ଲକ୍ଷ୍ନୌ,୫।୮: ଉତ୍ତରପ୍ରଦେଶ ବିଧାନସଭାର ମୌସୁମୀ ଅଧିବେଶନ ସମୟରେ ବାଚସ୍ପତି ସତୀଶ ମହାନା ବିଧାୟକମାନଙ୍କୁ ସମ୍ବୋଧିତ କରିବା ସମୟରେ ଭାବପ୍ରବଣ ହୋଇ ପଡ଼ିଥିଲେ। ଅଧିବେଶନର ଦ୍ୱିତୀୟ ଦିନ ଅଗଷ୍ଟ ୪ରେ ହୋଇଥିବା ହଙ୍ଗାମା ବିଷୟରେ ଉଲ୍ଲେଖ କରି ବାଚସ୍ପତି କହିଥିଲେ, ମୁଁ ଏହି ପଦବୀ ପାଇଁ ଯୋଗ୍ୟ କି ନାହିଁ ସେ ବିଷୟରେ ଆତ୍ମସମୀକ୍ଷା କରିବି। ମୁଁ ଏହି ଚୌକି ପାଇଁ ଯୋଗ୍ୟ କି ନାହିଁ ଏବଂ ଗତ ସାଢ଼େ ଚାରି ବର୍ଷ ଧରି ମୁଁ ଯାହା କରିଛି ତାହା ଉପଯୁକ୍ତ କି ନାହିଁ ତାହା ମୋତେ ବିଚାର କରିବାକୁ ପଡିବ।
ବାଚସ୍ପତି ମନ୍ତବ୍ୟ ଦେଇଥିଲେ, ମୋର ଏକ ଲମ୍ବା ରାଜନୈତିକ କ୍ୟାରିଅର ଅଛି, ଯାହା ବର୍ତ୍ତମାନ ଶେଷ ପର୍ଯ୍ୟାୟରେ ଅଛି। ମୋର ପ୍ରୟାସ ହେଉଛି, ଏହି ବିଧାନସଭା ମୋତେ ଯାହା ଦେଇଛି, ତାହା କିଛି ପରିମାଣରେ ପରିଶୋଧ କରିବି। ମୁଁ ଆପଣମାନଙ୍କୁ ସମସ୍ତଙ୍କୁ ଦଳୀୟ ସୀମାରୁ ଉପରକୁ ଉଠି ଆମେ କିପରି ଭଲ କରିପାରିବୁ ତାହା ବିଚାର କରିବାକୁ ଅନୁରୋଧ କରୁଛି।
ବାଚସ୍ପତି ମନେ ପକାଇ କହିଥିଲେ,ଯେତେବେଳେ ଅଖିଳେଶ ଯାଦବ ମୁଖ୍ୟମନ୍ତ୍ରୀ ଥିଲେ, ଏହି ବିଧାନସଭାରେ ଦୁଇଜଣ ବିଧାୟକ ସେମାନଙ୍କର ଶର୍ଟ ଖୋଲି ଦେଇଥିଲେ। ସେତେବେଳେ, ମୁଁ କହିଥିଲି ଯେ କେବଳ ସେହି ଦୁଇ ବିଧାୟକ ସେମାନଙ୍କର ପୋଷାକ ଖୋଲି ନ ଥିଲେ; ବରଂ ସମସ୍ତ ୪୦୩ ବିଧାୟକଙ୍କ ମର୍ଯ୍ୟାଦା ହରଣ କରିଥିଲେ।
ବାଚସ୍ପତି କହିଥିଲେ, ଯଦିଓ ବିତର୍କ, ସହମତି ଏବଂ ମତଭେଦ ଗଣତନ୍ତ୍ରର ଅବିଚ୍ଛେଦ୍ୟ ଅଂଶ, ଭାଷାର ସୌନ୍ଦର୍ଯ୍ୟ ବଜାୟ ରହିବା ଆବଶ୍ୟକ। ଗତକାଲି ଗୃହରେ ଯାହା ଘଟିଲା ତାହା ଦେଖି ମୁଁ ଦୁଃଖିତ ଏବଂ ନିରାଶ। ପ୍ରଥମ ଥର ପାଇଁ, ମୁଁ ଅନୁଭବ କଲି ଯେ ଆମର ପ୍ରୟାସରେ କୌଣସି ତ୍ରୁଟି ଥିଲା, କିମ୍ବା ବାବାସାହେବ ଭୀମରାଓ ଆମ୍ବେଦକର ଠିକ ଥିଲେ: ତ୍ରୁଟି ସମ୍ବିଧାନରେ ନୁହେଁ, ବରଂ ବ୍ୟକ୍ତିବିଶେଷଙ୍କ ମଧ୍ୟରେ ଅଛି।
Dharitri – Odisha’s No.1 Odia Daily
