ସେଞ୍ଚୁରିଆନ,୩୧।୧୨: ପ୍ରଥମ ଟେଷ୍ଟରେ ଭାରତ ଠାରୁ ମିଳିଥିବା ୧୧୩ ରନ୍ର ପରାଜୟରେ ବଡ଼ ନିଷ୍ପତ୍ତି ନେଇଛନ୍ତି ଦକ୍ଷିଣ ଆଫ୍ରିକାର ଉଇକେଟକିପର ବ୍ୟାଟର କୁଇଣ୍ଟନ ଡିକକ୍। ମ୍ୟାଚ୍ର କିଛି ଘଣ୍ଟା ପରେ ଟେଷ୍ଟ ଫର୍ମାଟରୁ ସନ୍ନ୍ୟାସ ଘୋଷଣା କରିଛନ୍ତି। ଡିକକ୍ଙ୍କ ଏଭଳି ନିଷ୍ପତ୍ତି ସମ୍ପର୍କରେ ଗୁରୁବାର ଏକ ବିବୃତି ଜାରି କରିଛି କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ)।
“ ମୋ ଭବିଷ୍ୟତ ସମ୍ପର୍କରେ ଖୁବ୍ ଚିନ୍ତା କରିବା ପରେ ଟେଷ୍ଟରୁ ସନ୍ନ୍ୟାସ ଘୋଷଣା କରୁଛି। ଜୀବନରେ ଏବେ ମୋ ପାଇଁ ଯାହା ଆଗ, ତାହାକୁ ମୁଁ ଗୁରୁତ୍ୱ ଦେବା ପାଇଁ ଏଭଳି ନିଷ୍ପତ୍ତି ନେଇଛି। ବର୍ତ୍ତମାନ ସାଶା ଓ ମୁଁ ଆମର ପ୍ରଥମ ସନ୍ତାନକୁ ସ୍ବାଗତ କରିବାକୁ ଯାଉଛୁ। ମୋ ପରିବାର ମୋ ପାଇଁ ସବୁ କିଛି। ଜୀବନର ଏକ ରୋମାଞ୍ଚକର ଅଧ୍ୟାୟ ଆରମ୍ଭ ହେବାକୁ ଯାଉଥିବାରୁ ମୁଁ ସେମାନଙ୍କ ସହ ସମୟ ବିତାଇବାକୁ ଚାହୁଁଛି” ବୋଲି ଡିକକ୍ କହିଛନ୍ତି।
ମୁଁ ଟେଷ୍ଟ କ୍ରିକେଟକୁ ଭଲ ପାଏ। ଆଉ ଦେଶ ପାଇଁ ପ୍ରତିନିଧିତ୍ୱ କରିଥିବାରୁ ମୁଁ ଗର୍ବିତ। ମୋ କ୍ୟାରିୟରରେ ସବୁ କିଛିର ମଜା ନେଇଛି। କିନ୍ତୁ ମୋତେ ଏବେ ସେଭଳି କିଛି ମିଳିଛି, ଯାହାକୁ ମୁଁ ସବୁଠୁ ଅଧିକ ଭଲ ପାଏ ବୋଲି ଡିକକ୍ ବିବୃତିରେ କହିଛନ୍ତି।
୨୯ ବର୍ଷୀୟ ବାମହାତୀ ବ୍ୟାଟର କ୍ୟାରିୟରରେ ଦେଶ ପାଇଁ ୫୪ ଟେଷ୍ଟ ଖେଳିଛନ୍ତି। ସେଥିରେ ୬ ଶତକ ଓ ୨୨ ଅର୍ଦ୍ଧଶତକ ସହ ୩୩୦୦ ରନ୍ ରହିଛି।
