ଦେବଗଡ଼,୧।୫(ଶଶାଙ୍କ ଶେଖର ଝାଙ୍କର): ୧୯୮୮ ବ୍ୟାଚର ଓଡ଼ିଶା ପୋଲିସ ପ୍ରଶାସନିକ ସେବାର ବରିଷ୍ଠ ଅଧିକାରୀ ତଥା ଦେବଗଡ଼ ଏସପି ଅନିଲ କୁମାର ମିଶ୍ର ଗୁରୁବାର କାର୍ଯ୍ୟରୁ ଅବସର ଗ୍ରହଣ କରିଛନ୍ତି । ଅତିରିକ୍ତ ଏସପି ଧୀରଜ ଚୋପଦାରଙ୍କୁ ଦାୟିତ୍ୱ ହସ୍ତାନ୍ତର କରି ଏସ୍ପି ମିଶ୍ର ସେବା ନିବୃତ ହୋଇଛନ୍ତି l ଏହି ଉପଲକ୍ଷେ ଗୁରୁବାର ସନ୍ଧ୍ୟାରେ ରିଜର୍ଭ ପୋଲିସ କାର୍ଯ୍ୟାଳୟ ଠାରେ ଡିଆଇବି ଡିଏସପି ପବିତ୍ର କିଷାନଙ୍କ ସଂଯୋଜନାରେ ଆୟୋଜିତ ସଭାରେ ତାଙ୍କୁ ଅବସରକାଳୀନ ଭବ୍ୟ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଭାରପ୍ରାପ୍ତ ଏସପି ଚୋପଦାରଙ୍କ ସଭାପତିତ୍ୱରେ ଆୟୋଜିତ ସମ୍ବର୍ଦ୍ଧନା ସଭାରେ ମୁଖ୍ୟ ଅତିଥିଭାବେ ଜିଲାପାଳ କବିନ୍ଦ୍ର କୁମାର ସାହୁ,ସମ୍ମାନିତ ଅତିଥିଭାବେ ଅତିରିକ୍ତ ଜିଲାପାଳ ରେବେକା ବିଲୁଙ୍ଗ, ଉପଜିଲାପାଳ ପରକ୍ଷିତ ସାହୁ ପ୍ରମୁଖ ଉପସ୍ଥିତ ରହି ଅବସରପ୍ରାପ୍ତ ଏସପି ମିଶ୍ରଙ୍କୁ ପୁଷ୍ପ ଗୁଚ୍ଛ ଓ ଉପଢୌକନ ପ୍ରଦାନ ପୂର୍ବକ ସମ୍ବର୍ଦ୍ଧିତ କରିବା ସହ ଏସ୍ପି ମିଶ୍ରଙ୍କ ସୁସ୍ଥ ଓ ଦୀର୍ଘ ଜୀବନ କାମନା କରିଥିଲେ l
ଏହି ଅବସରରେ ଜିଲା ପୋଲିସରେ କାର୍ଯ୍ୟରତ ଅନ୍ୟ ଦୁଇଜଣ ପୋଲିସ ଅଧିକାରୀ ସବଇନ୍ସପେକ୍ଟର ପଙ୍କଜ ମାଝୀ ଓ କନଷ୍ଟେବଳ ସିଦ୍ଧେଶ୍ୱର ସାହୁଙ୍କୁ ପୁଷ୍ପ ଗୁଚ୍ଛ ଓ ଉପଢୌକନ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ ଏସପି ମିଶ୍ରଙ୍କ କାର୍ଯ୍ୟ ଦକ୍ଷତା, ସାମାଜିକ ଦାୟିତ୍ୱବୋଧ ଓ ବିଭାଗୀୟ ଅଧିକାରୀଙ୍କ ଠାରୁ କାର୍ଯ୍ୟ ହାସଲ କରାଇବାର ଦକ୍ଷତା ସମ୍ପର୍କରେ ନିଜନିଜ ଅଭିଜ୍ଞତା ବଖାଣିଥିଲେ । ଏସପି ମିଶ୍ର ୧୯୮୮ରେ ଅନୁଗୋଳ ପୋଲିସ ଟ୍ରେନିଂରେ ଯୋଗଦେଇ ପ୍ରଶିକ୍ଷିତ ହେବାପରେ କେନ୍ଦ୍ରାପଡା, ବଡମ୍ବା,ଖୋର୍ଦ୍ଧା,ବାଲିପାଟଣା, କ୍ୟାପିଟାଲ ଥାନା, କେନ୍ଦୁଝର ସଦର, ସୁନ୍ଦରଗଡ଼ ଜିଲା ହେମଗିର ଆଦି ଥାନାରେ ସବଇନ୍ସପେକ୍ଟର ଭାବେ କାର୍ଯ୍ୟ ତୁଲାଇବା ପରେ ଜଗତସିଂହପୁର ସର୍କଲ ଇନ୍ସପେକ୍ଟର, ପାରାଦ୍ୱୀପ, କୁଜଙ୍ଗ, ବ୍ରହ୍ମପୁର ଥାନା ଆଇଆଇସି ପରେ କଟକ ଏସିପି ଜୋନ ୬, ଏସିପି ଜୋନ ୫, ଅତିରିକ୍ତ ଡିସିପି କଟକରେ ଦକ୍ଷତାର ସହ କାର୍ଯ୍ୟ ତୁଲାଇଥିଲେ। ଏହାପରେ ୨୦୨୪ ଅକ୍ଟୋବର ୩ ତାରିଖ ଦିନ ଦେବଗଡ଼ ଜିଲାର ୫୧ ତମ ଏସପି ଭାବେ ଦାୟିତ୍ୱ ଗ୍ରହଣ କରିଥିଲେ।ସେହିପରି ଗତ ବର୍ଷ ତାଙ୍କୁ ଏସଏଏଜି ପାହ୍ୟାକୁ ପଦୋନ୍ନତି କରାଯାଇଥିଲା। ଏସପି ମିଶ୍ର ଜିଲାର ବିଭିନ୍ନ କାର୍ଯ୍ୟକ୍ରମରେ ଅତିଥିଭାବେ ଯୋଗ ଦେବା ଅବସରରେ ତାଙ୍କ ବକ୍ତବ୍ୟ ଶ୍ରୋତାଙ୍କୁ ଦୀର୍ଘ ସମୟ ପର୍ଯ୍ୟନ୍ତ ବାନ୍ଧି ରଖିପାରୁଥିବା ଯୋଗୁ ଜିଲାରେ ଜଣେ ସୁ ବକ୍ତା ଭାବେ ଏସପି ମିଶ୍ର ପ୍ରସିଦ୍ଧି ଲାଭ କରିଥିଲେ । ତେବେ ତାଙ୍କ କାର୍ଯ୍ୟକାଳ ମଧ୍ୟରେ ଜିଲା ପୋଲିସ ବହୁ ଉନ୍ନତିମୂଳକ କାର୍ଯ୍ୟକରିବା ସହ କର୍ମଚାରୀଙ୍କ ପ୍ରତି କୋହଳ ମନୋଭାବ ଯୋଗୁ ଏସପି ମିଶ୍ର ବିଭାଗୀୟ କର୍ମଚାରୀ ମହଲରେ ବେଶ ଜନପ୍ରିୟ ହୋଇପାରିଥିଲେ । କାର୍ଯ୍ୟକ୍ରମରେ ଏସଡ଼ିପିଓ ରମେଶ ଚନ୍ଦ୍ର ମାହାନା,ଡିଏସପି ଏଚଆରପିସି ଅମୁଲ୍ୟ ପୁନମ ଲାକ୍ରା,ରିଜର୍ଭ ଇନ୍ସପେକ୍ଟର ହାମ୍ବିରା ସୋରେନ,ଦେବଗଡ଼ ଥାନା ଆଇଆଇସି ସବ୍ୟସାଚ୍ଚି ଶତପଥି, ବାରକୋଟ ଥାନା ଆଇଆଇସି ସୁଶାନ୍ତ କୁମାର ବେଇ, ରିଆମାଳ ଥାନା ଆଇଆଇସି ବିନୟ କେରକେଟ୍ଟା, କୁଣ୍ଢେଇଗୋଳା ଥାନା ଆଇଆଇସି ଜୋହାନ କୁଜୁର, ଲଇମୁରା ଥାନା ଆଇଆଇସି ଗଣେଶ୍ୱର ବେହେରା, ଜିଲା କନଷ୍ଟେବଳ ହାବିଲଦାର ସଙ୍ଘ ସଭାପତି ଯୋଗେନ୍ଦ୍ର ସାହୁ, ସମ୍ପାଦକ ସଞ୍ଜୀବ କୁମାର ବେହେରାଙ୍କ ସମେତ ଜିଲା ପୋଲିସର ସମସ୍ତ ଅଧିକାରୀ ଓ କର୍ମଚାରୀ ଏବଂ ରିଜର୍ଭ ପୋଲିସର ସମସ୍ତ ପୋଲିସ ବଳ ଉପସ୍ଥିତ ରହି ବିଦାୟୀ ଏସପି ମିଶ୍ରଙ୍କୁ ଅବସରକାଳୀନ ସମ୍ବର୍ଦ୍ଧନା ଜ୍ଞାପନ କରିଥିଲେ।
