ପଣଜୀ,୨୮ା୮: ଭାଜପା ନେତ୍ରୀ ସୋନାଲି ଫୋଗଟ୍ ହତ୍ୟା ମାମଲାରେ ଗୋଆ ପୋଲିସ ଆଉ ଜଣେ ବ୍ୟକ୍ତିଙ୍କୁ ଗିରଫ କରିଛି। ଗିରଫ ବ୍ୟକ୍ତି ଜଣକ ଡ୍ରଗ୍ସ ଡିଲର ବୋଲି ଜଣାପଡିଛି। ପୋଲିସ ଶନିବାର ରାତିରେ ତାଙ୍କୁ ଗିରଫ କରିଛି। ଡ୍ରଗ୍ସ ଡିଲରଙ୍କୁ ମିଶାଇ ଏପର୍ଯ୍ୟନ୍ତ ୫ ଜଣଙ୍କୁ ଏହି ମାମଲାରେ ଗିରଫ କରାଯାଇଛି।
ପୋଲିସ ପୂର୍ବରୁ ରେଷ୍ଟୁରାଣ୍ଟ ମାଲିକଙ୍କୁ ମଧ୍ୟ ଗିରଫ କରିଛି, ଯେଉଁଠାରେ ଫୋଗଟ୍ଙ୍କ ମୃତ୍ୟୁ ପୂର୍ବରୁ ରାତିରେ ପାର୍ଟି ହୋଇଥିଲା। ଗିରଫ ଡ୍ରଗ୍ସ ଡିଲରଙ୍କ ନାମରେ ନାର୍କୋଟିକ ଡ୍ରଗ୍ ଏବଂ ସାଇକୋଟ୍ରୋପିକ ପଦାର୍ଥ ଅଧିନିୟମ ଅନୁଯାୟୀ ଏକ ମାମଲା ରୁଜୁ ହୋଇଛି। ଅନ୍ୟପକ୍ଷେ ଗୁରୁବାର ଗିରଫ ହୋଇଥିବା ସୁଧୀର ସଗ୍ବାନ ଏବଂ ସୁଖଓ୍ବିନ୍ଦର ସିଂଙ୍କୁ ୧୦ ଦିନ ପୋଲିସ ହେପାଜତକୁ ପଠାଇ ଦିଆଯାଇଛି।
ପୋଲିସ ରେସ୍ତୋରାଁ କର୍ମଚାରୀ, ଫୋଗଟ୍ ରହୁଥିବା ରିସର୍ଟ, ଡାକ୍ତରଖାନା ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା ଏବଂ ତାଙ୍କ ଡ୍ରାଇଭରଙ୍କ ସମେତ ୨୫ରୁ ଊର୍ଦ୍ଧ୍ୱ ଲୋକଙ୍କୁ ପଚରାଉଚରା କରିଛି। ଅନ୍ୟପକ୍ଷେ ପୋଲିସ ପ୍ରଥମେ ଫୋଗଟ୍ଙ୍କ ମୃତ୍ୟୁ ହୃଦ୍ଘାତରେ ଘଟିଥିବା ଅନୁମାନ କରୁଥିଲା। ହେଲେ ପରିବାର ଲୋକେ ଘଟଣାର ପୁଙ୍ଖାନୁପୁଙ୍ଖ ଯାଞ୍ଚ ଦାବି କରିଥିଲେ। ପରେ ପୋଲିସ ତତ୍ପରତା ଦେଖାଇ ମାମଲାର ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ଫୋଗଟ୍ଙ୍କ ମୃତ୍ୟୁ ରହସ୍ୟ ଦିନକୁ ଦିନ ଫିଟିବାରେ ଲାଗିଛି।
ସୋନାଲି ଫୋଗଟ୍ ହତ୍ୟା ମାମଲା ସିବିଆଇକୁ ହସ୍ତାନ୍ତର କରିବାକୁ ଗୋଆ ସରକାରଙ୍କୁ ଚିଠି ଲେଖିବେ ବୋଲି ହରିୟାଣା ସରକାରଙ୍କ ପକ୍ଷରୁ ସୂଚନା ଦିଆଯାଇଛି। ଫୋଗଟ୍ଙ୍କ ପରିବାର ଚଣ୍ଡିଗଡ଼ରେ ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟରଙ୍କୁ ଭେଟିବା ପରେ ସରକାରଙ୍କ ପକ୍ଷରୁ ଏହି ଘୋଷଣା କରାଯାଇଛି।
