ମୁମ୍ବାଇ,୨୩।୧୨: “ବିରାଟ କୋହଲିଙ୍କ ନେତୃତ୍ୱ ଉପରେ ଚୟନକର୍ତ୍ତାଙ୍କ ପାଇଁ ମନ୍ତବ୍ୟ ଦେବା ଲାଗି ସୌରଭ ଗାଙ୍ଗୁଲି କେହି ନୁହଁନ୍ତି। ସେ ବିସିସିଆଇ ସଭାପତି। ଦଳ ଚୟନ ଏବଂ ଅଧିନାୟକଙ୍କ ଉପରେ ଚୟନ କମିଟି ମୁଖ୍ୟ ଚେତନ ଶର୍ମା କହିବା ଉଚିତ। କାରଣ ଜଣେ କ୍ୟାପଟେନଙ୍କୁ ରଖାଯିବ କି ନାହିଁ, ତାହା ସମ୍ପୂର୍ଣ୍ଣ ରୂପେ ଚୟନ କମିଟି ଉପରେ ନିର୍ଭର କରେ। ଏହା ଗାଙ୍ଗୁଲିଙ୍କ ନେତୃତ୍ୱାଧୀନ ପ୍ରସଙ୍ଗ ନୁହେଁ”। ଏଭଳି ମତ ଦେଇଛନ୍ତି ପୂର୍ବତନ ଅଧିନାୟକ ତଥା ଚୟନ କମିଟି ମୁଖ୍ୟ ଦୀଲିପ ଭେଙ୍ଗସରକର।
ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ଅଧିନାୟକ କୋହଲି କହିଥିଲେ, ଟେଷ୍ଟ ଦଳ ଚୟନର ଦେଢ଼ ଘଣ୍ଟା ପୂର୍ବରୁ ଚୟନକର୍ତ୍ତା ଫୋନ ଜରିଆରେ ଦିନିକିଆ ଦଳର ଅଧିନାୟକ ହୋଇପାରିବି ନାହିଁ ଜଣାଇଥିଲେ। ତା’ ପୂର୍ବରୁ ବିସିସିଆଇ ଅଧିକାରୀ କିମ୍ବା ଚୟନ କମିଟି ସଦସ୍ୟଙ୍କ ସହ ଏ ସମ୍ପର୍କରେ କୌଣସି ଆଲୋଚନା ହୋଇ ନ ଥିଲା । ତାଙ୍କର ଏଭଳି ମନ୍ତବ୍ୟ ଯୋଗୁ ଭାରତୀୟ କ୍ରିକେଟରେ ସୃଷ୍ଟି ହୋଇଛି ବିବାଦୀୟ ସ୍ଥିତି। କାରଣ ପୂର୍ବରୁ କୋହଲିଙ୍କୁ ଟି୨୦ ଦଳର ଅଧିନାୟକ ପଦ ନ ଛାଡ଼ିବା ପାଇଁ ବିସିସିଆଇ ଗୁହାରି କରିଥିଲା ବୋଲି ଗାଙ୍ଗୁଲି କହିଥିଲେ।
