ଷା ନିରୀକ୍ଷକମାନେ ୫୦ ମାର୍କ ସଂକ୍ଷିପ୍ତ ପ୍ରଶ୍ନତ୍ତର ପରୀକ୍ଷାର୍ଥୀ ମାନଙ୍କୁ ଡାକିଦେଉଥିବାର ଅଭିଯୋଗ ହୋଇଛି ।
