ମୋହନା, ୬।୧୧ (ମନ୍ମଥ ମିଶ୍ର): ବାତ୍ୟା ‘ଅର୍ଣ୍ଣବ’ର ପ୍ରଭାବ ପରେ ଗଜପତି ଜିଲ୍ଲା ମୋହନା ବ୍ଲକରେ ମହିଳା ଓ ଶିଶୁଙ୍କ ସୁରକ୍ଷାକୁ ନେଇ ପ୍ରଶାସନ ତତ୍ପର ହୋଇଛି। ଏହି ପରିପ୍ରେକ୍ଷୀରେ ରାଜ୍ୟ ମହିଳା ଓ ଶିଶୁ ସୁରକ୍ଷା ଆୟୋଗର ଅଧ୍ୟକ୍ଷା ମୋହନା ଅଞ୍ଚଳ ଗସ୍ତ କରି ବାତ୍ୟା କ୍ଷତିଗ୍ରସ୍ତ ଅଞ୍ଚଳର ସ୍ଥିତି ପରଖିଛନ୍ତି। ବ୍ଲକର ବିଭିନ୍ନ ଗାଁ ବୁଲି ଅଙ୍ଗନବାଡ଼ି କେନ୍ଦ୍ର ଓ ଆବାସିକ ବିଦ୍ୟାଳୟର ସ୍ଥିତି ଅନୁଧ୍ୟାନ କରିବା ସହ ବାତ୍ୟା ପରବର୍ତ୍ତୀ ସମୟରେ ମହିଳା ଓ ଶିଶୁମାନେ କିପରି ସୁରକ୍ଷିତ ଅଛନ୍ତି, ସେ ସମ୍ପର୍କରେ ପଚାରି ବୁଝିଛନ୍ତି।
ମହିଳା ଓ ଶିଶୁଙ୍କ ସୁରକ୍ଷା ସହ ସେମାନଙ୍କୁ ମିଳୁଥିବା ସରକାରୀ ସୁବିଧା ସୁଯୋଗର ସ୍ଥିତି ମଧ୍ୟ ଅଧ୍ୟକ୍ଷା ଯାଞ୍ଚ କରିଥିଲେ। ଏହି ଗସ୍ତ ସମୟରେ ସେ ବାଡ଼ିପଙ୍କା, ପିଣ୍ଡିକି, ଢେପାନାଯୁ ଓ ତଲାସିଂ ଆଦି ଗାଁ ପରିଦର୍ଶନ କରିଥିଲେ। ଆବଶ୍ୟକ ପଦକ୍ଷେପ ନେବା ପାଇଁ ଜିଲାପାଳଙ୍କ ସହ ଆଲୋଚନା କରିବେ ବୋଲି ଅଧ୍ୟକ୍ଷା କହିଛନ୍ତି।
ଏହି ଗସ୍ତ ସମୟରେ ବିଡିଓ, ତହସିଲଦାରଙ୍କ ସମେତ ଜିଲା ଶିଶୁ ସୁରକ୍ଷା ଅଧିକାରୀ, ଜିଲା ସାମାଜିକ ମଙ୍ଗଳ ଅଧିକାରୀ ଓ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ଥିଲେ।
